" اذا لم تبني احلامك، شخص سوف يوظفك لتبني احلامهم"
السلام عليكم حبايبي، كيفكم؟ مرة وحشتوني ما تدروا قد ايش والله و مرة سعيدة اني رجعت معاكم ثاني، و اني قررت ارجع ثاني و اكتب مرة ثانية. طبعا الي يتابعني من زمان يعرف اني اختفيت فترة طويلة من ٢٠١٦ تقريبا. و سبب اختفائي اني اضطريت اوقف كل احلامي و كل طموحاتي عشان شخص اخر.
انا كنت متزوجة و انفصلت من فترة من سنة تقريبا و صراحة كان من افضل القرارات الي سويتها في حياتي. ما ابغى اتكلم عن المشاكل او امور شخصية و عن اسباب الانفصال بس الي اقولوا ان قسمة و نصيب و الحمدلله على كل حال
من يوم ما قررت اصير بلوقر كان للاسف ضدي في كل شي منع اني اتعامل مع شركات او احضر ايفنتات او اي حاجة و كان لما تجيني دعوات يمنع اني اروح او اي شي و للاسف وقف ضد كل طموحاتي و احلامي مع اني كنت واقفة معاه في كل طموحاته و ساعدتو فيها و حقق كل الي كان يتمناه و الي يبغى يوصلو و الحين هو وصل للشي الي كان يحلم فيه بعد ما وقفت معاه و ساعدتو فيها و للاسف منعني من كل شي و داه الشي مرة اثر عليا نفسيا لان انا بطبيعتي عندي طموحات و عندي احلام ابغى احققها و ما احب احس اني انسانة من غير اي هدف احب يكون ليا كيان ليا احلام اشتغل عليها.
كان روتيني جدا ممل و كنت حاسة بفراغ رهيب حتى شوية شوية كرهت البلوق و كرهت حسابي لان حسيت اني ماني قادرة اتطور ماني قادرة اكون على طبيعتي و للاسف سار يشد عليا زيادة اني اترك البلوقنغ و سارت تسير مشاكل كثيرة بسبب داه الموضوع و المشكلة كان بدون اي سبب مقنع!
المهم تركت كل شي عشان ارتاح من المشاكل و بدات حياتي شوية شوية بانهيار و غير المشاكل الكثيرة الي كانت بحياتي بسبب مواضيع خاصة.
الين قبل سنة قررت الانفصال خلاص لان فعليا نفسيتي اتدمرت شعري طاح سرت بس اتعب جسديا ما سرت اهتم بنفسي ولاشي ما سار عندي هدف في الحياة اصحى من النوم و استنى الوقت الي ارجع انام في خاصة اني حتى تمنعت من صديقات و اهلي كانو في مدينة ثانية ما كنت اقدر اشوفهم و كنت فعليا لوحدي
في الاخير الحمدلله بعد حرب تم الانفصال و اخدت شقة و قعدت ادور وظيفة و الحمدلله لقيت وظيفة كويسة و جات عندي اختي الصغيرة تسكن معايا و الحمدلله استقريت في حياتي دحين
المغزى من كل الموضوع ان لا تتخلوا عن احلامك و طموحاتكم عشان شخص ثاني خاصة اذا هذا الشخص ما تخلى عن اي شي عشانك، لا تضحي بنفسك و تضحي بحياتك عشان شخص ما يقدر الشي الي انتي تسوي عشانه او يخليكي تحققي
احلامك و تحققي طموحاتك. لازم يكون عندك هدف تبغي تحقيقي في حياتك و يكون عندك شي يخليكي سعيدة كهواية مثلا
شي مثلا يخليكي سعيدة لازم تخصصي لنفسك لو ساعة في اليوم تسوي حاجة لنفسك لا تضحي بنفسك بشكل كامل
و الانفصال مو نهاية الحياة ابدا زي ما كثير يحسبوا بالعكس اوقات تكون بداية حياة و بداية جميلة دحين الحمدلله كل شي سار مسهل للمرأة نقدر نسوق نقدر نشتغل في اغلب الوظائف في كل شي سار لي تطبيق سواء مغاسل مقاضي مواصلات كل شي. مو معناه اني اشجع على الانفصال لا بالعكس ابدا انا ما قررت انفصل الا لما خلاص صبرت ٩ سنين و استفذت كل الفرص الي عندي بس في الاخير ما كان غير الخيار الوحيد و الحمدلله على كل حال و الله يوفقكم جميعا و يسعدكم
ليست هناك تعليقات:
إرسال تعليق