الثلاثاء، 11 نوفمبر، 2014

حلول لمشكلة سواد الركب و الأكواع


سلام بنات اليوم أبغى اتكلم عن موضوع انطلب مني كتيررررررر بس كنت بحاول أزبطوا كويس ليكم مشكلة الأكواع و الركب السودة طبعا هدي مشكلة يعانو منها كتير بنات و ليها أسباب كتير منها التعرض للشمس، تراكم الجلد الميت فوق المفاصل و عدم ترطيبها و ازالة الجلد الميت أول بأول و كمان الاحتكاك زي لما تقعدي على الأرض او وقت الصلاة في السجود كلها تسبب ديه المشكلة و دحين بقلكم على حلول اغلبها طبيعية تساعدكم ان شاء الله.


١. استخدام الليمون! كتير يستخدموها بس في منهم ما تنفع معاهم عشان ما استخدموها صح لأن الليمون في حامض الستريك الي في خواص مبيضة. الطريقة هي اول شي الليمون يكون الاصفر الكبير مرة مو الصغير الاخضر و تقسمي بالنص و تعصري شوية من الليمونة مو كلها و بعدين تفركيها في الكوع و الركب و تشيلي اللب الزايد بس اللب! تشيلي بيدك او ممكن تخيلي بس المهم عصير الليمون تخلي على كوعك بالقليل ٣ ساعات و بعدين تغسلي بموية دافية و رطبي المنطقة بعد ما تغسلي و كرري هدي الطريقة يومياً الين تحسي المنطقة فتحت. اذا حسيتي ان الليمون مرة يلسع و يحرقك بقوة معناها المنطقة مرة جاااااافة عشان كدة حاولي قبل ما تستخدمي الليمون بيوم ترطبي المنطقة كويس قبل النوم.

٢. طريقة تانية هي استخدام بيكنغ سودا اعتقد بالعربي اسمها بيكربونات الصوديوم و الحليب لأن الحليب فيها حمض اللبنيك الي يخفف من لون البشرة الاسود و البيكنغ سودا تساعد على تقشير الجلد الميت. اخلطي الحليب و البيكربونات مع بعض الين تسير زي المعجون و حطي على ركبك او اكواعك و اقعدي قشريها بطريقة دائرية و كرري العملية الين تحسي اللون بدأ يفتح.

٣. اللبن و الخل فيهم حمض اللبنيك و حمض الخليك و الاتنين يساعدو على التفتيح. اخلطي ملعقة شاي من اللبن و ملعقة شاي من الخل الأبيض و اخلطيهم الين يسيروا زي المعجون و حطي على الاكواع او الركب و بشكل دائري ادهني المنطقة و خلي لمدة ٢٠ دقيقة بعدين غسليها و رطبي المنطقة.

٤. ليمون و لبن اول شي غسلي المناطق كويس و بعدين اخلطي لبن مع ليمون و حطي شوية موية استخدمي فرشة او بيدك و حطي الخليط على المناطق و خلي لمدة ١٠-٢٠ دقيقة الين تحسي نشف شوية و غسليها و بعدين رطبيها.

٥. التقشيررررر جداً مهم لازم مرة الى مرتين اسبوعيا تقشري الاكواع و الركب و جسمك كلو و مو اكتر من مرتين و كمان ما تقشري بقوة او تدعكي بقوة لان كترة و قوة التقشير ممكن تغمق المناطق زيادة كمان! 

٦. استخدمي كركم مع حليب مع عسل الكركم يعتبر مطهر و العسل يرطب و يطهر المنطقة برضو. اخلطيهم مع بعض و حطيهم على المناطق و خلي لمدة ٢٠ دقيقة بعدين غسلي يدك و اقعدي ادعكي المناطق بشكل دائري لمدة دقيقتين لكل منطقة بعدين غسلي.

٧. التررررطيب برضو مهم دايما احرصي على ترطيب المناطق كل ما تستمحي و قبل النوم لازم ترطبي. أفضل المرطبات الي تحتوي زبدة الشيا و زيت الجوجوبا و زيت الزيتون تساعد على التفتيح و كمان زيت جوز الهند لوحدو او زبدة الشيا الخام برضها افضل شي للتفتيح و حاولي تغطي المنطقة بعد ما تدهني عشان ما يروح الكريم او قبل ما تنامي بنص ساعة بالقليل عشان الكريم لا يتمسح في السرير و يروح.

٨. لما تصلي حاولي تستخدمي سجاجيد الصلاة المبطنة الي تكون قطنية و ناعمة لان سجاجيد الصلاة الخشنة تخشنلك ركبك و اكواعك مع الاحتكاك و كمان لما تقعدي على الارض حاولي تحطي شي تحت ركبك مخدة او سجادة مبطنة.

٩. ليمون و عسل اخلطي ملعقة شاي من العسل مع عصير ليمونة وحدة و حطي على المناطقة و خلي لمدة ٢٠ دقيقة بعدين غسليها و حاولي تكرري هدي الطريقة ٣ مرات بالاسبوع على الاقل.

١٠. زيت الزيتون في خواص مبيضة و كمان يرطب المنطقة ادهنيها يوميا و اقعدي مسجي لمدة ١٠ دقايق عشان يمتصوا كويس.

١١. اخر نقطة اذا المناطق هدي تتعرض للشمس ضروري تحطي عليها واقي شمس لان الشمس تسود المناطق زيادة.

اتمنى تستفيدوا من الموضوع و تساعدكم ❤️

ليست هناك تعليقات:

إرسال تعليق