الثلاثاء، 5 أبريل، 2016

مشترياتي من امازون + تجربتي الثانية مع موقع shopfans

السلام عليكم حبايبي ❤️ اليوم بحطلكم مشتريات منوعة من موقع امازون استخدمت فيها البريد الامريكي حقي من شوب فانز الي تكلمت عنو قبل في التدوينة الي راحت و هدا رابط التدوينة

هدي تجربتي الثانية و انا قسمت المشتريات هدي على دفعتين الدفعة الاولى الشحن كلف ٩٠.٤٥ دولار يعني تقريبا ٣٦٠ و كانت الدفعة الاكبر و الثانية كلفت ٥٩ دولار تقريبا ٢٢١ ريال صراحة يعتبر ارخص من موقع ماي يو اس الي تعاملت معاه قبل و اسرع في التوصيل.

وصلتني الطلبية خلال ٤ ايام بس عن طريق البريد الممتاز. تغليف الاشياء كان مرة ممتاز الاشياء الي ممكن تتكسر مغلفة باكياس للحماية و الاشياء مرتبة مع بعض.

في عيبين للموقع لاحظتها:

١. الموقع بطيئ و كم مرة يعلق و ما يفتح فا طفشني شوية هدي المرة.

٢. لازم ادخل اسعار كل الاشياء بنفسي يعني كل منتج و سعرو و الكمية. لكن في المقابل يحطو رقم الشحنة نفسها الي تكون في امازون يعني ما يغيرو الاسم فا قدرت اعرف ايش هي الشحنات و المنتجات الي فيها. بس طفشت و انا اكتب ههههههه

الخميس، 24 مارس، 2016

البريد الأمريكي shopfans + مشترياتي من أمازون

السلام عليكم حبايبي ❤️ اسفة على الغيبة الطويلة و التاخير بس كنت مشغولة في الاجازة مع اهلي بعدين مرضت :( 

المهم قبل فترة في سناب شات نزلت مشتريات ليا من امازون عن طريق البريد الامريكي shopfans و هم قريب فتحوا الطلب للخليج العربي
اول شي بتكلم عن مميزات الموقع:

١. يدعم اللغة العربية و هدا أهم شي للبنات الي ما يعرفوا لغة انجليزية.
٢. مافي رسوم تسجيل يعني التسجيل في مجاني
٣. في تجميع طلبات و تقدري تخلي الشحنة في المخزن لمدة ٧٥ يوم مجاناً
٤. يرجعوا يرتبوا الشحنة مرة ثانية و يغلفوها بشكل مرتب عشان توصلك سليمة
٥. عندهم خدمة لايف تشات يعني تقدري تتكلمي مع الدعم الفني و انتي على الموقع اذا عندك مشكلة
٦. عندهم خدمات زي انهم يشيلوا سعر المنتج، يصوروا المنتجات الي جات، يرجعوا الشحنة.
٧. في كود تدخلي يشيلوا عنك اي رسوم خدمات يسير بس تدفعي فلوس الشحن و راح احطو ان شاء الله في اخر الشرح.
٨. خدمة الموقع سريعة و الشحن سريع وصلني في خلال ٥ ايام تقريبا بالبريد الممتاز.
٩. عندهم اكتر من خيار للتوصيل و موضحة اسعار و مدة توصيل كل خدمة عندهم البريد الممتاز او السريع و البريد الجوي و الدي اتش ال و البريد العادي.

السبت، 27 فبراير، 2016

مشتريات من اي هيرب #٧

السلام عليكم حبايبي ❤️ اليوم بنزلكم اخر مشتريات من اي هيرب حبيب الكل ههههه لقيت انو اكتر مواضيع مشاهدة هي مشتريات اي هيرب عشان كدة احرص دايما انزلها ليكم 👍🏻 و لمعرفة طريقة الطلب شوفوا مدونة هناء بدر شرحت في الطريقة كاملة

http://hanaa-badr.blogspot.com/2014/12/iherb.html



اول شي طلبت بخاخ الو فيرا لترطيب الجسم حبيت اجرب بما ان الكل يمدح الالو فيرا في الترطيب و اوقات يجيني كسل احط كريم فا استخدم البخاخ هههههه و اخدت كمان بخاخ موية ورد و في ريحة ورد كمان لتعطير الجسم و الشعر

الثلاثاء، 23 فبراير، 2016

محتويات الماجيك بوكس من موقع فانيلا

السلام عليكم حبايبي ❤️ اليوم راح انزلكم محتويات صندوق ماجيك بوكس من موقع فانيلا



اول شي موقع فانيلا اعتبرو افضل موقع عربي للتسوق لانو منوع في ملابس، اكسسورات، شنط، ميك اب الخ و اتعاملت معاه اكثر من مرة و تعاملهم رائع و يهتموا بادق التفاصيل. 

