الخميس، 6 أغسطس، 2015

Drops of Youth Bouncy Sleeping Mask


Drops of Youth Bouncy Sleeping Mask




السلام عليكم حبايبي اليوم بتكلم عن ماسك من ذي بودي شوب. هو عبار عن ماسك للوجه تحطي قبل النوم و تنامي في. وصف الماسك:

"يحتوي على الخلايا الجذعية لزهرة ايدل وايس التي تعيش في أعالي جبال الألب و تنمو في ظروف مناخية قاسية، حيث يتم استخراج الخلايا الجذعية منها بعناية فائقة للمحافظة على تركيبتها الفعالة في ترميم و تجديد خلايا البشرة".




الماسك تركيبتو جل على كريم بصراحة تركيبة غريبة اول مرة تمر عليا، تجي معاه زي الملعقة الصغيرة تاخدي فيها الكمية الي تحتاجيها و تحطيها على يدك ، هدي الطريقة تحرص ان الكريم يبقى نظيف عشان لا تجي اي باكتيريا من اليد 👌🏻. بعد ما تحطي على يدك تفركيها شوية و على طول تلاحظي الكريم يدوب و تسوي في مساج للوجه و تدهني على وجهك كامل. طريقة المساج هي موضحة في الفيديو الي تحت:



طريقة سهلة و تحرص ان البشرة كلها تتشرب و يجيها من الكريم و تدي مفعول افضل. اول ما تحطي الكريم راح تحسي مرة يلصق و دبق بس ١٠-١٥ دقيقة تلاقي خلاص البشرة امتصتو و ما تحسي في بس طبعا لازم تاخدي كمية بسيطة لو اخدتي كتير حيسير مرة تقيل.

يناسب البشرة الجافة و الي ناقصها موية، يقولوا ان يناسب جميع انواع البشرات بس احس مفعول الماسك يناسب الجافة و المتعطشة اكتر و راح يستفيدو منو اكتر 👍🏻.

راي في: جدا حبيتو صراحة حسيت بشرتي سار ملمسها انعم من العادة و افضل بكتير من ناحية الترطيب. يعني اول كنت احس في مناطق فيها قشور او جافة و لما بدات في حسيت الفرق من الترطيب مرة رائع. فا اذا بشرتك جافة جدا و محتاجة ترطيب اكتر جربي راح يعجبك 👌🏻.

و تقدري تستخدمي بعد السيرم و تقدري تخلي بدال كريم الليل او تحطي بعد الكريم اذا تحبي انا صراحة سرت استخدمو بدال كريم الليل حقي و احطو و استنى ربع الى نص ساعة و انام.

حبيت اذكر كمان انو اخد جائزة من موقع كزموبولتين الشهير كافضل قناع ليلي 👍🏻

من عيوبو انو دبق شوية اول ما تحطي يعني ما ينفع تحطي و تنامي على طول لازم تستني شوية. كمان سعرو شوية مرتفع بالمقارنة مع منتجات ذي بودي شوب التانية، تقريبا ١٠٤ ريال. بس عشان اكون صريحة كميتو كبيرة مرة و تحتاجي قليل منو دحين ليا شهر استخدمو و لسة ما وصلت النص.

Stay Elegant
xoxo

هناك تعليقان (2):

  1. يناسب البشرة اللي تطلع فيها حبوب من بعض الكريمات ، البشرة الحساسة ؟

    ردحذف
    الردود
    1. بصراحة انا بشرتي ماهي حساسة، و قريت ريفيوز كتير و كم وحدة ذكرت ان بشرتها حساسة و الماسك ناسبها. بس في نفس الوقت الماسك فيلو نسبة عطور فا اذا بشرتك مرة حساسة يمكن ما يناسبك. حاولي تعرفي بشرتك تتحسس من ايش بالزبط هدا راح يساعدك تعرفي الكريمات الي تناسبك و الكريمات الي لا. يعني مثلا في بشرات تتحسس من السيلكون او العطور فا شوفي الكريمات الي حسستك و شوفي مكوناتها و حاولي تعرفي المكونات الي مشتركة بينهم.

      حذف