الأحد، 13 ديسمبر 2015

الأمومة... نعمة و تضحية (الجزء الأول)



السلام عليكم حبايبي ❤️ حبيت ابدا سلسلة جديدة في المدونة هي عبارة عن زي اليوميات او الذكريات عن الامومة 😍 كتير قالولي اتكلمي عن ديه المواضيع فا حبيت اتكلم عن تجاربي و يومياتي من الامومة و تكون تغيير خفيف عن التجميل و العناية 😁 لان حابة اغير شوية في المواضيع حقتي.

طبعا كيف ابدا اتكلم عن الامومة من غير ما اذكر ولادتي و الفيلم الطويل 😂 

اول شي انا متزوجة من ٧ سنين ما شاء الله بس حملت قبل سنتين و شوية فا ما حملت على طول لاسباب كثيرة منها اني عشت في لندن سنتين فا كانت صعبة و بعدين جيت السعودية و قعدت مع اهل زوجي كم سنة فا كان برضو صعب من حيث المكان و كنت حاسة نفسي ماني مستعدة لسة و لما قررت كنت خلاص مستعدة فا اهم شي لا تقرري تسيري ام الين تحسي نفسك مستعدة لان كتير يغلطوا ديه الغلطة يحملوا على طول و ما يكونوا مستعدين و ينصدموا من المسؤولية و تعب الامومة لان طبعا الامومة ماهي سهلة!

لما قررنا انو خلاص احمل هنا تاخرت شوية لان كنت اخد موانع فا سببتلي مناعة فترة بس الحمدلله بالدعاء و الاستغفار ربي رزقني ❤️ ما انساها لما دريت اني حامل كانت ليلة العيد في رمضان ١٤٣٥ كانت ليلة ما تنسى الحمدلله ❤️ كان عيدي عيدين من جد! الحمدلله يارب و الله يرزق كل محرومة يارب و صدقيني بس ادعي في سجودك و استغفري و تصدقي و ربي اكيد يستجيب ❤️

بعدها بدات في الحمل و التعب و الوحام 😩 وحامي كان يضحك كلهم ضحكوا عليا ههههه اول شي ايس كريم! و مو ايس كريم لا كواليتي ابو عود هههههه و بعدين توحمت على ترمس و بعدين بليلة اقلكم مرة طلعت طقة قديمة هههههه و كان الغثيان يجيني في الليل تخيلوا! طول النهار طيبة و كويسة بس يجي المغرب يبدا الغثيان و اللعب داه حتى كنت اكره اخرج في الليل. و ما اقدر انام من الغثيان 💔 يقولوا الحامل بس تنام انا كنت العكس اول شي ما انام الين يجي النهار عشان الغثيان و بس اصحى كل شوية و نومي خلقة خفيف مرة ما تهنيت في النوم.

و المستشفى عاد انا تابعت في الفتيحي الي هي مركز الطبي الدولي صراحة حلوة و الدكاترة مرة فاهمين و شاطرين بس عيبهم المواعيد تطفش بسرعة تتقفل الحجوزات عندهم لو تاخرتي دقيقة كلو يروح عليكي.

الحمدلله عدت مرحلة الغثيان في الشهر الرابع و اخدت حبوب غثيان ريحتني شوية. في اخر الشهر الخامس عرفت اني حامل ببنت ❤️ و انا سبحان الله كان نفسي في بنوتة بس طبعا الي ربي يرزقني في نعمة كبيرة بس الحمدلله ربي رزقني ببنت ❤️

الولاااادة! اول شي انا جهزت كل شي الحمدلله بس بقيت الاشياء الزينة زي زينة المستشفى المباشرات ماما الله يسعدها سوتلي المفرش و التوزيعات الهدايا  ❤️. فا كان باقي زينة المستشفى و المباشرات. 

في الشهر التاسع كدة لسة اول اسبوع و دوبي بدات امشي لسة بقول بسم لله هههههه و بقول لماما اجهز شنط المستشفى تقولي لسسسسسة بدري بكرية ليلك طويل حتدخلي العاشر 😂. و خلاص حطيت على قلبي بطيخة صيفي.

في يوم الخميس ٤ جماد الثاني ١٤٣٥ كنت رايحة المستشفى عندي مراجعة و انا في الطريق تجيني الام في ضهري سرت اقول داه طلق! و قيدها ماما فهمتني ايش الفرق بين الطلق العادي و الكداب فا سرت احسب الوقت بين الطلقات فا لقيتها ملخبطة فا قلت شكلو كداب و جات ٣ مرات و وقفت و بعدها خلاص وصلت المستشفى و حكيت الدكتورة قالتلي طلق كداب و قلتلها كم احتمال اني اولد قالتلي بكرة ١٪ و الاسبوع الجاي ٥٠٪ و الي بعدو ٨٠٪ و سمعت كلامها و رجعت. بس داك اليوم حسيت اني تعبانة بزيادة و ثقل اكتر من العادة حتى سرت افكر كيف اقعد التاسع كلو بداه الالم و التعب. و في نفس اليوم كلمت وحدة عشان زينة المستشفى و خلاص قلتلها بس اقول لزوجي و اردلك بس سبحان الله!

