السلام عليكم حبايبي
اليوم بتكلم عن عنايتي بمنطقة الإبط (اكرمكم الله) خاصة للناس الي بشرتها حساسة زيي. انا بشرتي جافة جدا بس ما كانت حساسة و ما كنت اعاني منها الحمدلله بس دحين ليا فترة بعد ما دخلت الثلاثين بشرتي سارت حساسة فجأة و قالي دكتور سبحان الله عادي البشرات تتغير مع العمر
فجأة سارت تطلعلي زي الحساسية في منطقة الإبط و كانت تحكني مرة و تعبتني و كمان حبوب كثيرة. كنت وقتها استخدم مزيل عرق بيزلين و بعد الاستحمام كنت استخدم خلطة كانت ماما تسويلي هي صراحة استخدمها من سنين و ما قيد سوتلي شي و كتبت عنها زمان في حسابي في الانستقرام
المهم بعدها غيرت كل شي استخدموا و وقفتوا لان ما كنت عارفة ايش السبب و قالي الدكتور اوقف كل شي اسوي و اعطاني اشياء اسويها و انا ضفت اشياء تساعدني كمان و الحمدلله شفت فرق كبير بعد فترة
اول شي اعطاني غسول للبشرة الجافة اغسل في المنطقة يوميا و سرت استخدمو قبل الدوام و بعد ما ارجع و تقدروا تستخدموا اي غسول بس اهم شي يكون طبي زي مثلا ستايفل او كيو في و يكون يرطب لان الجفاف يهيج البشرة برضو و لما كانت بشرتي متحسسة كنت احط غسول في قطنة و امسح المنطقة بشويش و بعدين اغسل بالموية لما راحت الحساسية سرت عادي اغسل المنطقة بيدي بشويش
و ثاني شي سرت استخدم مزيل عرق طبي و في شركات كثير تقدروا تستخدموها زي فيتشي كثير يمدحوا بس ما جربتو صراحة المهم يكون طبي عشان يكون خالي من العطور و هذا المزيل من النهدي خالي من العطور و الكحول و الباربين و خاص للبشرة الحساسة بس صراحة مو يوما استخدموا سرت استخدم مزيل عرق اكثر شي لما يكون دوامي في الليل لان . يكون في مجهود اكثر فا ممكن اعرق و انتو بكرامة مو زي في النهار الدوام خفيف و نادرا يكون في مجهود. اكتب مزيلات العرق التجارية فيها عطور و هدا يسبب تهيج مرة للبشرة خاصة الحساسة و كمان مع الوقت تسبب اسمرار عشان كدة حاولوا مرة تبعدوا عنها
و اخر شي الموس و هدا من اهم الأشياء الي شفت عليها
فرق. اول كنت استخدم الآمواس العادية بس بعدين سرت استخدم امواس فينس و خاصة نوعية اولاي بس عادي تقدروا تستخدموا اي نوعية منها بس اهم شي تكون هدي لان الي لاحظتوا
في ديه الأمواس ان الشعر الله يكرمكم يطلع اخف و أقل مرة عن أول بعد ما بدأت استخدم ديه الامواس و ما يحتاج تحطوا شي عشان يساعدكم في الحلاقة لأن الموس نفسو يطلع مادة زي الصابون
و أخر شي حاولوا انكم لما تخرجوا برة خاصة اذا دوامكم بالعباية زيي أن تلبسوا بلوزة تكون ١٠٠٪ قطن و تكون نص كم بحيث إنها تغطي منطقة الإبط و يكون الكم مو ماسك عشان لا يسبب اي احتكاك مع الحركة
و فعلا لما بدأت اسوي كدة حسيت براحة و ما سرت اتحسس زي أول و كمان لاحظت المنطقة فتحت عن قبل. و ان شاء الله تستفيدوا من الطريقة ديه
Stay Elegant
XOXO
ليست هناك تعليقات:
إرسال تعليق