الاثنين، 3 أغسطس 2015

نصائح سريعة للسفر




السلام عليكم حبايبي ❤️ هدي نصايح سريعة عن السفر ان شاء الله تستفيدوا منها خاصة اذا اول مرة تسافروا ❤️👍🏻:

١. اول شي لازم تعرفي جو الدولة الي مسافرة ليها يعني تعرفي درجات الحرارة عشان تشوفي ايش تاخدي معاكي ملابس شتوية او صيفية و زي كدة. تقدري تعرفي انك تكتبي اسم المدينة و بعدين كلمة weather و يطلعلك درجات الحرارة هدي تقدري تسويها قبل السفر باسبوع او اسبوعين يسير يكون الجو التقريبي.

٢. خدي احتياطك دايما، يعني لقيتي درجة الحرارة حيكون الجو دافي خدي جاكيت او بلوزة متينة احتياط لان في اماكن زي اوربا الجو فجاة يقلب.

٣. اذا مسافرة اوربا او اماكن فيها امطار لا تنسي تاخدي المظلة و حاولي اللبس او الحجاب الي لابستو ما يكون نازل في الارض عشان لا يتعبى موية و ينعدم عليكي وقت المطر. ولا تلبسي شوز قماش او صوف عشان لا يتشرب موية.

٤. في شنطة يدك للسفر لا تاخدي اشياء حادة زي مبرد او مقص او قصاصة و لا تاخدي مواد سايلة حجمها ٢٠٠ مل و فوق لان يسحبوها منك زي كريم او عطر او عصير. سارلي المقلب داه في لندن لما كنت دوبي متزوجة 😂 سحبوا مني بلاوي كنت شايلتها في شنطة مكياجي كنت شوية و ابكي خخخخخخ.

٥. المواد السايلة او الكريمات في شنطة الملابس دخليها في شنطة بلاستيك او كيس و حطيها بين الملابس عشان اذا انفك او انكب شي ما يعدم ملابسك و في نفس الوقت الملابس تحميها من الخبطات. و اي شي تخافي ينكسر لفي بين الملابس.

٦. حاولي تكتبي كل شي تبغي قبل السفر يعني مثلا تجيبي دفتر صغير و اكتبي الاشياء الي تاخديها يعني بجامات، ملابس داخلية، فرشة اسنان، كريم ترطيب الخ يسير كل ما تدخلي شي اشطبي او حطي جنبو علامة يسير كدة تتاكدي اخذتي كل شي.

٧. حاولي تتعرفي اكتر على المدينة الي رايحتلها يعني اماكن ترفيهية او معالم مشهورة يسير تعرفي فين تروحي.

٨. شنطة يدك حاولي تكون كروس باق او شنطة ظهر عشان تكون اريحلك لان السفر كتير يعتمد على المشي لما تشيلي شنطة في يدك راح تطفشك فا حاولي تاخدي شي مريح.

٩. السفر حلاوتو في الصباح يعني حاولي من ٨-٩ تقومي و تخرجي تستغلي النهار كلو لان اغلب بلدان برة المناطق الترفيهية و المحلات و كدة تقفل ٧-٨ يعني مو زيننا الساعة ١٠ تبدا السهرة في الليل 😂

١٠. اذا ناوية تتسوقي خلي شنطتك لو نصها فاضي او ممكن تدخلي شنطتين في وسط بعض يعني تعبي شنطة تكون وسط او صغيرة و تدخليها في وسط شنطة تانية اكبر يسير تروحي بشنطة و ترجعي باتنين 😁 او انك تشتري شنطة من هناك و تحطي فيها المشتريات.

١١. خدي لبان معاكي في الطيارة عشان الضغط يعور الاداني 😭 هادي اعاني منها مرة فا اللبان يخفف الضغط اهم شي تمضغي كويس و تكوني صاحية في الاقلاع و الهبوط.

١٢. بالنسبة لكريمات العناية راح احطها في تدوينة تانية ان شاء الله.

١٣. لما تشتري اكل زي بسكوت او بطاطس او اي شي في الدول الاجنبية انتبهي للمكونات لازم تقريها عشان تتاكدي مافيها جيلاتين حيواني او كحول و كدة و تقدري تستعيني بمترجم قوقل انك تصوري المكونات و تترجميها. حتى لما تطلبي اكل في المطاعم في اكلات تكون بلحم الخنزير او بالكحول.

١٤. لازم تلبسي شوز مريح في السفر عشان المشي لا تلبسي هيلز لان مرة راح تتعبي و الافضل ما تلبسي صندل مفتوح عشان رجولك لا تنعدم حاولي تلبسي شوز رياضي او سنيكرز او ممكن بوت مريح.

تقريبا هدا الي في بالي من نصايح 😁 بحط كم موضوع عن السفر ان شاء الله برضو و تابعو حسابي في الانستقرام اذا افتكرت نصيحة احطها هناك 😁

اتمنى انكم استفدتو ❤️

Stay Elegant
xoxo

هناك 3 تعليقات:

  1. Enjoy ur trip my dear...u deserve a happy vacation ❤

    ردحذف
  2. Enjoy ur trip my dear...u deserve a happy vacation ❤

    ردحذف
    الردود
    1. Thank you very much dear ❤️ Always happy to see your replies ❤️❤️

      حذف