الأربعاء، 22 أبريل، 2015

أهم الزيوت لبشرتك و شعرك (الجزء الأول)



السلام عليكم بنات ❤️انا جدا من محبين الزيوت و احب استخدمها في الروتين حقي لشعري و لبشرتي و طبعا كتير منها ليها فوايد مختلفة فا احب اقرا كتير عن فوايد الزيوت و حبيت اشاركم فيها 👍🏻 راح اسوي سلسلة في كل جزء اتكلم عن نوعين من الزيوت و اكتب فوايدها عشان الفوايد كتيرة فا الموضوع حيكون طويل فا ما حبيت احط كل الزيوت في موضوع واحد ممكن يكون طويل و ممل! فا كل اسبوع راح احط موضوع ❤️😁 اتمنى تستفيدوا منها! 

انا زيوتي اغلبها من موقع اي هيرب عشانها طبيعية و عضوية ١٠٠٪ انتوا حاولوا تاخدوها من عطار ثقة يكون الزيت طبيعي افضل او ممكن من المعصرة او خدوها برضو من اي هيرب و في تاجرات كتير يوفروها برضو 👍🏻


زيت الخروع




١. يستخدم كعلاج للفروة الجافة تحطي شوية على يدك و تفركي فروتك كويس قبل الاستحمام بساعة على الاقل و بعدين تغسلي شعرك.

٢. ممكن تحطي كم نقطة مع الشامبو حقك و تغسلي في شعرك يخلي شعرك مرطب و فروتك مرطبة برضو من الخطوات الي اسويها دايما وقت الاستحمام 👍🏻

٣. يستخدم للوجه عشان يمنع التجاعيد.

٤. ممتاز للحوامل عشان تخففي من السترتش ماركس (علامات التمدد) بسبب الحمل بس ادهني يوميا بطنك و منطقة الزند و الافخاد و الجنوب لان هي اكتر مناطق تتاثر من التمدد (بس الاول استشيري الطبيب قبل لا تستخدمي افضل). 

٥. يستخدم كمان عشان يكثف الشعر او في مناطق الفراغات في الرأس (بدأت اسوي الخطوة هدي من كم اسبوع بس لسة ما يبان دحين 😁) بس افركي المناطق الفارغة في راس او فيها شعر خفيف لمدة ٦ دقايق يوميا. 

٦. برضو ينفع للبنات الي حواجبهم خفيفة سوي نفس الخطوة الي فوق يوميا. 👆🏻

٧. ممتاز لعلاج بعض مشاكل البشرة مثل حروق الشمس و الحكة و الفطريات و المناطق الجافة و حب الشباب. جيبي قطنة و حطي فيه نقط زيت الخروع و اذهني المناطق الي فيها مشاكل و خلي ساعة و غسلي كويس و كرري العملية يوميا و ممكن تسويها ليل و نهار لنتايج اسرع.

٨. زيت الخروع ممتاز لحب الشباب لان في  حامض رسينولايك الي يحارب البكتريا الي تسبب حب الشباب. غسلي وجهك بموية دافية و بعدين ادهني وجهك بزيت الخروع و مسجي وجهك بشكل دائري و نامي و لما تصحي غسلي وجهك بموية باردة.

٩. يعالج التصبغات و اثار الجروح لانو مليان باحماض الدهنية اومغا ٣ الي تخترق الاثار و ترفعها على فوق و تقلل من مظهرها.

١٠. كمان يعالج الفروة من المشاكل زي الفطريات و البكتريا و الحكة.

ملاحظة: لا تستخدمي كمية كبيرة من زيت خروع على الوجه لانو تقيل مرة و ممكن يقفل المسامات اذا كترتي الكمية و يسبب حبوب لازم تحطي كمية بسيطة مرة! 


زيت اللوز الحلو



اول شي حبيت ابين نقطة قريتها قريب! من اول شاغل بالي موضوع زيت لوز حلو و زيت لوز مر 😂 و ابغى اعرف الفرق و الي اكتشفتوا ان: زيت اللوز يستخرج من اللوز و في لوز حلو و لوز مر. زيت اللوز الحلو هو الي نستخدموا للبشرة و الشعر و الاكل و كدة، اما زيت اللوز المر استخدامو غير و ما يستخدم الا باستشارة الطبيب لان في مكونات سامة زي سيانيد الهيدروجين و غليكوزيد أميغدالين و يستخدم لعلاج الكحة و مسكن للالم  و مهدئ و غيرو، اتمنى تكونوا عرفتوا الفرق دحين 🌚.

١. رائع للبشرة لان مليان بفيتامينات أ و ب و هـ. يساعد على ترطيب البشرة و تمتصو البشرة بسرعة بدون ما يسد المسامات.

٢. يخفف من الالتهابات الجلدية و يهدئ البشرة المتهيجة. 

٣. يعالج الشفايف المتشققة.

٤. يخفف من الهالات السودة.

٥. يمنع التجاعيد و الخطوط و يجدد الخلايا في البشرة.

٦. لما تضيفي للمقشر يتخلص من الخلايا الميتة و يدي اشراقة للبشرة.

٧. ينفع كبديل لكريم اليد و الرجول و عشان البشرة تمتصوا بسرعة ما يترك اثر دهني و مليان بالزنك الي يعالج التشققات في الاقدام و المناطق التانية.

٨. ينفع كمزيل مكياج و يفتح المسامات و يشيل المكياج بشكل كامل.

٩. يخفف من تساقط الشعر لانو مليان بالماغنيسوم الي يمنع التساقط و يغذي الفروة و يحسن من مظهر الشعر.

١٠. يعالج تقصف الشعر و الافضل تخلطي مع زيت الخروع و زيت الزيتون و تعملي حمام زيت.

١١. اذا شعرك جاف استخدمي كمرطب للشعر بعد الاستحمام يدي نعومة و لمعان للشعر.

و اتمنى ان الموضوع عجبكم 💕 و ان شاء الله احط الجزء التاني الاسبوع الجاي ❤️

Stay Elegant
xoxo

هناك 3 تعليقات:

  1. مواضيعك حلوة و مفيدة والاهم انه طريقة عرضها سهلة...بتخلي الواحد يستمتع هو وعم يقرا و نا يزهق...الله يعطيكي العافية

    ردحذف
  2. مواضيعك حلوة و مفيدة والاهم انه طريقة عرضها سهلة...بتخلي الواحد يستمتع هو وعم يقرا و نا يزهق...الله يعطيكي العافية

    ردحذف
    الردود
    1. حبيبتي انا يسعدك ربي دايما تسعدني ردودك

      حذف