الاثنين، 25 يناير 2016

الأمومة.... نعمة و تضحية (الجزء الثاني)




السلام عليكم حبايبي ❤️ حاسة من زمان عن التدوين مرة وحشني! حبيت اكمل سلسلة الامومة لان حسيت مرة حبيتوها ❤️ فا راح اكمل معاكم ذكرياتي في بدايتي في الامومة و الي ما شافت الجزء الاول تلاقوا في الرابط تحت
بعد ولادتي الحمدلله طبعا دخلوني الغرفة خلاص ارتاح و نمت زي القتيلة طبعا هههههه كان تعب الله يعلم في و يدوب نمت ٣ ساعات و جابولي ريمان ارضعها و الحلو في الفتيحي مرة يشجعوا الرضاعة الطبيعية و ما يرضوا يدوا الطفل رضاعة الا اذا الام طلبت و يخلوها توقع ان هي الي طالبة و هدا شي حلو صراحة 👍🏻 و طبعا اول مرة ما زبطت و ما عرفت ارضع و هي نامت مسكينة على طول :( بس خليتها معايا بس لاحظتها داك اليوم بس تبكي بكى مو طبيعي و اناديهم اقلهم بنتي فيها شي يقولوا لا مافيها و الا اخليهم يكشفوا عليها و اخدوها و عملوا فحوصات ثانية.

طبعا بدات الزيارات و التبريكات و الجوال الي ما سكت و حالة ههههههه. بعدين جابوها ليا بعد كم ساعة و برضها بس تبكي تنام شوية و تبكي في الاخير طلع انو لما سحبوها وقت الولادة انفك كتفها 😢 عشان كدة كانت تتالم منو بس قالو عشان صغيرة راح يلتئم بسرعة خلال اسبوع بس قعدت مسكينة اول ايام و هي بس تبكي يا قلبي من الالم.

رجعت تاني احاول ارضعها طبيعي و مرة ما كنت عارفة و كان في ممرضة معايا توريني بس جاتني خالتي الله يسعدها و قعدت معايا الين خلاص قدرت ارضع الحمدلله و مرة فرحت لان مرة كنت حابة ارضع طبيعي.

تاني يوم كان خلاص الخروج من المستشفى بس قالوا لازم يخلوا ريمان عندهم عشان يعملوا فحوصات زيادة لان كان في احمرار حولين عيونها و خايفين يكون التهاب عشان لما جاتني سخونة و انا في الولادة. و طبعا انا بكى و صياح كيف اخرج من غير ريمان :( و قعدت ابكي و ماما و زوجي يهدوا عليا هههههه و رحت البيت. و قالوا تعالوا خدوها الساعة ١٠ الليل. و على الساعة ١٠ راحوا ماما و زوجي ياخدوها من المستشفى.

بعدها قعدت في جدة اسبوع عشان كان في مراجعة لريمان و بعدها نزلت المدينة. طبعا كان مرة تعب سفر و انا الم الخياطة تعبني بس كنت مواصلة و ريمان نامت طول الطريق الحمدلله و انا ما صدقت نمت عاد انا من النوع الي ادوخ في السيارة فا انام بسرعة خخخخخ. طبعا ريمان جبنالها كرسي سيارة و هدا جدا مهم مرة غلط تحطي الطفل في عبك خاصة في مشاوير طويلة لان ممكن لا سمح الله توقف السيارة فجاة او الطفل ينفلت. فا انا ريمان عودتها من الولادة الين دحين و هي في كرسي سيارة 👍🏻.

طبعا الرضاعة الطبيعية جدا مفيدة للطفل و الام كمان و في امهات ينحفوا مع الولادة انا للاسف لا تخنت منها :( بس برضي كملت و اول اسابيع كنت انام و انا قاعدة ارضع من التعب طبعا لان الرضاعة الطبيعية تتعب الطفل فا تلاقي يدوب يرضع شوية و ينام مو زي الرضاعة اسهل و تشبع اكتر فا الطفل يجوع بسرعة. 

بعد اول اسبوع سارت ريمان ما تنام و طلع نومها خفيف زي بس تصحى بسرعة و ما تنام وصلت لمرحلة قعدت ابكي عشان ماني قادرة انام 😂 بعدين ماما علمتني ارضع و انا مسدوحة سرت اوقات انام او ارتاح شوية و هي ترضع و طبعا قلبي معاها عشان انتبهلها بس بعدها حسيت ارتحت شوية صح كنت اصحى رقبتي متشنجججة بس على الاقل ارتاح شوية.

و عشان الموضوع لا يطول اكملكم المرة الجاية و يارب تكونوا مستمتعين في السلسلة هدي ❤️

Stay Elegant
xoxo

هناك 3 تعليقات:

  1. قشعر بدني...اتذكرت وقت ولادتي...يا رببببييي....سبحان الله اصعب واحلى شعور...الله لا يحرمه لحدا ....الله يجعلها لريمان من الصالحات و يفرحك فيها ❤😘

    ردحذف
    الردود
    1. فعلا والله اصعب و احلى لحظة و الله يرزق كل محرومة يارب و الله يحفظلك اولادك يارب و يرزقك برهم

      حذف
  2. أزال أحد مشرفي المدونة هذا التعليق.

    ردحذف