سلام حبايبي ❤️اليوم بتكلم عن عنايتي التامة في الشتاء (: أنا بشرتي جاااافة و وقت الشتاء أنتمي إلى الزواحف xD ههههه فا مرة أكثف عنايتي و أزيد مرات الترطيب في اليوم عن العادة، من دحين بدأت أحس جسمي بدا يجف زيادة عن العادة :( فا راح أقلكم اليوم ايش اعمل من شعري الين رجولي و انتو بكرامة و طبعا نسبة كبيرة من الترطيب تكون بعد الشاور أو الإستحمام فا راح أذكرلكم ايش اسوي لما أخد شاور مكثف. سامحوني على التصوير ترى مرة ما أفلح في التصوير >_<.
بالنسبة لشعري قبل كل استحمام أعمل حمام زيت أو حمام كريم، بالنسبة للزيت أستخدم خلطة زيوت الي هي زيت الصبار و جوز الهند و الثوم من فاتيكا و زيت اللوز المر من العطار و زيت الأرقان من ناو فود اخدتو من تاجرة خلطتهم مع بعض و حطيتها في بخاخ. و بالنسبة للكريم استخدم لوريال بزيت الأرقان جدا جميل و برضو استخدمو كترطيب لبعد الاستحام و طبعا لازم لما تعملي حمام زيت او كريم تغطي شعرك بكاب الاستحمام او قبعة الاستحمام عشان شعرك يستفيد منو اكتر.
نبدأ بالاستحام اول شي طبعا ابدأ بشعري اغسلو بكلنسر او شامبو من اي برو تكلمت عنو قبل بحسابي في الانستقرام و غالبا اغسلو مرتين عشان الزيت يروح مزبوط و اقعد اعمل مساج لراسي و ادعك فروتي مزبوط بعدين احط الهايدريتر او البلسم على شعري و اخلي من ٣-٥ دقايق و بعدين احط ماسك الشعر بزيت الارقان و برضو اخلي ٥ دقايق تقريبا.
اغسل جسمي بي بدي واش من سوب اند قلوري و اغسل المنطقة الحساسة بغسول سيتاروز.
بعدها أبدأ بالتقشير اسوي لما اكون حاطة على شعري البلسم اقشر جسمي بي بيركفاست سكرب من سوب اند قلوري مرة جميل ريحتو حلوة و في زبدة شيا و شوفان و اكتر شي يعجبني انو يرطب جسمي كمان ما يخلي جاف زي بعض المقشرات و لما احط المقشر ادعكو في جسمي كلو بيدي بعدين البس هدي القلفز من سنتربوينت و ادعك جسمي زيادة.
و لما اخلص من تقشير جسمي احط ماسك الشعر و ابدا برجلي و وجهي، اقشر وجهي بمقشر كلين اند كلير و بعدين رجولي بمقشر من بودي شوب. بعدها خلاص اغسل جسمي مزبوط و شعري.
بعد الاستحمام احط خلطة مزيل العرق اتكلمت عنها قبل في حسابي برضو و ارطب شعري بكريم بديل الزيت حق لوريال. و ابنس شعري عشان ما يسير كرلي لا احد يسألني كيف ابنس ما اعرف اشرحها خخخخخ بس اكيد امهاتكم يعرفوها لان ماما علمتني عليها xD تخلي شعرك مفرود كأنك مسشورة لان انا ما اسشور شعري غير في المناسبات الكبيرة و طبعا يختلف كيف شعرك يسير من شعر لشعر.
بالنسبة لترطيب جسمي عندي كم نوع هههه احب اغير، هدي للترطيب القوي لما احس جسمي مرة يبغالو ترطيب استخدم زبدة الشيا في جسمي كلو بعدين ابخ زيت الاطفال او استخدم زبدة الجسم بزيت الارقان من بودي شوب و ابخ فوقو بخاخ زيت الارقان من برضو بودي شوب
اذا حسيت ان جسمي في ترطيب و ابغى ترطيب دلع xD استخدم هدا اللوشن من سوب اند قلوري او كريم الفراولة من بوتس. سمعت ان اللوشنات المعطرة تسمر الجسم مدري صح ولا لا xD؟
بعدين ارطب رجولي بكريم بودي شوب بالنعناع و وجهي احب ارطبو قبل النوم احط كريم كيو في و اوقات اخلطو مع زيت فيتامين هـ يديني ترطيب مرة عالي برضو على حسب نسبة الجفاف في وجهي و تقريبا في الشتا مرتين ارطب وجهي غالبا بس مرة وحدة. و بعض الاحيان احس بجفاف في مناطق معينة زي تحت و فوق فمي فا احط عليها بس اذا لقيت باقي وجهي ما يبغالوا ترطيب.
و يوميا اول ما اصحى اغسل وجهي بالصابونة هدي بزبدة المنجا و الشيا و زبدة الكاكاو و فيتامين ج مرة روووعة راح تكلمت عنها برضو (:.
بالنسبة لترطيب عيوني استخدم كريم نيفيا قريب جبتو و تحت التجربة و اخلطو مع زيت فيتامين هـ و احطو قبل النوم و لما اصحى استخدم مرطب بفيتامين هـ لعيوني بعد ما اغسل وجهي بالصابونة.
اخر شي يديني سرت ما اغسلها الا بديتول العناية بالبشرة مرة ممتاز في نسبة ترطيب و ما ينشف يدي بعد الغسيل زي باقي انواع الصابون و ارطبها دايما بكريم زبدة الشيا بريحة الورد من لوكسيتان و الكيوتكل او الجلد الي حولين الاضافير ارطبو ببخاخ زيت الارقان من بودي شوب او زيت الارقان من ناو فود. و طبعا كريم اليدين دايما معايا كل ما احتاج ترطيب احط منو.
و بكدة اكون خلصت اتمنى يعجبكم الموضوع ❤️
ليست هناك تعليقات:
إرسال تعليق