مفضلاتي من الدرغستور

سلام حبايبي ❤️ اليوم حابة اتكلم عن مفضلاتي من الدرغستور الاشياء الي احبها و ما استغني عنها ❤️ و انصح فيها كمان و بسم لله نبدأ

أول شي هدا مزيل المناكير ❤️ من برجوا مرة احبو و يعجبني جدا سهل و ما يتعب ثواني و المناكير راح بس تدخلي اصباعك و تبرمي في وسط الاسفنجة و تطلعي عادي و تلاقي طلع (: و الحلو في كمان انو زيتي فا ما ينشف الاصابيع و في واحد جديد موف لمناكير الأقدام و انتو بكرامة. عيبو انو يتعب في مناكير القلتر و ممكن يمسك في الاسفنجة اذا القلتر كبير. ناسية سعروا بس اعتقد في حدود الستين يمكن.

برضو من برجوا كمان هدا السي سي كريم ❤️ هدا عشقي الحالي و كتبت عنو في حسابي في الانستقرام قبل. تغطيتو متوسطة و يخفي تصبغات البشرة و الاحمرار و يساعد في اخفاء الهالات السودا الي حببني في انو ناسب لون بشرتي بالتمام لان دايما اتعب عشان الاقي اساس يناسب لون بشرتي و هدا اول واحد احسو مرة تمام. سعروا ناسية والله.

من برجوا برضو و اخر شي منو هههههه الماسكرا الجميلة هدي ❤️ اول وحدة اشتريها و احبها دايما حظي وحش في اختيار الماسكرات كل ما اجيب وحدة ما تعجبني لان انا رموشي قليلة فا اتعب عشان الاقي ماسكرا تطول و تكثف و هدي سوت كدة ❤️ ما اقدر اقول كثافة قوية مرة بس ناسبتني. و هي من النوع الي تلفيها جهة ١ عشان التطويل بعدين تلفيها جهة ٢ عشان التكثيف. سعرها ٧٩ ريال

من نيكس هدي القلمين ما استغني عنها ❤️ اول واحد وندر بينسل لي اكتر من استخدام ينفع كمحدد للحواجب محدد للشفايف من برة يديها شكل حلو او من جوة عشان التكبير و كمان ككحل داخل العين. مرة كريمي و يقعد فترة طويلة صراحة جدا حبيتو. و تاني شي جمبو بنسل ابيض برضو لي كم استخدام ممكن داخل العين او كبيس او برايمر للعين قبل الشدو عشان لون الشادو يصير اوضح. الاتنين سعرهم ٣٥ ريال للواحد

ستاي مات باودر من ريميل ❤️ افضل بودرة عندي مرة حلوة و ما تكتل استخدمها عشان اثبت الاساس او اذا حسيت ان في لمعة في وجهي لان لما كنت استخدم بي بي كريم من غارنييه كان مرة يديني لمعة و مو يعني ديوي لوك لا لمعة زيت :( فا كنت احطها طبعا. سعرها في الاربعين اعتقد.

ميبيلين كلور تاتو مرة حلوة تنفع كبيس قبل الشادو او كشادو كريمي لحالو يعني ممكن لما تكوني مستعجلة تحطي منها على الجفن و تغنيكي عن الشادو و مرة بيغمنتد و تقعد فترة طووويلة ما تروح عندي ٦ الوان بس هدي اكتر لونين استخدمها الروز غولد و الغولد.

فرش ريل تكنيك فرش مرة مشهورة طبعا و تستاهل صراحة شعرها صناعي بس مرة ناعم و شعرها ما يتساقط عندي مجموعة العين و مجموعة الوجه و مجموعة متفرقة و حقة الاي لاينر السيلكون و كلها حبيتها ضروري كل بنت تكون عنها منها في رأي و سعرها مرة كويس بالنسبة لجودتها تقريبا المجموعات ١١٠-١٣٠ ريال و السيلكون تنباع لوحدها ٤٩ ريال موجودة في صيدلية وايتس و عند التاجرات في انستقرام 

هدي الارواج اقدر اقول ارواجي المفضلة ❤️ ميبيلين كلور سنسيشنال الوانها جناااااان و ثباتها تقريبا بين ٢-٤ ساعات كريمية و ما تنشف الشفايف.

ريفلون كلور برست تاني ارواج مفضلة عندي من الدرغستور برضو الوانها مرررة جميلة و بقمنتد و تقعد فترة طويلة و ما تنشف الشفايف. في منها كم نوع اللاكر بالم هي الي تجي على قلوسية شوية و فيها لمعة اول اتنين من اليسار و عندي كمان المات بالم اخر واحد يمين تكون مات طبعا و في كمان ليب ستين هدا ما جربتو بس يجي لونو خفيف زي المرطب.

و اتمنى تكون عجبتكم ❤️