السلام عليكم حبايبي ❤️ حابة أنزل كل فترة بوستات معنوية شوية ممكن تغير نفسيات بعض البنات او تشجعهم 😍
كتير تجيني رسايل على الخاص من بنات بهذا المحتوى: خشمي مو عاجبني كيف اصغرو، فمي صغير كيف اكبرو، رجلي عريضة ايش اسوي، الخ الخ. غالبا المشكلة يكون سببها عدم ثقة او شفتي خشم ولا عين و لا رجل وحدة و حسيتي انو يا ليت انا كدة! و بعض الاحيان يكون من سخرية بعض الناس او ينتقدوا شي فيها تروح تتأثر و تقتنع بكلامهم.
اول شي مافي احد كامل، الكامل الله فقط. كلنا فينا عيوب و فينا حسنات كلنا فينا خصلة حلوة و خصلة وحشة كلنا فينا ملامح حلوة و ملامح ما اقول وحشة لا ماهي عاجبتك ممكن!
طيب، ليش بس ندور العيوب؟ ليش ما نطالع في المحاسن! يعني مثلا انتي مو عاجبك خشمك شايفتو كبير طالعي في عينك طالعي في فمك قولي لنفسك انا برضو حلوة! انا مو ناقصني شي انا جميلة 😍صدقيني لو كلنا نقتنع بملامحنا الي ربنا خلقنا فيها راح نكون بخير. و ربنا صور الانسان بأحسن صورة لكن للاسف بني ادم طماع.
لازم نقتنع و نثق بنفسنا، لازم نحب نفسنا، لازم نحمد ربنا على النعم الي عندنا. كفاية الحمدلله الصحة و العافية و الامن و الامان و باقي الاشياء مكملات لا اكثر.
في اشياء تقدري تعالجيها بنفسك الي هي مشاكل جلدية زي الحبوب و التصبغات الخ اشتغلي عليها و تقدري تتخلصي منها باذن الله اهم شي المواظبة و العزيمة. جسمك مو عاجبك تقدري تغيري بالرياضة و الحمية الصحية. شعرك مو عاجبك اهتمي في و يتغير.
اما ملامحك ما تقدري تغيريها هدي خلقتك، العمليات التجميلية تغيير في خلقة الله (بتكلم عن تكبير و تصغيير و تغيير الملامح) و اصلا صدقيني ما تحتاجي كل الي تحتاجي ثقة!
لا تخلي كلام الناس ياثر عليكي و ارضاء الناس غاية لا تدرك لا تخلي احد يهز ثقتك بنفسك و يحسسك بنقص.
حبي نفسك ❤️
Stay Elegant
xoxo
ليست هناك تعليقات:
إرسال تعليق