الثلاثاء، 5 أبريل، 2016

مشترياتي من امازون + تجربتي الثانية مع موقع shopfans

السلام عليكم حبايبي ❤️ اليوم بحطلكم مشتريات منوعة من موقع امازون استخدمت فيها البريد الامريكي حقي من شوب فانز الي تكلمت عنو قبل في التدوينة الي راحت و هدا رابط التدوينة

هدي تجربتي الثانية و انا قسمت المشتريات هدي على دفعتين الدفعة الاولى الشحن كلف ٩٠.٤٥ دولار يعني تقريبا ٣٦٠ و كانت الدفعة الاكبر و الثانية كلفت ٥٩ دولار تقريبا ٢٢١ ريال صراحة يعتبر ارخص من موقع ماي يو اس الي تعاملت معاه قبل و اسرع في التوصيل.

وصلتني الطلبية خلال ٤ ايام بس عن طريق البريد الممتاز. تغليف الاشياء كان مرة ممتاز الاشياء الي ممكن تتكسر مغلفة باكياس للحماية و الاشياء مرتبة مع بعض.

في عيبين للموقع لاحظتها:

١. الموقع بطيئ و كم مرة يعلق و ما يفتح فا طفشني شوية هدي المرة.

٢. لازم ادخل اسعار كل الاشياء بنفسي يعني كل منتج و سعرو و الكمية. لكن في المقابل يحطو رقم الشحنة نفسها الي تكون في امازون يعني ما يغيرو الاسم فا قدرت اعرف ايش هي الشحنات و المنتجات الي فيها. بس طفشت و انا اكتب ههههههه

طيب نجي للاشياء الي طلبتها

اول حاجة اخدت لحفظ منتجات العناية او الاستحام بالسفر. يعني هي شنطة تتطبق و تقدري تفتحيها و تعلقيها زي الصورة الثانية و تدخلي جوتها الكريمات او الشامبو و كدة. من اول محتاجة شي زي كدة للسفر عشان اتنقل كتير و هدا رابط المنتج





ثاني شي هدي شنطة صغيرة جوتها شنطة ظهر برضو اخدتها للسفر عشان عندي سفرة قريب و حسيت اريح احط الشنطة على ظهري خاص لما يكون معاكي اطفال و الحلو الشنطة ضد الموية 👍🏻 و هدا رابط المنتج
بعدها اخدت شاحن متنقل اخيررررا من اول ابغى و اخدت واحد مرة من لندن و طلع خربان (: فا اخدتلي واحد و ايوة اعرف ان عندي ادمان لون بينك هههههه و اخدت كمان شنطة صغيرة جهة احط فيها الجوال و جهة الفلوس و البطاقات مرة عملية للمشاوير السريعة و هدي روابط المنتجات



كريم من اوز ناتشرال مرة علي مدح و يعتبر من المنتجات الاكثر مبيعا هو كريم بالريتونل و فيتامين سي و اي و بي ٥ و هالورنيك اسيد و زبدة الشيا


هدي سبورت برا (حمالة للرياضة) اخدتها للبيت لان احب البس هدا النوع في البيت و اغلب مشاويري هههههه مرة ما احب العادية البسها بس فب الزيارات او المناسبات و ما لقيت نوعيات مريحة عندنا عشان جسمي مليان شوية ما شاء الله فا تضايقني اغلبها بس هدا النوع مرررة اتعب و اقول مريح! مرررة سترتش و ما تضايق و هي تجي ٦ مع بعض الوانها مختلفة بس من جد انصحكم فيها اذا تبغوا سبورتس برا و شكلي حطلب منها كمان خخخخخخ


و هدا كفر جوال عاد طبعا لازم يكون كيوت و احلى انو ديزني هههههه اعترف اني من محبين ديزني ☺️

دحين طلبات لريمان، اول شي علبة فيها ملعقة و شوكة اطفال عشان بدات اعلمها على الشوكة و الملعقة و عجبني شكلها 😁




اخدت من كروكس صندلين الاحمر للبيت و الثاني للخرجات و سعرها مرة اقل من هنا! 



و هدي ملابس اخدت فستانين مع بعض و ٣ تيشرتات مع بعض كلها ديزني. جودة الملابس مرة ممتازة كنت شايلة هم الجودة بس طلعت حلوة
اخر حاجة كاسات عصير الاول فروزين لريماس و الثاني برنسيس ارورا ليا ههههه هي شخصيتي المفضلة من ديزني 😁 و الي بعدها ديزني برنسيسز لريمان 



و بس هدي المشتريات كلها 

Stay Elegant
xoxo

هناك 9 تعليقات:

  1. وعليكم السلام ورحمة الله وبركاته : )
    ناوية أجرب هالشركة إن شاء الله ><
    صراحة ما عرفتها إلا منك :$

    لكن بالنسبة لكتابة سعر المنتج هذا صار شيء إجباري بكل شركات البريد الأمريكي
    بالنسبة لسعرها للأسف ترا أغلب شركات البريد الأمريكي بداياتها تكون أسعارهم حلوة لكن إذا إشتهروا يرفعون أسعارهم
    بس حلو نستغل إنها جديدة :D

    الله يسعدك يا رب وإستخدام الهنا :$

    ردحذف
    الردود
    1. و عليكم السلام و الرحمة

      هلا بهنو والله ^ـ^ انا جدا حبيتها و سرت دحين استخدمها في مشترياتي بس من جد يارب ما تغير سعرها!

      و ايوة صادقة اجباري بس بعض الاحيان يكون في فاتورة الطلب و موجود في السعر افتكر ماي يو اس هم يدخلوا السعر اذا متوفر هدول لا عشان كدة طفشوني ههههه بس برضو تبقى احسن عندي من ماي يو اس و ان شاء الله تجربيها و تعجبك حبيبي

      و يسعدك ربي و يعافيك

      حذف
  2. ماشاء الله تسلمي على المدونة استفدت منها كتير بس حابه اعرف رايك عن كونسيلر ميبيلين فت مي ينفع للاستخدام اليومي انا بشرتي مختلطة

    ردحذف
    الردود
    1. الله يسلمك حبيبي تسلمي و بالنسبة للكونسيلر ايو ينفع للاستخدام اليومي و البشرة المختلطة لانو خفيف و ماهو كريمي مرة

      حذف