السبت، 1 نوفمبر، 2014

كيف تتطوري لغتك الإنجليزية







سلام حبايبي ❤️ كتير من البنات الجميلات يسألو كيف طورت لغتي و كيف يقدروا يطوروا لغتهم كمان و حابة اشاركم كيف و اديكم نصائح تساعدكم تطوروها 👍. اول شي انا لغتي ماهي بيرفكت ابدا و لا ادعي اني فلتة في الانجليزي. انا جاني حب للانجليزي من يوم و انا صغيرة ماما الله يخليها لنا مدرسة انجليزي و كنت ابغى اسير زيها كنت احب اخد دفاتر التلوين الي فيها قصة بالانجليزي و كنت انسخ الكلام الانجليزي نسخ ما كنت اعرف اقرا لسة بس كنت اقلد شكل الكلام. و بعدين في المتوسط تقريبا بدات اشوف مسلسلات و افلام اجنبية و كنت اتابعها بشغف طبعا كنت اشوفها بصوت عالي عشان اسمعهم و اقرا الترجمة و اعرف الكلمات و ايش معناها. و كنت كل ما اشوف كلام انجليزي في اي مكان دوا، دفتر تعليمات، كتاب اي شي كنت احاول اقراه و اي كلمة ما اعرفها على طول اطلعها من القاموس و احفظ معناها. بعدين شوية شوية بدات اخش في منتديات اجنبية للانمي و مرة كنت اعشق الانمي و كنت بعض الاحيان اشوف انمي مترجم انجليزي (طبعا الانمي ياباني) فا كنت كل شوي اوقف و اطلع معنى كلمة ما عرفتها من القاموس. بعدين سرت احاول ابدا اكتب انجليزي و اشارك في المنتديات و شوية شوية بدا تتحسن لغتي و الاملاء بس طبعا القرامر (القواعد) انسي كان عندي اغلاط و ما زال عندي اغلاط قرامر بس كان اهم شي اني ادرب نفسي على الانجليزي و بعدين بدأ حبي لالعاب الاونلاين الماضي حقي جدا جميل طبعا كان كلو انجليزي و كنت انبسط عشان اهرج انجليزي مع اجانب و حتى كانو هم يصححوا املائي الين تحسنت كتيرررر في الاملاء. بدات كمان احاول اكبر مخزوني الاملائي و اعرف المصطلحات الطبية و القانونية و زي كدة و كنت اشوف برامج الطبية الاجنبية زي دكتور اوز و ذا دوكترز كانت تجي في ام بي سي ٤ كنت مرة احب اتابعها عشان اعرف المصطلحات القانونية و كمان كان يجي برنامج حق محاكم اسمو جدج جودي (القاضية جودي) كان شي قدييييم بس كنت احب اتعرف على المصطلحات القانوية. طبعا في الجامعة تخصصت انجليزي اول شي دخلت جامعة طيبة و درست تقريبا سنتين بس صراحة للاسف الدراسة في طيبة ما حبيتها ما حسيت اني استفدت كتير و وقتها بدات اجيب روايات انجليزية و اقراها و كان القاموس ما يفارقني اول كلمة تقابلني ما اعرفها على طول اشوف معناها. بعدها ربي كتبلي الزواج و رحت مع زوجي ابتعاث و درست لغة في كلية تابعة لجامعة لندن لمدة ترمين و هدا الي مرة ساعدني من ناحية التحدث دراستهم جدا جميلة و عن سنين في جامعاتنا للاسف و حاليا انا تخصصي انجليزي انتساب في جامعة الملك عبد العزيز. و هدي قصتي في البوست الي بعد داه حذكرلك نصايح تساعدك تتطوري لغتك.

نجي دحين لكيف تطوري لغتك بعد ما قريتو قصة حياتي هههههه دحين بقلكم عن نصايح تساعدك:

١. اول نصيحة كان يقولوها لينا المدرسين في لندن مو شرط تهرجي صح اهم شي توصلي فكرتك صح يعني انتي تبغي تكتبي انجليزي او تهرجي مو شرط تحاولي تحرصي على القرامر او القواعد! اهم شي توصلي معلومتك صح و الطرف التاني يفهمك 👍 بس طبعا لما تكتبي شي اكاديمي لازم تحرصي عليها.

٢. حاولي تقري! مو شرط كتاب معقد او طويل دوري اشياء بسيطة في بعض الكتب تلاقي فيها صفحة انجليزي و قدامها ترجمة عربي تساعدك مرة حاولي تقري الانجليزي اول و شوفي ايش فهمتي بعدين اقري الجهة العربية تلاقوها في جرير و العبيكان و مكتبات الكتب. و خلي دايما القاموس جنبك اي كلمة ما تعرفيها طلعيها و احفظي معناها.

٣. حاولي تشوفي فيلم او مسلسل او حتى برامج اجنبية مترجمة عربي مرة حتساعدك و ركزي في كلامهم و انتي بتقري الترجمة عشان تفهمي المصطلحات.

٤. حاولي تمارسي لغتك قد ما تقدري اي شخص تقابلي في محل او مطعم او شي يهرج انجليزي حاولي تكلمي انجليزي.

٥. دوري كتب شرح القواعد الانجليزية و يكون مبسط و سهل عشان تدربي نفسك شوية شوية على القواعد.

٦. بما ان اغلبكم يحبوا التجميل شوفوا مقاطع في اليوتيوب اجنبية و في يوتيوبرز عرب يسووا فيديو و يترجمو انجليزي مثل حبيبة قلبي @reni_sakuragirl  و كمان العسل @heyitszeea تسوي فيديو انجليزي و نسخة عربية فا ممكن تشوفوا الانجليزية اول و بعدين تشوفوا العربي و تشوفي كيف فهمك انتي للانجليزي و كمان هي عاملة فيديو عن نصائح لتطوير اللغة شوفوا مرة جميل شوفوا حساباتهم في الانستقرام.

٧. هدي طريقة كنت اسويها بعض الاحيان لما اطفش افتح القاموس على اي صفحة و اقرا الكلمات الي قدامي و اشوف معانيها برضو ساعدتني كتير.

٨. حاولي لما تكوني طفشانة كمان تكتبي اي شي بالانجليزي افتحي جوالك على الملاحظات و اقعدي اكتبي اي شي في بالك و افتحي خاصية التصحيح الاملائي بالجوال عشان يطلعلك اذا غلطتي برضو ممتاز.

٩.في بعض الحسابات في الانستقرام برضو يعطوا دروس في اللغة الانجليزية برضو ممتازة تلاقوها في البوست هدا في حسابي في الانستقرام ❤️.

و هدي الكتابين مرة ممتازة عشان تساعدك تتعلمي ❤️


ليست هناك تعليقات:

إرسال تعليق