الرؤوس السوداء هي نقط سودة غالبا تطلع في الانف بس ممكن تطلع في مناطق تانية و سببها ان المسام مسدود بسبب زيادة انتاج الزيوت في الوجه. و اذا ما اهتميتي في ازالتها ممكن تجيها باكتريا و تسير حبوب.
غالبا البشرات الدهنية و المختلطة هي الي تعاني من الرؤوس السوداء بس كتير ما يعرف ان ممكن العادية او الجافة تطلعلها رؤوس سوداء اذا استخدمتي المرطبات، واقي الشمس، الفاونديشن و المكياج بكثرة. و انا هدا الي سارلي بشرتي جافة و اول ما بدأت اعتني كنت ارطب وجهي كتيررررر بس طلعلتي رؤوس سوداء و سرت ارطب مرة في اليوم بس بدال مرتين. و اوقات لما احس وجهي رطب تلاقيني ما ارطب او استخدم مرطب مرة خفيف.
طرق للحماية من الرؤوس السوداء: هدي الطرق ما تمنعها بس تقلل ظهورها ان شاء الله
١. لا تغسلي وجهك بمقشر قوي او غسول قوي لان وجهك ممكن يتأثر و يزيد ينتج زيوت
٢. اذا بشرتك دهنية او مختلطة غسلي وجهك مرتين يوميا
٣. لا تحطي فاونديشن كتير لانو يسد المسامات و نضفي وجهك كويس من المكياج دايما
٤. غسلي غطا او بيت المخدة كل اسبوع عشان تروح الزيوت و الجلد الميت و الاوساخ
٥. مرة كل اسبوعين سوي جلسة بخار لوجهك
٦. قللي من الاكل المليان زيوت و سكريات
٧. قشري وجهك مرتين اسبوعيا
٨. استخدمي مرطب خالي من الزيوت و لا تستخدمي بكثرة
و في طريقة طبيعية لازالة الرؤوس السوداء اخدتها من حساب وحدة في الانستقرام و عجبتني. و تقدري تستخدميها على المناطق الي فيها رؤوس سوداء بس او الوجه كلو
اول شي جيبي بيضة و افصلي البياض عن الصفار و استخدمي بس البياض و قلبي بمعلقة بعديني جيبي فرشة و ادهني انفك و ركزي على الرؤوس و خلي ينشف و بعدين ادهني طبقة تانية و حطي مناديل عليها و فوق المناديل ادهني طبقة و خليه تنشف بعدين شيليها حتلاقيها زي اللصقات الجاهزة حقة الرؤوس السوداء و كدة تنضف عندك الرؤوس ان شاء الله.
ليست هناك تعليقات:
إرسال تعليق