و نمت عادي ثاني يوم الجمعة كنت نايمة في امان الله و بس فجاة اصحى على نفسي موووية تتكب مني! طبعا صحيت مفجوعة ايش هدا و اروح الحمام الله يكرمكم و ارجع اطالع في السرير هنا استوعبت انها موية الراس! طبعا انفجعت سرت اصحي زوجي و ماني عارفة ايش اسوي و دقيت على ماما طبعا ماما عادتها ما تحب تفجعك تقعد تهدي عليكي عشان لا تتوتري و قالتلي كلمي دكتورتك و روحي المستشفى بس فهمت انها ولادة 😂 دقيت عليها قالتلي روحي يالله ايش تستني خخخخخخ. و بس زوجي يدق على اخو و سلفتي و الله يسعدهم جو و سلفتي ساعدتني تخيلوا ماني مجهزة شنط ولا شي و بدا معايا الطلق و سرت اعبي الشنطة حقتي و سلفتي تعبي شنطة بنتي و على طول رحنا المستشفى. من رحمة ربي كان صلاة جمعة و زوجي و اخو كانو تعبانين ما راحوا الصلاة و هم عادة كل اسبوع يروحوا بس من ربي تخيلت لو سار داه كلو و هو مافي! و كان الشارع فاضي الحمدلله.

ماما هي في المدينة و مسكينة تجننت تدور حجز لجدة و تحضر شنطتها و ماهي لاقية حجز و تكلم هنا و هنا الين عمي لقى واسطة و جابت حجز و جاتني و وصلت العشا الحمدلله. بس خالتي الله يسعدها جاتني المستشفى و قعدت معايا ❤️ و كانوا اهل زوجي في الرياض عندهم فرح فا يعني حووووسة هههههه. بس قعدوا معايا اخو زوجي و سلفتي الين ولدت و خالتي قعدت معايا الى اخر الليل و جاتني خالتي الثانية برضو و قعدوا معانا الله يسعدهم.

المهم قعدت و بدا الطلق و طلبت ابرة الظهر صراحة و ادوني هي العشا لان لازم يدوها في وقت معين (استحي ادخل في التفاصيل خخخخخ) و ريحتني مرة الابرة. و قعدت استنى طبعا انا من الظهر في المستشفى و تقريبا على الساعة ٦ الفجر جاتني سخونة و سرت مرة تعبانة و اقلهم مرة مولعة ابغى موية باردة. و ماما شافت وجهي سارت تنادي الممرضات تقولي وجهك كان احمر زي الدم من السخونة و طبعا شافو السخونة خافوا و بسرعة ادوني خافض حرارة و سرعوا في الولادة و الحمدلله الساعة ٨ الصباح ولدت و جبت ❤️ ريمان ❤️ تقريبا قعدت ٢٠ ساعة الين ولدت و الحمدلله.

و بعدها خالتي الله يسعدها سوتلي زينة المستشفى هي و زوجها لان ما كنت مسوية زي ما قلتلكم بس ما قصرت و خالاتي الثانين جابوا مباشرات و الحمدلله الله يخليهم ليا ❤️

طبعا اخواني كانوا في المدينة اختي و اخويا الصغار عند اختي الكبيرة كانت حامل وقتها مسكينة ماهي راضية تنام يا قلبي و بس تبكي ههههه و الا تبغى تجي جدة سرنا نضارب معاها انتي حامل ايش يجيبك مسكينة فرحانة حتسير خالة ❤️. 

قعدت اسبوع بعدها في جدة عشان ارتاح و عشان يشوفوا ريمان لازم بعد الولادة و هي جاتها مشكلة في عينها وقتها زي الالتهاب بسبب السخونة الي جاتني بس الحمدلله تعافت و بعدها رحت المدينة كملت نفاسي.

اسفة اذا طويل الموضوع بس حبيت اشاركم و يارب يكون عجبكم الموضوع و حابين اكمل؟

Stay Elegant
xoxo

هناك 7 تعليقات:

  1. يسعدك ربي ويخليلك ريمان وامك ��

    ردحذف
  2. يسعدك ربي ويخليلك ريمان وامك ��

    ردحذف
    الردود
    1. و يحفظلك احبابك يارب و يسعدك ربي حبيبي

      حذف
  3. اندمجت مع البوست و فرحت معاك كأنك اختي و الله
    ماشاء الله عليك و ربي يخليلك بنتك ريمان و يحفظها
    منتظرة بوستاتك الجاية بحماس <3

    ردحذف
  4. Wwo0owwالبوست رجع الذي كان ومضى زمن ياا زمن ربي يخليك العروسه وتفرحي بها دنيا وآخره

    ردحذف
  5. زي ولادتي ببتال وجلست ف جدة اسبوع ورحت لأهلي كملت نفاسي دحين عمره سنه ونص ربي يحفظو لي ويحفظ لك ريمان.����

    ردحذف