و كل بضايعهم اصلية 👍🏻 تعاملت قبل مع مواقع عربية طلعت للاسف تقليد و كاتبين اصلية اما موقع فانيلا فا تعاملت معاهم كم مرة و كلها اصلية. و هدا رابط الموقع حقهم

http://vanilla.sa

الاثنين، 15 فبراير، 2016

الاساسيات في الميك اب و ايش تحتاجي؟




السلام عليكم حبايبي ❤️ اول شي اسفة على التاخير بس مريت بظروف خارجة عن ارادتي. و اليوم نكمل موضوعنا و الي ما شاف الجزء الاول يشوفوا في الرابط تحت 👇🏻

مصطلحات المكياج + نصائح عامة للمبتدئات

اليوم راح اتكلم عن الاساسيات الي راح تحتاجيها عشان تبداي في الميك اب و الماركات الكويسة الي تقدري تاخدي منها و كلها الماركات حتكون درغستور 👍🏻 راح اكتب كل شي و انتي شوفي اذا تحتاجي هدا الشي او لا انتي احكمي بنفسك لان صعب اقول كل وحدة ايش تحتاج لان يختلف من بشرة لبشرة و من ذوق لذوق فا الافضل تقدري كلامي و تختاري احتياجك بنفسك ❤️

انا حتكلم عن الماركات الي اكون جربتها في ماركات ما قيد جربت منها شي فا ما اقدر احكم زي اسادورا. 

١. الفاونديشن: اول شي لازم تعرفي نوع بشرتك لان كل بشرة ليها نوع معين يناسبها مثلا الدهنية لازم الفاونديشن يكون من غير زيوت و مات و الجافة يكون في نسبة ترطيب زي كدة. و بالنسبة للتغطية على حسب بشرتك اذا فيها عيوب تبغي تغطيها خدي شي تغطية متوسطة الى عالية و اذا بشرتك ما تحتاج تغطية خدي فاونديشن تغطيتو خفيفة او الافضل تستخدمي بي بي او سي سي كريم لان راح يكون اخف على البشرة. و افضل ماركات للفاونديشن: لوريال و برجوا و ريفلون.

الجمعة، 5 فبراير، 2016

مصطلحات المكياج + نصائح عامة للمبتدئات




السلام عليكم حبايبي ❤️ اليوم راح اتكلم عن مصطلحات الميك اب لان اغلبها انجليزية و في بنات ما يعرفوها فا حبيت اوضحها و كمان نصائح عامة للمبتدئات و ان شاء الله بعد كم يوم راح انزل الاساسيات الي راح تحتاجيها 👍🏻

اول شي هدي المصطلحات المستخدمة في الميك اب:

الاثنين، 25 يناير، 2016

الأمومة.... نعمة و تضحية (الجزء الثاني)




السلام عليكم حبايبي ❤️ حاسة من زمان عن التدوين مرة وحشني! حبيت اكمل سلسلة الامومة لان حسيت مرة حبيتوها ❤️ فا راح اكمل معاكم ذكرياتي في بدايتي في الامومة و الي ما شافت الجزء الاول تلاقوا في الرابط تحت
بعد ولادتي الحمدلله طبعا دخلوني الغرفة خلاص ارتاح و نمت زي القتيلة طبعا هههههه كان تعب الله يعلم في و يدوب نمت ٣ ساعات و جابولي ريمان ارضعها و الحلو في الفتيحي مرة يشجعوا الرضاعة الطبيعية و ما يرضوا يدوا الطفل رضاعة الا اذا الام طلبت و يخلوها توقع ان هي الي طالبة و هدا شي حلو صراحة 👍🏻 و طبعا اول مرة ما زبطت و ما عرفت ارضع و هي نامت مسكينة على طول :( بس خليتها معايا بس لاحظتها داك اليوم بس تبكي بكى مو طبيعي و اناديهم اقلهم بنتي فيها شي يقولوا لا مافيها و الا اخليهم يكشفوا عليها و اخدوها و عملوا فحوصات ثانية.