الخميس، 20 نوفمبر، 2014

اسمرار المنطقة الحساسة و الطرق العناية بها


سلام حبايبي اليوم حابة اتكلم عن موضوع سمار المنطقة الحساسة و الفخود من جوة جاني طلب كتير عن داه الموضوع مرة و كتير يعانو منو فا حبيت اقلكم عن طرق تساعدكم اول شي ابغى اتكلم عن اسباب سمار المنطقة الحساسة:


١. استخدام ملابس داخلية غير قطنية كتير زي الساتان و الحرير لانها ما تشفط العرق كويس زي القطنية و العرق يسبب اسمرار للمنطقة.

٢. استخدام بناطيل ضيقة و غامقة كتير.

٣. مافي مسافة بين الفخود يعني فخودك لاصقة في بعض.

٤. استخدام امواس قديمة يعني تستخدمي الموس اكتر من مرة و هدا خطأ لازم تستخدمي الموس مرة وحدة بس و ترمي بعدها.

٥. المشي الكتيرررر.

٦. عدم العناية بالمنطقة الحساسة.

هدي من بعض الاسباب و في اسباب كتيررر. نجي للحلول اول شي و قبل كل شي بصراحة ما جربت اي من العلاجات ديه عشان اكون امينة بس بصراحة جاني طلب كتير على الموضوع و مو هاين عليا اردكم و خاصة ان في بعضكم عرايس و يبغوا حل فا حاولت اجبلكم حلول طبيعية و ما تضر ان شاء الله يعني كلها اشياء طبيعية و كالعادة انا ضد الخلطات و كريمات التبيض و و و احسن شي تسوي بنفسك انتي و تعالجي نفسك بنفسك. في منكم قال عن التقشيرات في العيادات و كدة هدي ما اعرف عنها ولا جربتها و ما افكر اجربها لان اول شي استحي خخخخخ تاني شي احس مافي احسن من الطبيعي اضمن و حتى لو ما نفع لا سمح الله ما تضري نفسك او تخسري مبالغ على الفاضي. و اكرر انا ما جربت ولا طريقة بس ان شاء الله تستفيدوا منها. 


نجي لطرق تفتيح المنطقة الحساسة و ممكن تستخدميها كمان في منطقة الفخود من جوة و كمان في المؤخرة. اول شي اذا حسيتي باي حساسية او التهاب وقفي اي شي تجربي و افضل شي تجربي قبلها على منطقة بسيطة و لا تسوي اي شي و انتي دوبك حالقة المنطقة عشان تكون متهيجة. و لازم يومياً تلتزمي عشان تبان النتيجة و تاخد وقت ترى و صبر لان العلاجات الطبيعية تاخد وقت شوية و على حسب مدى سمار المنطقة ممكن تقعد ٦ شهور! اهم شي الالتزام.
و انتبهي لا تدخلي اي شي لجوة يعني بس من برة تستخدمي العلاجات يارب فهمتوني عشان استحي اشرح زيادة 😭.

١. جوز الهند: في خواص مبيضة طبيعية ممكن تستخدمي موية جوز الهند نفسها او زيت جوز الهند اهم شي اتأكدوا انو طبيعي ١٠٠٪ و مافي عطور. تدهني المنطقة و تعمليلها مساج لمدة ١٥-٢٠ دقيقة الين تحسي الجلد امتص السائل كلو و يفضل يومياً عشان النتيجة تكون احسن و بعدين غسليها بموية باردة بس بدون صابون عشان لا يروح المفعول.

٢. البابايا: برضو فيها خواص مبيضة استخدمي الفاكهة انك تدهني المنطقة بيها و تخليها لمدة ١٠-٢٠ دقيقة و تغسلي بعدها او صابونة البابايا و برضو اتأكدي انها طبيعية و مافيها عطور و برضو استخدمي يومياً.

٣. الطماطم: برضو فيها خواص مبيضة و نفس طريقة البابايا تدهني بمعجون الطاطم المنطقة و تخليها لمدة ١٠-٢٠ دقيقة و تغسلي بعدها.

٤. لبن زبادي: استخدمي لبن زبادي و كم نقطة ليمون و تدهني المناطق و تخليها لمدة ٢٠ دقيقة بعدين تغسليها.

٥. عصير ليمون و كركم: الاتنين فيهم خواص مبيضة ادهني فيها المناطق و خلي لمدة ١٥ دقيقة و غسلي بعدها.

٦. لبن زبادي مع قشر برتقال مجفف: تجففي قشر برتقال و بعدين تطحني و تخلطي مع ليمون و تدهني المناطق و تخلي لمدة ٢٠ دقيقة و تغسلي بعدها.

٧. النعناع: تطحني اوراق نعناع طازة و تدهني المناطق و تخليها لمدة ١٥ دقيقة و غسلي المنطقة بالموية.

٨. شوفان و لبن: برضو تخلطيهم و تدهني المنطقة.


نجي لطرق العناية بالمنطقة الحساسة:

١. اول شي و ضروري كل ما تدخلي الحمام و انتوا بكرامة تنشفي المنطقة بعد الغسيل و افضل مناديل تكون قوية مو من النوع الي يتقطع بسرعة عندك فاين و كلينكس افضل شي لانها قوية لان اذا نشفي بمناديل تتقطع ممكن تدخل لجوة و تضرك.

٢. الغسووول ضروري تستخدمي غسول للمنطقة بس مو يومياً! لان كترتو تقتل البكتريا المفيدة في المنطقة و تسبب التهابات. مرتين في الاسبوع كويس.

٣. مرة في الاسبوع غسلي المنطقة بموية دافية و ملح خشن عشان يعقم.

٤. اذا انتي عندك افرازات كتير حاولي تستخدمي الفوط اليومية زي كير فري لان كترتها تسبب التهابات و سواد.

٥. بعد الدورة لازم تغسلي بالغسول.

٦. حاولي تخلي المنطقة تتنفس يومياً و يفضل وقت النوم.

٧. لا تستخدمي اي مرطبات او صابون في عطور اذا تبغي تغسلي بصابون افضل شي ديتول.

٨. لما تحلقي بالموس احلقي نفس جهة طلوع الشعر مو عكسها لان عكسها يهيج البشرة. و بعدها ادهني كريم سودوكريم حق الاطفال عشان يهديها و ما يطلع حبوب ان شاء الله.

ليست هناك تعليقات:

إرسال تعليق