الخميس، 30 أكتوبر 2014

كلاريسونيك ميا ٢

كليراسونيك ميا ٢




حبيب الملاين هو جهاز لتنضيف البشرة من الشوائب زي المكياج و الغبار و الزيوت و تنضيفو احسن بستة مرات من التنضيف العادي باليد يخلي الوجه انضف و اكتر نضارة و يخلي البشرة مستعدة اكتر لامتصاص المرطبات من اول مرة حتشوفي الفرق!

تجربتي: استخدمتوا مرتين الين دحين مع غسول كلين اند كلير و من اول مرة من جد حسيت الفرق! حسيت كانو طبقة كاملة من وجهي انشالت (بيضت لول) و حسيتو اكتر نضارة و انعم قعدت ايام و انا مبسوطة بوجهي كيف ناعم و اكتر صحة.

الفرق بين ميا ١ و ميا٢؟ 
ابدا فرقين بس اول شي ميا ٢ في مؤقت لان الجهاز يشتغل لمدة دقيقة و يطفي و المفروض كل منطقة ليها عدد معين من الثواني. الجبهة ٢٠ ثانية، كل خد ١٠ ثواني، الدقن و الانف ٢٠ ثانية. فا ميا ٢ يوقت عدد الثواني يعني تبداي في جبهتك يوقت ٢٠ بعدين يعمل زي الاهتزاز و الصوت عشان تنتقلي للمنطقة التانية. و الفرق التاني انو في سرعتين، سرعة واطية للبشرة الحساسة و سرعة اسرع للبشرات التانية. فا اذا انتي بشرتك عادية و مستعدة توقتي لنفسك و تبغي توفري فلوس احسنلك خدي ميا ١. في كمام كليراسونيك بلس و اريا للجسم و الوجه.

الفتح من العلبة: 
العلبة يجي فيها الجهاز و علبة حفظ للسفر و غسول للوجه (ما استخدمتو والله في بنات قالو مو قد كدة بس خليتو للطوارئ) و الشاحن و دفتر التعليمات. اول مرة لازم تشحني لمدة ٢٤ ساعة قبل الاستخدام. تشبكي في الشاحن (تراه مغنطيسي لا تدورو فتحات خخخخخ) و اول ما تشبكي حتلاقي المنطقة حولين الازرار تنور و تطفي معناه يشحن و لما خلاص يسير نور مستمر معناها شحنت و كمان اول ما تفصلي من الشاحن اذا اداكي هزة وحدة معناها لسة ما شحن اذا هزتين معناه شحن خلاص. 

طريقة الاستخدام:
اول شي بللي وجهك بموية و بعدين حطي الغسول على وجهك او الفرشة انا حسيت احسن تحطي على وجهك عشان يوصل لكل المناطق. و يفضل اول مرة تستخدمي السرعة الواطية بعدين تزيديها تدريجيا. و عشان تغيري السرعة تضعطي على زر السرعة مرة و الجهاز شغال، لما يكون النور تحت معناه السرعة واطية و لما يكون فوق معناه السرعة عالية و لما تلاقي كلو ينور معناها يبغالو الجهاز شحن و يفضل كل مرة تشحني ١٨ ساعة لما يخلص شحنو. بعدين تبدأي تحركي الجهاز بشكل دائري على وجهك تبدأي بجيهتك و تنزلي على خدودك و كدة و انتبهي للتوقيت لان الجهاز يطفي بعد دقيقة. و الجهاز المشحون كامل يديكي ٢٤ استخدام يعني ٢٤ دقيقة.

مشاكل؟ 
في بنات قالوا انو طلعتلهم حبوب بعد اول استخدام لان الجهاز يطلع اعماق الاوساخ فا يطلع للسطح على شكل حبوب. بس استمروا على الجهاز و تختفي ان شاء الله.

من فين و بكم؟
تلاقو في سيفورا او تقدرو تطلبوا اونلاين او من تاجرات (بس تاكدوا انها تبيع اصلي مدري في تقليد ولا لا بس في اجهزة تانية للتنضيف بس هدا احسن و افضل شي) 

ميا ١ ٣٠٠ و شي
ميا ٢ ٧١٧-٧٤٠ ناسية كم بالزبط من سيفورا
بلس ؟؟؟
اريا ١١٠٠ في سيفورا

ليست هناك تعليقات:

إرسال تعليق