الأربعاء، 5 أغسطس 2015

منتجات العناية الي اخدها في السفر و نصائح سريعة


السلام عليكم حبايبي ❤️ نكمل مع سلسلة مواضيع السفر 😍 اليوم بتكلم عن اشياء العناية الي راح اخدها و حقلكم نصايح سريعة تساعدكم.



اول شي طبعا و اهم شي واقي الشمس! جدا مهم خاصة اذا حتكوني محجبة عشان الشمس لا تتعب بشرتك فا ضروري تاخدي واقي و كمان يدينك ضروري تحطي فيها و تعيدي حط الواقي كل ٢-٣ ساعات. طبعا الشي المهم التاني هو كريم لليد خاصة اذا يدك جافة زي يدي لان راح تقضي وقت طويل برة و اكيد راح تاكلي و تغسلي يدك فا تجف فا الافضل يكون معاكي دايما كريم يد 👍🏻.




و كمان الترررطيب جدا مهم! كل انواع البشرات تحتاج ترطيب مو بس الجافة. انا اخدت كريم نهار احطو قبل لا اخرج و التاني ماسك ترطيب قبل النوم جدا روعة و سرت اعشقو راح اعمل تدوينة عنو ان شاء الله 👍🏻 و الاتنين من ذي بودي شوب.



و من الاشياء الضرورية كمان هي غسول الوجه! لانك يوميا حتخرجي و زي ما قلت اذا محجبة وجهك حيتعرض للاوساخ يوميا فا لازم تغسلي يوميا انا اخدت اتنين اليمين غسول و مزيل مكياج للبشرة الجافة و العادية من نكس و التاني غسول و مقشر من سينت ايفز يناسب كل البشرات. حاولي تاخدي غسول يوفرلك شيئين عشان توفري مساحة عندك في الشنطة يعني بدال تاخدي مزيل مكياج وجه و غسول خدي غسول يسوي الاتنين و زي كدة.



و طبعا مزيل مكياج للعيون اذا راح تحطي ماسكرا او ترسم عينك 👌🏻يبغالي واحد جديد 😂



اذا تستخدمي علاجات لا تنسي تاخديها طبعا و انا اخدت فيتامينات شعري و بخاخ لفراغات الشعر لسة قيد التجربة فا ما اقدر اتكلم عنو ابدا.



ولا تنسي القطن طبعا!



كمان شي مهم هو التونر عشان تنظفي بشرتك كويس و اسكنول عشان تنظفي رقبتك.



كريم الرجول من اهممم الاشياء لان يوميا حتمشي كتير فا لازم ترطبي رجلك يوميا قبل النوم  و كريم الرجول المفضل عندي هو حق بودي شوب.



بالنسبة للشعر خدي طبعا شامبو و بلسم و كريم مرطب هدي اهم شي لا تعتمدي على حقة الفنادق لان ما تعرفي اذا تناسب شعرك او لا و اغلبها تنشف الشعر فا خدي معاكي الشامبو و البلسم و تقدري تحطيهم في علب زي دي يسير تخففي مكان في الشنطة انك تحطي شوية منهم في العلب ديه و موجودة في دايسو و الدانوب و اعتقد ساكو ماني متاكدة. 



لا تنسي ترطيب شعرك انا استخدم هدا الماسك و ليف اون كونديشنر الي هو بلسم ما يتغسل من الشعر احطو اخر شي في الاستحمام و اخرج بدون ما اغسلو مرة يرطب شعري بشكل جميل و ما احتاج كريم مرطب بعدو 👍🏻

العلب حقة الشامبو و البلسم في منها كمان تجي للكريمات يعني زي علبة الكريم الفاضية ممكم تحطي فيها من كريمك اذا كان كبير. 

و طبعا دايما حطي الكريمات في شنطة بلاستيك عشان اذا انفك او انكب كريم يسير ما يعدم الملابس او ممكن جوة كيس بلاستيك و حطي الشنطة او الكيس بين الملابس عشان تحميها برضو.

جل الشاور ممكن تاخدي حقك او تستخدمي حق الفندق او ممكن تجيبي احجام السفر. زي بودي شوب يعملو احجام صغيرة من جل الشاور مرة تنفع للسفر.

لا تنسي تاخدي كريم مرطب للجسم كمان 👍🏻 انا باخد معايا لوشن بس ناوية اخد من بودي شوب لوشن او كريم جسم حجم صغير لان كريمات جسمي كلها كبيرة 😂

في نصيحة كمان قريتها عند الجميلة نورة و عجبتني، ممكن ما تاخدي سكين كير (كريمات العناية) و تشتري من البلد الي رايحة لي يسير تجربي اشياء جديدة 😍 

ابدا لا تنسي بشرتك في السفر لازم تهتمي فيها 😍👍🏻

Stay Elegant
xoxo

هناك 3 تعليقات:

  1. لو سمحتي بدي اسالك شو رايك بفيتامينات الشعر ؟

    ردحذف
  2. لو سمحتي بدي اسالك شو رايك بفيتامينات الشعر ؟

    ردحذف
    الردود
    1. تكلمت عنها في تدوينة شوفيها هنا يا قلبيhttp://elegantcountess.blogspot.hu/2015/07/solgar.html

      حذف