أسوء ٥ أرواج
١. روج من ويت اند وايلد رقم ٩٦٧
اول شي هدا الكلام عن ارواج ويت اند وايلد بصفة عامة، بصراحة احس درجة ثباتها عالي بشكل مستفر يعني لازم يسيب اثر في الشفايف خاصة في الخطوط مهما تنضفي يقعد! لازم تقشير و فيلم عشان تروح و بالنسبة ليا ما احب كدة 👎🏻 و تاني شي مرة تجفف الشفايف بشكل رهيب و انا اعاني من جفاف شفايف خلقة عشان كدة اميل للارواج الكريمية اكتر من المات وعيبها كمان الباكجنغ او التعليب جدا سيئ الغطاية دايما تتلطخ من الروج قعدت انضف الغطاية عشان اصور خخخخخ. اخترت هدا اللون بالذات لان كمان لونو مرة ما عجبني على بشرتي حسيت طلعني مريضة 😂 احسو ينفع على البشرات الحنطية اكتر.
٢. روج من ايلف اسمو Runway Pink
نفسي اعرف من فين جابو البينك في الاسم 😂 لونو بني هو يعني نيود فا مدري التسمية المضروبة هدي من فين خخخخخ المهم مرة مرة تغطيتو خفيفة و ما يطلع اللون الا من ٥ مسحات يمكن في السواتش سويت مرتين و برضو مو واضح (السواتشات حتكون كلها في صورة وحدة بعد ما اخلص) و على الشفايف ما يبان ابدا احسو ينفع فوق روج عشان يدي لمعة بس ما حبيتو مرة.
٣. روج من نيكس اسمو Pale Pink
اكون صريحة الروج ما حطيتو عشان جودتو لان كجودة كويس مرة و لونو واضح بس الدرجة جدا ما ناسبتني! صراحة اللون خرافي بس حسيتو ما ينفع مرة! احس يبنفع على بشرة الاندرتون حقها بارد على وردي. انا جدا حسيتو غلط عليا 😂
٤. روج من كوليكشن اسمو Perfect Pink
يمكن هدا اسوء شي صراحة خخخخخ مرررة في شيمر (لمعة) بشكل رهيب! و انا اكره الارواج الي فيها شيمر و اللون برضو بايخ. هدا من الاشياء الي قلت مدري كيف اشتريتو 😂
٥. روج من جريرارد كوزمتكس اسمو Buttercup
ارواج جيرارد من الارواج الي سارت عليها ضجة مدري على ايش! جدا لونو خفيف السواتش تحت عد علي ٥ مرات بالزبط عشان يوضح اللون! هى نيود بس مالو دخل لان عندي ارواج نيود غيرها و واضحة! (واحد منهم بين افضل ارواج) و الي يقهرو سعرو! ١٢٥ والله ما يستاهل 😒
هدي سواتشات لكل الارواج
أفضل ٥ أرواج
١. نارز درجة Natalie
نارز ❤️العشق! اعشق ديه الماركة بشكل! مافي شي جربتو و ما عجبني منها جدا رائعة و ارواجها خيال 😍😍 تحسيها زي الزبدة كدة 😂 سويت عنها تدوينة كاملة
هدا اللون المفضل عندي ❤️ لونو تقريبا خوخي جدا جميل و اعشقو!
٢. روج من ميبيلين درجة Shocking Coral
تاني افضل ارواج عندي ❤️ جدا كريمية و الوانها روعة ناوية اعمل تدوينة عنها ان شاء الله. هدا اللون اكتر واحد استخدمو في السواتش تحت لونو جاي مدري كيف 😂 هو اصلا بمبي على مرجاني كدة جدا جميل 😍 و الوان ميبيلين واضحة من مرة وحدة هدا اكتر شي يعجبني فيها.
٣. من انستازيا درجة Lovely
انا في البداية ما حبيت ارواج انستازيا عشان كنت احسها تدي احساس مزعج على الشفايف بعدين اخدت نصيحة وحدة و سرت احط قبلها مرطب و جدا سرت احبها ثابتة لمدة طويلة و الوانها روعة 😍 هدا احلى لون عندي درجتو وردي نيود مرة ناعم و هادي و احب استخدمو في النهار اكتر شي ❤️ و الوانها واضحة جدا و قوية.
٤. من لوراك درجة Girl Next Door
هدا الروج جا مع باليت انزبد للبلاشرات لونو بينك رااائع مرة ناعم و هادي و تركيبتو جدا كريمية و اللون واضح احسو احلى درجة بينك عندي 💕
٥. ماك مجموعة توليدو درجة Oxblood
هدا النيود المفضل عندي 💕 لونو بني فاتح و تقريبا اول روج بني عندي 😂 كنت ما احبها ابدا بس تشجعت و اخدتها و صراحة حبيتو مرة ما ندمت علي 😍 و تركيبتو مات بس ما يجفف الشفايف مرة بس طبعا لازم احط قبل مرطب.
و هدي سواتشات للألوان
اتمنى انكم انبسطتوا من التدوينة 😘
Stay Elegant
xoxo
تسلم إيدك دودي :$
ردحذفبالنسبة لأرواج ويت ان وايلد صحيح أحسها ما تناسب الشفايف الجافة
لازم ترطيب وتقشير .. وإذا بعيد مرة ثانية أحس لازم أمسح الباقي من اللي قبل
لكنهم حلوين
بالنسبة لروج انستازيا .. مرة ندمت إني ما طلبت أرواجهم من الموقع :/
كثير مدح عليها وإنتِ حمستيني أكثر! ^^
ربي يسعدك