الأحد، 2 نوفمبر، 2014

٥ فيتامينات لبشرة جميلة




سلام حبايبي ❤️ اليوم ابغى اتكلم عن موضوع مرة مهم و يفيدك عشان تحسني بشرتك ان شاء الله. هي خمسة فيتامينات اساسية لتغذية و ترطيب البشرة و تساعدك على التخلص من بعض مشاكل البشرات ان شاء الله. 




١. فيتامين أ: افضل شي لمحاربة التجاعيد، البقع البنية الي سببها التقدم بالعمر و خشونة البشرة الي برضو من مشاكل التقدم بالعمر. هدي الي تحارب المشاكل اسمها الرتينوئيدات و هي من مشتقات فيتامين أ تكون موجودة في كتير من الكريمات الليلية و بعض الكريمات الطبية او اللوشنات الي تنباع في كل مكان. بس هدي الرتينوئيدات ما تعمل عملها الا في الليل لان الشمس توقف من عملها. و كمان من فوائدو انو يعيد بناء الانسجة المتضررة في البشرة زي حب الشباب، البثور، الجروح و غيرها. الكريمات الطبية الي من الطبيب تتاخد هي احسن و اضمن شي. بس كمبتدأة او جديدة على هدي الكريمات ممكن تبدأي بالكريمات العادية الي في كل مكان و موجود فيها فيتامين أ بس نتيجتها حتبان على مدى طويل مو زي الطبية او الي من الطبيب نفسو الي تبان نتيجتها في خلال ٤-٨ اسابيع. من عيوبها انها ممكن تسبب في البداية تهيج و احمرار تقشر البشرة الي ممكن يقعد لاسبوع و اكتر. عشان تتفادي هي الاعراض حاولي في البداية تستخدمي الكريم كل كم يوم يعني اول شي كل تلاتة ايام بعدين تدريجي خلي يومين و زي كدة. تقريبا تحتاجي كمية قليلة منو يعني بحجم حبة البازلياء تكفي.

أطعمة فيها فيتامين أ: البطاطا الحلوة، الجزر، الخضروات الخضرا الغامقة زي البروكلي، القرع، الخي الروماني، المشمش المجفف، الخربز، الفلفل الحلو، التونة، الفواكه الاستوائية، الحليب، البيض، الكبدة.




٢. فيتامين ب٣: مرة مفيد للبشرة الجافة و الحساسة لان يساعد في تخفيف الاحمرار و الجفاف و يرطبها و كمان يساعد في علاج البقع الغامقة في البشرة الي سببها اشعة الشمس. تتواجد في اللوشن و الكريمات و السيرم و غالبا يكون مكتوب عليها niacinamide. عشان احسن نتيجة يفضل تستخدميها ليل و نهار و كمان تنفع عشان تخففي اعراض او اثار التهيج من الرتينوئيدات الي تكلمنا عنها قبل انك تخلطيهم مع بعض و تحطيهم و برضو حيدي نتيجة افضل لمحاربة التجاعيد لأنو يساعد على تحسين مظهر البشرة المتقدمة بالعمر.

أطعمة فيها فيتامين ب٣: السمك، الدجاج و الديك الرومي، الكبدة، اللوز، لحم البقر، الفطر، البازلاء، حبوب تباع الشمس، أفوكادو.





٣. فيتامين ج: مضاد للأكسدة يساعد على تنعيم و يشد البشرة و كمان يساعد على علاج البقع البنية و التجاعيد و ارتخاء البشرة من التقدم بالعمر و كمان يساعد البشرة على انتاج الكولاجين. و كمان يساعد على علاج تغير لون البشرة من الشمس و يساعد البشرة على اصلاح نفسها. تقريبا فوائدو قريبة من فيتامين أ و اذا استخدمتي الاتنين يديكي نتائج افضل بكتير. في كريمات كتيرة فيها فيتامين ج بي احرصي ان يكون نسبة الفيتامين ٥٪ و اكتر.

اطعمة فيها فيتامين ج: الفلفل الحلو، الجوافة، الخضروات الخضرا الورقية، الكيوي، البروكلي، الفراولة، الفواكه الحمضية، الطماطم، البازاليا، البابايا.




٤. فيتامين هـ: من افضل الفيتامينات للترطيب و مضاد للأكسدة كمان فا مرة كويس للبشرة الجاف. و كمان يحمي البشرة من الاحمرار و الانتفاخ و الجفاف الي ينتج من التعرض لاشعة اليو ڤي في الشمس لانو مضاد للاللتهاب. و برضو يساعد على علاج السترتش ماركس و يساعد في اصلاح الانسجة التالفة. موجود في كريمات كتيرة برضو و يفضل اذا تبغي تشتري كريم محارب للتجاعبد يكون في فيتامين هـ اقل شي ١٪. 

أطعمة فيها فيتامين هـ: التوفو، السبانخ، المكسرات، حبوب تباع الشمس، افكادو، قمبري، السمك، الزيوت النباتية، البروكلي، القرع.





٥. فيتامين ك: للهالات السودا، الي يسبب الهالات هي صعف الشعيرات الدموية تحت العين الي تخلي الدم يطلع تحت البشرة و يسبب هالات سودة و الفيتوناديون الموجود في فيتامين ك يساعد على السيطرة على تجلط الدم تحت العين. في دراسة ذكرت اذا استخدمتي يوميا يساعد على تخفيفها خلال شهر و يفضل تستخدمي كريم فيلو الرتينوئيدات و فيتامين ك لأن الرتينوئيدات تحسن من عمل الفيتامين.

أطعمة فيها فيتامين ك: الأعشاب، الخضروات الورقية الخضراء، خضروات السلطة زي البصل الأخضر، الخس، بودرة التشيلي او البهارات الحارة، الهليون، المخلل، حبوب الصويا، زيت الزيتون، الفواكه المجففة.

هناك تعليق واحد:

  1. معلومات جميلة استفدت كثير وان شاءاللهً قريب تصير عندي مدونه ♥︎ بالتوفيق ي قمر

    ردحذف