الأربعاء، 8 أبريل 2015

الطريقة الصحيحة لتنضيف المسامات بالبخار



السلام عليكم حبايبي 💕 اليوم بتكلم عن الطريقة الصحيحة لتنضيف المسامات بالبخار 👍 هدي الخطوة مهم كل شهر تعمليها مرة عشان تنضفي وجهك من اي اوساخ بالمسامات و اذا تعاني من مسامات واسعة اعمليها كل اسبوعين مرة بس مو اكتر من كدة لان كترة استخدام البخار راح توسع مساماتك و تدخل اوساخ اكتر و نبدأ بالخطوات:

١. اغلي موية على النار و تأكدي ان الموية تكون نضيفة و افضل موية صحة و حتى الكافتيرا او الي تغلي في الموية يكون نضيف.

٢. نضفي وجهك اول شي بغسولك عشان تشيلي الاوساخ و بقايا المكياج و هدي الخطوة ضرورية لان البخار يفتح المسامات و ممكن الاوساخ تدخل على المسامات و تهيج بشرتك او تسبب حبوب. ولا تستخدمي مقشر قبل البخار بس غسول لان المقشر ممكن يهيج بشرتك مع البخار. و نشفي وجهك كويس بمنشفة بالتربيت طبعا لا تنشفي وجهك بالتسحيب.

٣. جيبي زبدية نضيفة و حطي فيها الموية الحارة و غطي بمنشفة عشان البخار ما يتبخر و خلي شوية.



٤. تقدري تضيفي بعض الزيوت او الاعشاب عشان تسترخي اكتر عندك مثلا اللافندر و البابونج يعمل استرخاء، النعناع و الليمون يعطي طاقة و النعناع كمان يحارب الزكام اذا كنتي مريضة و خشب الصندل يهدئ التوتر و في غيرها اعشاب و زيوت. انتي اختاري اذا تبغي زيوت او اعشاب تحبيها و حطيها في الموية.



٥. بعدين حطي وجهك فوق البخار و خلي مسافة بينك و بين الموية لا تقربي وجهك مرة منها يعني تحسي انك مرتاحة مو البخار يحرقك مثلا شبرين كدة كويس و حطي منشفة على راسك و خلي كأنو خيمة على وجهك و الزبدية زي الصورة فوق عشان البخار يكون بس عليكي. و اقعدي بس ١٠ دقايق بعدين خلاص.

٦. بعدها هدا الوقت المناسب الي تقدري في تنضفي الرؤوس السوداء تكلمت عنها هنا و عن طريقة طبيعية لازالتها

http://elegantcountess.blogspot.com/2015/03/blog-post_8.html

و في الة خاصة لازالة الرؤوس السوداء بس ما اعرف طريقة استخدامها بس شوفوا بلوق سلطانة تكلمت عنها 
٧. الخطوة هدي ممكن تسويها و ممكن لا هدا شي يرجعلك. استخدمي قناع عشان تشيلي كل الاوساخ من وجهك و تشيلي من المسامات عشان تكون لسة مفتوحة وقتها بس اهم شي تكوني مجهزة الماسك عشان بعد ما تشيلي وجهك تحطي على طول ممكن تستخدمي قناع الطين زي الطين المغربي او الاوربي او ممكن بس تحطي عسل على وجهك كدة ينضفلك وجهك كويس و يتخلص من الاوساخ العميقة (اهم شي القناع تكوني استخدمتي قبل و متأكدة انك ما تتحسسي منو). و اذا ما تبغي ماسك غسلي وجهك بعد البخار بموية تكون حرارتها حرارة الغرفة و موية صحية طبعا و غسلي وجهك كويس.



٨. نصفي وجهك بعدها بتونر عشان تقفلي المسامات. و اذا تبغي تونر طبيعي ممكن خل التفاح مع موية او عصير ليمون أو موية ورد.

٨. بعدها رطبي وجهك بالمرطب حقك اليومي.

و بكدة انتهيتي من تنضيف وجهك ❤️ اتمنى انكم استفدتوا من الموضوع 😘

Stay Elegant
xoxo

ليست هناك تعليقات:

إرسال تعليق