الجمعة، 5 ديسمبر، 2014

تجربتي مع امبولات دوڤ لتساقط الشعر


سلام حبايبي ❤️ اليوم ابغى اتكلم عن تجربتي مع امبولات دوڤ لتساقط الشعر. هي عبارة عن ٧ امبولات تستخدميها كل يومين و توقف التساقط و خلال اسبوعين المفروض تشوفي ان التساقط خف بسكل ملحوظ زي ماهو مكتوب.



طريقة الاستخدام:

اول شي لازم شعرك يكون مبلول و نضيف يعني بعد الاستحمام. تاخدي الامبولة و من فوق حيكون زي القطعة البلاستيك الصغيرة تكسريها و يسير شكلها زي كدة.


و بعدين تفرقي شعرك يعني تفرقي من النص و تحطي شوية من السائل على الفروة السائل يكون على الفروة مو الشعر! و بعدين تفرقي جهة تانية و تحطي و تفرقي و تحطي زي كدة لازم تخلصي الامبولة كلها من استخدام واحد و تحطي على الفروة نفسها. بعد ما تخلصي تقعدي تمسجي الفروة كويس باطراف اصابعك و اعملي مساج لمدة ٥ دقايق انا برضو استخدمت التانغل تيزر عشان اعمل فيها مساج لانها تنشط الدورة الدموية.


و الامبولات زي ما قلت كل يومين لازم تحطيها و في معاها زي الجدول يبينلك و يساعدك انك تتابعي.

تجربتي:

بصراحة حسيت بتحسن و حسيت التساقط خف شوية. انا الحمدلله ما عندي تساقط قوي مرة كان تساقط خفيف و حسيت انو خف زيادة. ما اقدر اقول وقف! بس خف و بنات لازم تفرقوا بين التساقط الطبيعي و التساقط الي من جد! لان يوميا لازم تطيح من شعرك قريب ١٠٠ شعرة هدا عادي و طبيعي. فا مو لما تشوفي شعرك ينزل تحسبي تساقط و اوقات التساقط يكون بسبب فقر دم او مشكلة صحية فا اتاكدي انو السبب ما يكون مرضي. 

فا زي ما قلت التساقط الحمدلله خف عندي من بعد ما بدات استخدمها. وحدة من متابعاتي قالتلي ان اذا استخدمتي مجموعة التساقط من دوف الي هي الشامبو و البلسم حيكون في نتيجة افضل بس انا ما استخدمت عشان اشوف نتيجتها لوحدها كيف. انا مخلصتها من اسبوع يمكن بس كنت ابغى اشوف التساقط ممكن يرجع تاني ولا لا و الحمدلله ما حسيت انو رجعت تاني.

و ترى مو شرط مدام ناسبتني تناسبك لان يختلف من شخص لشخص. بس تقدري تجربي بما ان سعرها مناسب.

سعرها ٣٥ ريال تقريبا و اشتريتها من صيدلية النهدي.

ليست هناك تعليقات:

إرسال تعليق