الثلاثاء، 11 نوفمبر، 2014

التان و الفيك تان





سلام حبايبي اليوم ابغى اتكلم عن موضوع التان. اول شي انا مو من الناس الي تعمل تان لان ما ينفعلي مع النمش و احسو مو حلو معاه بس مرة يعجبني على بعض البنات الي تسوي تان حلو برونزي مو الي تحرق نفسها و تقول تان المهم هدي بعض النصائح.

١. لازم اهم شي واقي الشمس! و لازم يكون اقل شي في اس بي اف (عناصر وقاية من الشمس) ١٠-١٥ و تحطو على كل جزء مكشوف من جسمكم.

٢. كمان تحتاجو نظارة شمسية فيها حماية من الأشعة البنفسجية لا تستخدمو اي نوع عشان لا تعدمو عيونكم.

٣. خلو معاكم دايما شي يبرد على جسمكم زي البخاخ يكون موية حطيت كم نوع فوق و ممكن تستخدمو بخاخ موية ورد بس اهم شي يكون بارد.

٤. اشربو موية كتير!

٥. لا تقعدو في الشمس بين ١١ و ٣ لان هدا الوقت الشمس تكون اقوى شي.

٦. لازم تحمو شفايفكم كمان جيبو مرطب شفايف فيلو اس بي اف.

٧. احسن انكم تعملوا تقشير لجسمكم و وجهكم قبل التان عشان تشيلوا الجلد الميت لان الصحي يمسك في التان اكتر و ممكن الجلد الميت يتقشر بعد التان.

٨. بعد ما تخلصوا خدوا شاور و دعكو جسمكم و شيلوا كلو الواقي من الشمس و حطو مرطب على جسمكم.

في الاخير بنات نصحية من اخت تحبكم لا تكترو تعملوا تان لان مرة مضر و من الأسباب الرئيسة لسرطان الجلد الله يكفينا شرو جميعا فا اذا انتو من النوع الي مرة تحبو التان حاولوا تسووا فيك تان او التان المزيف الي حتكلم عنو دحين.






الفيك تان او المزيف هو لما تحطي لوشن او كريم و يديكي لون برونزي. غالبا طريقتها انو تدهني على جسمك و وجهك و تنامي في و لما تصحي تغسلي و يديكي لون برونزي جميل. بس يختلف من منتج لتاني و هدي لستة افضل منتجات لتان.

1. Clarnis self tanning instant gel.
2. Lancôme flash bronzer 
3. James Read sleep mask.
4. Clinque self sun body tinted lotion.
5. Gariner Amber solaire no streaks bronzer self-tanning mousse
6. Clarins instant smooth self tanning.
7. Rimmel sunshimmer instant tan water resistant 

و في غيرها منتجات بس هدي افضل شي. 

ليست هناك تعليقات:

إرسال تعليق