الأربعاء، 12 نوفمبر 2014

نصائح منوعة للعناية بالبشرة (الجزء الأول)







هدي نصائح منوعة و مختلفة للحفاظ على البشرة كل فترة و فترة حنزل نصائح منوعة و ان شاء الله تستفيدوا منها:

١. امسحي جوالك دايماً بمناديل معقمة خاصة اذا انتي من النوع الي تتكلمي كتير على الجوال لان ممكن ملامسة الجوال لوجهك لمدة طويلة يسبب حبوب و طفح جلدي.

٢. غطي وجهك لما تبخي شعرك بسبري لأن البقايا ممكن تضر بشرتك.

٣. قلة النوم ممكن تسبب قلق و القلق يسبب حبوب و و يخلي بشرتك باهتة عشان كدة حاولي تاخدي كفايتك من النوم قد ما تقدري.

٤. لما تغمضي نص عينك بسبب اشعة الشمس هدي الحركة من مسببات رجال الغراب او التجاعيد الي جنب العينين عشان كدة دايماً البسي نضارة شمسية لما تتعرضي لأشعة الشمس المباشرة و ضروري تكون فيها حماية من اشعة فوق البنفسجية او UV protected.

٥. الجلد حولين عينك هو اخف شي و اول شي يبان في علامات التقدم بالعمر فا حاولي تبدأي بمنتجات مضادة التجاعيد من بدري و يفضل من العشرين.

٦. التقشير جداً مهم للبشرة عشان تشيلي الجلد الميت و راح يعطي بشرتك اشراقة.

٧. اهتمامك في الترطيب شي جميل بس كل شي زايد عن حدو ينقلب ضدو فا الزيادة في الترطيب ممكن تسبب طفح جلدي او حبوب او ممكن تسبب المليا او الدخنيات و هي بقع بيضة تتكون لما الجلد الميت ينحبس تحت الجلد.

٨. البكتريا الي تتجمع على الفرش الوسخة تسبب حبوب و طفح جلدي عشان كدة احرصي على تنضيف فرش المكياج.

٩. اذا بشرتك حساسة قبل ما تستخدمي اي منتج خاصة اذا كان غير مخصص للبشرة الحساسة لازم تجربي اول على جزء من جسمك و جربي على مفصل اليد من جوا يعني جهة العروق و قبل ما تستخدمي ب٢٤ ساعة عشان تتأكدي انك ما تتحسسي منو.

١٠. اعملي تقشير زيادة لجسمك بفرشة ناشفة مخصصة للجسم و جسمك ناشف هدا يشيلك الجلد الميت زيادة و يحسن من الدورة الدموية. بعدها رطبي جسمك بلوشن قوي للجسم.

١١. تقشير الوجه ما يكون يومياً ابداً لأنو يخلي الوجه يتحسس بشكل اكبر من الشمس و منتجات البشرة فا لازم يكون من مرتين لتلاتة بالكتير بالاسبوع في الصيف و مرة في الاسبوع بالشتاء. 

١٢. الكافيين من اسباب جفاف البشرة ممكن حتى مع الترطيب تلاقي بشرتك برضو جافة كلو بسبب كثرة الكافين.

١٣. واقي الشمس مو شرط للبشرة البيضا حتى الي بشرتهم سمرا او غامقة ضروري يحطو واقي شمس.

١٤. لما تحطي كريم عيون حاولي تعملي مساج بشكل دائري في منطقة الهالات السودة هدي الحركة تساعد على تحفيز الدورة الدموية في منطقة العين و تخفف الهالات.

هناك 4 تعليقات:

  1. يعطيك العافيه النصايح خفيفه وحلوه أشياء كثير تتكرر كل يوم وبهملها ، وشكرن وبانتظار التدوينات الباقيه ❤❤❤

    ردحذف
    الردود
    1. تسلمي حبيبتي ربي يسعدك على ردك الجميل

      حذف
  2. الله يعطيكي العافية....معلومات مفيدة

    ردحذف
  3. ماشاء الله معلومات مفيده مره شكرا❤️

    ردحذف