الثلاثاء، 18 نوفمبر، 2014

الأندرتون (الجزء الأول)



سلام حبايبي اليوم حابة اتكلم عن الاندرتون ايش هي الاندرتون؟ كيف تعرفي الاندرتون تبعك؟ ايش يناسبك من الوان، ارواج، فاونديشن، كونسيلر؟ كلها حنتكلم عنها ان شاء الله :) 



 ايش هي الاندرتون؟

كل وحدة فينا ليها لون بشرة خارجي و لون بشرة داخلي (الاندرتون) لون البشرة الخارجي الي هو فاتحة، متوسطة، سمرة الخ و الاندرتون هي لون البشرة الي تحت اللون الخارجي. و هي ديه الالوان

باردة
١. لونك غالبا يكون فاتح مرة او عاجي او مرة غامق و مايل للون الوردي للفاتحة او الازرق للغامقة.
٢. تاخدي وقت طويل عشان تتشمسي و ممكن تنحرقي من الشمس قبل.
٣. خدودك فيها احمرار طبيعي خاصة اذا بذلتي مجهود .


دافئة

١. بشرتك مايلة للون الاصفر او الخوخي.
٢. بسهولة تقدري تعملي تان و مو بسهولة تنحرقي في الشمس.  


محايدة او زيتونية

١. بشرتك مايلة للبني الدهبي.
٢. تقدري تعملي تان بسهولة. 


ليش لازم نعرف الاندرتون تبعنا؟

الاندرتون مرة مهم لمعرفة اشياء كتيرة. مثلا قيد مرة اشتريتي نوعين فاونديشن مختلفة بس نفس لون بشرتك و الاتنين نفس الدرجة بس واحد ناسبك و واحد لا؟ لان واحد ناسب الاندرتون تبعك و التاني لا.
حتى لما تختاري الوان الميك اب حقك في الوان تناسب الاندرتون تبعك و الوان لا. و كمان في المجوهرات ايش يناسبك اكتر فضي ولا ذهبي. كل ديه المعلومات تنحكم بالاندرتون تبعك.


كيف نعرف الاندرتون تبعنا؟

في كم اختبار يساعدك تعرفي الاندرتون حقك مثل:

١. اختبار العروق:



مدي يدك و طالعي في عروقك و افضل يكون نور طبيعي او قوي. و شوفي لونها اذا لقيتي لونها على ازرق او موف معناه انتي كول (باردة) اندرتون اذا لقيتي لونها على اخضر او بني (زيتوني) انتي وارم (دافئة) اندرتون . و اذا خليط ازرق و اخضر انتي محايدة.


٢. اختبار القماش الابيض:



اقعدي في ضوء طبيعي و تكوني لازم منضفة وجهك كويس قبل و لمي شعرك على ورى و حطي منشفة او قماش ابيض (الابيض العاجي) على كتفك و رقبتك، طالعي في وجهك اذا حسيتي لونو مايل للأصفر انتي دافئة و اذا حسيتي مايل للأزرق انتي باردة. اذا ما حسيتي مايل للونين ديه انتي محايدة.

٣. اختبار المجوهرات الفضية/الدهبية:



اذا حسيتي المجوهرات الفضية احلى عليكي انتي باردة. اذا حسيتي الدهبي احلى انتي دافئة. و اذا الاتنين انتي محايدة.


ايش الألوان الي تناسب الاندرتون تبعك؟


الألوان اليمين تناسب الاندرتون الباردة و اليسار الدافئة. فايدتها انها تبرز جمال بشرتك و يطلع شكلك احلى فيها و ما تخلي فيكي شحوب زي لو لبستي لون ما يناسبك. طبعا ممكن انك تلبسي لون من الاندرتون المعاكس ليكي بس ما يكون في الجزء العلوي قريب من وجهك يعني مثلا كبنطلون او تنورة.

اختيار الفاونديشن المناسب؟



اول شي قبل ما تشتري فاونديشن افضل مكان انك تجربي في هو في عضمة الفك تحت الخد زي الصورة فوق.

للبنات الي الاندرتون تبعهم باردة ياخدو فاونديشن يكون لونو على بمبي او ازرق. لكن اذا وجهك مرة باين في اللون البمبي ما ينفع تاخدي فاونديشن بمبي لان راح يطلع مو طبيعي و ما راح يناسب لون رقبتك فا احسن تاخدي فاونديشن مايل للأصفر بشي بسيط مو مرة! عشان توانزي لون رقبتك مع وجهك.

و بالنسبة للاندرتون الدافئة تاخدو فاونديشن مايل للأصفر.

 افضل مجموعة فاونديشن فيها تشكيلة للاندرتون المختلفة هي ماك و لوريال ترو ماتش. او دورو على حرف سي بالانجليزي للباردة و دبليو بالانجليزي للدافئة. لكن ماك مسوين الدرجات الي فيها (سي) للباردة و (دبليو) للدافئة مدري ليش عاكسين او حاولوا تدوروا على الكلمات هدي الي تحت في وصف الفانوديشن او درجتو:


في الجزء التاني راح اتكلم عن باقي المعلومات لان حسيت الموضوع دسم شوية و يبغالو تركيز خخخخ فا ما ابغى احط معلومات ورى بعض عشام لا تتلخبطوا.

ملاحظة: انا ما تكلمت عن المحايدة لان يناسبها اغلب الاشياء بس لازم تراعي لون بشرتك في اختيار الالوان و هدا حيكون موضوع لحالو ان شاء الله.

هناك تعليق واحد:

  1. رووووعةةةة وانتظر الجزءءءء الثاني ع جمر
    ربي يوفقك ♥︎ ♥︎

    ردحذف