سلام حبايبي اليوم حابة اتكلم عن موضوع مرة مهم لازم تعرفوا كل بنت عشان تعرف تفرق لما تختار منتج. الموضوع هو تعريف كل نوع لوشن، كريم، سيرم و زي كدة لان لاحظت كتير يخربطوا بينها يعني اتكلم عن كريم البنات يحسبوا لوشن و زي كدة، فا قلت خليني اكتب عن الفرق بينهم.
١. الكريم cream: هو تقريبا شبه صلب نصفو موية و نصفو زيوت. و تقريبا هو اكتر شي مستخدم، يستخدم بسهولة و البشرة تمتصو بسرعة و يروح مع الموية. تقريبا تقيل بشكل متوسط و مرة يرطب بدون ما تحسي شي تقيل على البشرة و غالبا يكون في انبوب او علبة و ما يكون في ضغاط لانو تقيل.
٢. اللوشن lotion: هو الي اخف من الكريمات و يكوو في ضغاط و اغلب تركيبو موية. بسرعة تمتصو البشرة اسرع من الكريم و مرة خفيف على البشرة و ترطيبهو اقل من الكريم. و اسهل في التوزيع على الاماكن الي فيها شعر زي الرجول.
٣. المرهم ointment: هو٨٠٪ زيت و ٢٠٪ موية. هدا مرة دهني ما تمتصو البشرة بسرعة و ما يتوزع بسهولة و هو يحبس الترطيب و الحرارة بشكل جيد. و اذا المكونات نفسها موجودة في الكريم و اللوشن و المرهم اقواها راح يكون المرهم.
٤. الجل gel: هو زي المستحلب فيلو زيوت مذابة في ماء و غالبا يكون اساسو الكحول. تقريبا ملمسو لما تحطي ما يكون دهني و يكون مرة خفيف. و زي اللوشن سهل توزيعو خاصة على الاماكن الي فيها شعر. و هو يجفف البشرة مرة.
٥. الرغوة foam: هي تقريبا فقاعات غاز مضغوطة في خليط من الغشاء السائل <<< صدعت و انا اترجمها خخخخخخ هي اسهل شي للتوزيع من باقي الانواع خاصة في المناطق الي صعب توصليلها زي الضهر.
٦. السيرم serum: غالبا يستخدم للوجه و مكوناتو نشطة و مركزة عشان كدة تتغلغل بالبشرة بشكل قوي و تقريبا قوامو يكون سائل غالبا.
٧. مستحلب emulsion: مرطب خفيف غالباً يكون للبشرتهم مختلطة او دهنية لان تركيبتو مرة خفيفة بس يرطب بشكل جيد.
ليست هناك تعليقات:
إرسال تعليق