سلام حبايبي اكتر تاني موضوع انطلب مني موضوع الرقية الغامقة كان بعد الركب و الاكواع فا حبيت اتكلم عمو بما ان بنات كتير يعانو منو طبعا اول شي ليها اسباب كتيرر منها: التقدم بالعمر، التعرض لاشعة الشمس، فقدان الوزن المفاجىء و زيادة الوزن المفاجىء، السكر، وراثي او جيني، متلازمة المبيض المتعدد الكيسات، عدم اهتمام بالمنطقة. نجي للحلول و جبتلكم مجموعة حلو تجربوها و طبيعية و تقدري تسويها في البيت و انا صراحة ما اعترف بكريمات التبيض و التسويد ديه احسها كدبة و هدي مجموعة طرق.
١. اللوز المر: فيلو مجموعة فيتامينات تفتح و تغذي البشرة و تشيل التصبغات و تقدري تستخدمي بكذا طريقة. ممكن تسخني زيت لوز مر على النار شوي الين يدفى و تخلي يبرد شوية بعدين تقعد تمسجي رقبتك في فترة راح ينشط الدورة الدموية و يفتحها ان شاء الله و مرة في الشهر كويس. ممكن كمام تسوي خليط من نص ملعقة شاي لوز مر مطحون و ملعقة شاي حليب بودرة و ملعقة شاي عسل و تخلطيهم الين يسيروا زي المعجون و تدهني رقبتك فيها و تخلي نص ساعة و بعديم تغسلي و سويها من مرتين لاربعة مرات اسبوعياً. اخر طريقة ممكن تنقعي ٤ او ٥ حبات لوز مر في موية و تخلي الين تاني يوم و بعدين اطحني الين يسير زي المعجون و حطي على رقبتك و قشريها بشويش و بعدين غسلي بموية باردة.
٢. الجوز: فيلو فيتامينات و زنك تغذي البشرة. و يساعد البشرة انها تقعد مرطبة و هدا مرة مهم. طريقتو انك تخلطي الجوز مع لبن و تسوي منو مقشر. اول شي تطحني جوز بس مو مرة انو يسير بودرة لا خلي مجروش شوية و بعدين اخلطي مع لبن زبادي الين يسير زي المعجون و ادهني على المناطق الغامقة في رقبتك و اقعدي ادعكي بشوي و قشري رقبتك و بعدين خلي الين ينشف و غسلي بموية باردة او موية ورد. اذا استمريتي عليه مرتين في الاسبوع ان شاء الله حتشوفي الفرق حيقلل السمار و يجدد رقبتك.
٣. الخيار: فيلو خواص مهدئة و تساعد انها تصلح الخلايا المتضررة في الرقبة و تشيل الميتة و تضيف بريق للبشرة. طريقتو، حطي خيار مطحون او عصير الخيار على رقبتك و اقعدي مسجيها لمدة عشرة دقايق و بعدين غسليها بموية الور او موية عادية و كرريها يومياً. و في طريقة تانية انك تخلطي عصير ليمون مع عصير خيار و تدهني رقبتك بقطنة و تخلي ١٠ دقايق بعدين تغسلي موية باردة و برضو سوي يومياً.
٤. الليمون: تكلمت عنو قبل في موضوع الركب و الاكواع ان في خواص مبيضة. طريقتو تدهني عصير ليمون على رقبتك و اذا بشرتك حساسة خففي بموية و خلي لمدة ٢٠ دقيقة. بعدين غسلي بموية باردة و احرصي انك ما تعرضي رقبتك للشمس بعد ما تحطي الليمون. و ممكم تخلطي موية ورد مع عصير ليمون بكمية متساوية و تدهني رقبتك قبل ما تنامي و سوي يوميا و اذا استمريتي حتشوفي نتيجة واضحة خلال شهر ان شاء الله.
و اتمنى انكم استفدتو من الموضوع ❤️
ليست هناك تعليقات:
إرسال تعليق