الاثنين، 30 نوفمبر، 2015

كيف تتخلصي من تصبغات الوجه!




السلام عليكم حبايبي ❤️ اسفة على الغيبة الطويلة و المفروض من اول انزل الموضوع هدا بس للاسف مرة انشغلت فا ما قدرت انزل تدوينات:(

و اليوم راح اتكلم عن طريقة التخلص من تصبغات الوجه باذن الله!

اول شي ايش هي التصبغات؟ هي حالة ماهي ضارة للبشرة تكون عبارة عن بقع اغمق من لون بشرتك و يكون سببها ان البشرة تنتج كمية ميلانين كبيرة و تخلي بعض المناطق تسير اغمق زي الكلف و البقع البنية في الوجه و النمش (بس النمش ممكن يكون وراثي انا مثلا عندي نمش وراثي).

ايش سبب التصبغات؟ اسبابو كثيرة من اهمها التعرض للشمس بكثرة من من غير حماية. بعض الاصابات او الجروح تترك اثار تكون اغمق من لون بشرتك. بعض الادوية تسبب تصبغات. تغيير في الهرمونات زي الحمل و حبوب منع الحمل. و بعض الاحيان يكون سببها توتر عاطفي جدا قوي.

زي ما شفنا اسباب التصبغات كثيرة بعضها تكون جدية زي الجروح و الامراض هدي لازم تستشيري فيها طبيب جلدية. و بعض الحالات زي الحمل تروح من حالها بعد ما تنتهي الحالة يعني لما تولدي و برضو ممكن تروح اذا سبب التصبغات دوا او حبوب منع حمل فا لما توقفي الدوا تروح التصبغات.

العلاجات الي راح اتكلم عنها اليوم تناسب الحالات البسيطة او التصبغات العادية و كل الي راح اذكرها دحين علاجات طبيعية و منزلية يعني ان شاء الله اذا ما نفعتك ما تضرك. 

١. البطاطس: خدي شريحة بطاطس و مرريها على المناطق الغامقة بشكل يومي.

٢. الالوي فيرا: الافضل تشتري الالوي فيرا الطازج (الصبار) و تطلعي منو الجل و تحطي في علبة في الثلاجة و يوميا تدهني المنطقة الغامقة و تخلي ٢٠ دقيقة و لنتيجة افضل حطي زيت فيتامين اي او كبسولة في العلبة مع الجل.

٣. عصير الخيار: اعصري خيار و ادهني في المناطق الغامقة.

٤. زيت الخروع و زيت اللوز و زيت الزيتون: من افضل الزيوت لمعالجة التصبغات بس تدهني فيها المناطق يوميا و تقدري تخلطيها مع بعض و كمان زيت فيتامين اي برضو ممتاز.

٥. خل التفاح: حطي شوية بقطنة و ادهني في المناطق الغامقة و تقدري تخففي بشوية موية اذا حسيتي قوي و لازم تجربي اول قبل لا تدهني اذا يحسسك او لا خاصة اذا بشرتك حساسة. و كمان اذا تقدري تشربي تاخدي نص كاسة موية تحطي فيها ملعقة خل تفاح و تشربيها و تقدري تحطي شوية عسل عشان الطعم. و حاولي تاخدي خل التفاح العضوي هو افضل شي.

٦. الكركم: حق البشرة مو الاكل! كتير بنات يلخبطوا و يستخدموا حق الاكل في كركم خاصة للبشرة عند العطارين و في كمان صابونة كركم عند العطارين او الصيدليات.


بعض النصائح السريعة:

١. قشري وجهك مرتين في الاسبوع و الافضل تستخدمي مقشر في احد المكونات retionl - glycolic aci - salicylic acid
٢. ضروري تستخدمي واقي شمس في اقل شي ٣٠ اس بي اف. و لازم تعيدي كل ساعتين او ٣ اذا انتي في اشعة شمس مستمرة.
٣. كريمات التفتيح تساعد على ابطاء عملية انتاج الميلانين بس ما تتخلص من التصبغات فا لا تعتمدي عليها.
٤. خلي العيادات حل اخير لا تستعجلي على طول و تروحي عيادة حاولي في البيت تلتزمي بخطة علاجية تسويها لنفسك و اصبري. 
٥. الالتزاااام اذا تسوي مرة ايوة و عشرة لا ما راح تستفيدي لازم يوميا.
٦. استخدمي كريمات فيها Retin-A او alpha-hydroxy او Glycolic acid لانها من المكونات الي تساعد على التخلص من التصبغات.

للاسف ما اقدر اقلكم اي اسماء كريمات جاهزة لان ما جربت شي شخصيا فا ما ابغى اجبلكم اسماء ممكن تضركم عشان كدة فضلت تكون العلاجات طبيعية 👍🏻.

بعض المراجع:


هناك تعليقان (2):

  1. الله يعطيكي العافية 🌷

    ردحذف
  2. عندما يتعلق الأمر في علاج تصبغات الوجه أو تصبغات الجلد بشكل عام، هناك عدد من الخيارات التي يمكن أن تستفيد منها، مثل العلاجات الموضعية والعلاج بالليزر والعلاجات التجميلية، وكلها مفيدة وفعالة ولكن النتائج تختلف من شخص لآخر، لذا من الضروري استشارة طبيب الامراض الجلدية ليوصي بالعلاج المناسب.

    ردحذف