الجمعة، 5 فبراير 2016

مصطلحات المكياج + نصائح عامة للمبتدئات




السلام عليكم حبايبي ❤️ اليوم راح اتكلم عن مصطلحات الميك اب لان اغلبها انجليزية و في بنات ما يعرفوها فا حبيت اوضحها و كمان نصائح عامة للمبتدئات و ان شاء الله بعد كم يوم راح انزل الاساسيات الي راح تحتاجيها 👍🏻

اول شي هدي المصطلحات المستخدمة في الميك اب:

فاونديشن: اساس (للوجه)
كونسيلر: خافي عيوب (لتحت العين او الجفن)
كوركتر: مصحح (للهالات السودة و التصبغات او الحبوب)
اي شادو: ظل عيون
اي لاينر: كحل سائل لرسم العين
جل لاينر: لرسم العين و يكون جل
اي بنسل: قلم للعين
ليبستيك: روج
ليكود ليبستك: روج سائل
غلوس: روج يكون مالو لون قوي و في لمعة و غالبا يكون سائل و بعضها فيها شيمر
ديوي: لما يكون الاساس تحسي في لمعة او نضارة
مات: مطفي 
شيمر: لمعة
قلتر: لمعة بس تكون اقوى و اوضح من الشيمر و غالبا حبيبات صغيرة
ميتالك: لون يكون شيمر بس تحسي في اكتر من لون مدموجين مع بعض
برايمر: ينحط قبل الفاونديشن و يحضر الوجه للفاونديشن و يساعد انو يخلي مدة اطول. يستخدم كمان للعين عشان يثبت الاي شادو.
بيس: برضو ينحط قبل الفاونديشن و تقريبا نفس فكرة البرايمر بس انو ممكن يقوي لون الاي شادو و لي خصائص زي تصحيح لون البشرة او يرطبها. بس دحين سارت في برايمرز تعمل نفس عمل البيس بس تقريبا هم نفس الشي.
برايمر العين: يثبت الاي شادو و يقوي لونو و يسهل الدمج و بعضها تخفي الخطوط تحت العين.
ليب لاينر: محدد شفايف.
بلاشر: يكون بودرة او كريمي او سائل ينحط على الخدود.
كونتور: نحت الوجه و يكون بلون بني مايل على رمادي و يستخدم لتصغير ملامح في الوجه مثلا الانف او الجبهة و كدة.
برونزر: لون برونزي كريمي او بودرة يعطي دفئ للوجه و ينحط على حدود الوجه.
ماسكرا: الماسكرا هههههه للرموش و الحواجب.
جل الحواجب: ترسمي في الحواجب.
تينتد مويسترايزر: ينفع غالبا للبشرة الجافة يكون مرطب في لون و تغطيتو خفيفة.
بي بي كريم و سي سي كريم: نفس الاساس بس اخف على البشرة و تغطيتو اقل ينفع للنهار او اذا ما تحتاجي تغطية عالية.
كوفرج: تغطية (تستخدم للاساس او الكونسيلر و كدة)
هايلايات: يستخدم لابراز ملامح في الوجه عكس الكونتور
البودرة: تستخدم لتثبيت الفاونديشن و عشان تخلي الفاونديشن مات او اذا بشرتك دهنية تحطي في المناطق الدهنية لاخفاء اللمعة.

ملاحظة: اسفة اذا غفلت عن شي و اذا في حاجة ما كتبتها يا ليت تكتبولي في التعليقات ❤️



نصائح عامة:

١. اول شي اذا حابة تشتري اول مجموعة ميك اب ليكي ابدا لا تشتري هاي ايند! (الماركات الغالية زي ديور و شانيل و اربن ديكي الموجودة في محلات زي وجوه و سيفورا و باريس غاليري) لان اول شي انتي راح تقعدي تتدربي فا ممكن تحتاجي كميات كبيرة او تستخدمي المنتج غلط فا حرام تصرفي مبلغ كبير و تتدربي في. اول شي ابدأي في الدرغستور (زي نيكس و ميبيلين و برجوا الموجودة في سنتربوينت و بوتس و وايتس و غيرها) كدة حتدفعي مبلغ ما يكون مرة كبير. 

٢. لازم تتدربي و تخصصي وقت تقعدي تتدربي في على التكنيك و طرق توزيع الفاونديشن و الكونسيلر كيف تحطي الاي شادو و تدمجي. حاولي كم يوم في الاسبوع اذا ما عندك وقت او يوميا اذا فاضية.

٣. لا تيأسي لا تقولي ما اعرف و تطفشي و تفقدي الامل التدريب يبغالو صبر انا قعدت شهور الين تعلمت احط اي شادو و الين دحين انا متدربة ابدا ماني خبيرة او فنانة. زي مثلا الاي لاينر الين دحين ما اعرف احطو و كل لوكاتي من غير اي لاينر بس برضو بحاول اتعلم.

٤. حاولي تشغلي فيدوهات في اليوتيوب و تطبقي معاهم راح يساعدك كتير خاصة في التكنيك. مو شرط عربي او انجليزي او فرنسي اهم شي تشوفي كيف تدمج كيف تستخدم الفرش.

٥. اعرفي شكل عينك يعني مثلا واسعة، لوزية، مبطنة الخ. و اعرفي ايش يناسبها ميك اب او رسمة عين.

٦. برضو اعرفي شكل وجهك و ايش المناطق الي من جد تحتاج كونتور و ايش المناطق الي ما تحتاج و كيف تحطي البلاشر و الهايلايت فين تحطي.

٧. مافي قواعد معينة للميك اب اهم شي تسوي الي يناسب وجهك و ذوقك. مثلا الفرش مو لازم تستخدمي فرشة البلاشر لبس البلاشر و زي كدة تقدري تستخدميها بالطريقة الي تعجبك و تناسبك حتى اصابعك تقدري تستخدميها عادي! اهم شي الاتقان مو مهم كيف.

٨. لا تخلي احد يحطمك لو حطيتي ميك اب و احد انتقدك لا تيأسي و توقفي بالعكس حاولي اكتر و ما عليكي من احد.

٩. لما تبداي تتدربي ابدي خطوة خطوة ما راح تقدري تتعلمي على كل شي في يوم واحد يعني مثلا اول مرة تعلمي تدمجي الفاونديشن و بعدها تعلمي الكونتور و زي كدة و خدي وقتك لا تتسرعي.

١٠. حاولي كمان تطبقي على احد تاني يعني اختك او صحبتك برضو راح يساعدك تتعلمي.

١١. ابداي اول شي بالمنتجات البودرة لانها اسهل في التطبيق و الدمج و بعدين بالكريمية و بعدي السايلة. مثلا الكونتور اول شي ابداي تعلمي بالبودرة حسيتي انك خلاص اتقنتي و حابة تجري الكريمي جربي وقتها.

١٢. احس اصعب شي في الميك اب الاي لاينر! فا لا تشطحي على طول و تتعلمي اول شي هههههه خلي في الاخيرررر لانو اكتر شي يبغالو اتقان و يد ثابتة.

Stay Elegant
xoxo

ليست هناك تعليقات:

إرسال تعليق