الأحد، 30 نوفمبر، 2014

مفضلاتي #١



سلام حبايبي اليوم بسوي اول موضوع مفضلات ليا 😁 قبل حطيت موضوع مفضلات من الدرغستور بس هدي مفضلات بشكل عامل ما راح احط كل شهر مفضلات لان انا من النوع الي ما يشتري كل شهر اشياء كتير فا ما اقدر كل شهر اطلع مفضلات جديدة فا كل ما احس سار عندي مفضلات جديدة راح اجمعها في تدوينة وحدة عشان لا تطفشو من تكرار الاشياء. حتكون مقسمة لمفضلات العناية و مفضلات مكياج و مفضلات عشوائية.

١. مفضلات العناية:


اول شي كريم كيو في ❤️ تكلمت عنو قبل في الانستقرام بصراحة ما استغني عنو مرة جدا ترطيبو ممتاز و الحلو في كمان انو طبي و مافي عطور فا ما يضر البشرة و اخلط معاه كمان زيت فيتامين هـ لترطيب افضل.


اسكنول هدا كل ما يخلص حجيب منو مستحيل اسيبو ينضف الرقبة بشكل رهيب و تحسي بنضافة بعدو ينفع كمان لتنضيف الركب و الاكواع عشان تفتح.


مرطب الشفايف من نيتروجينا جميل و مرة حبيت ترطيبو من اجمل المرطبات الي جربتها و حعمل ريفيو لي ان شاء الله. 


زيت فيتامين هـ اتعب و اقول جميل ❤️ ترطيبو جدا حلو و يغذي البشرة اخلطوا مع كريم كيو في لوجهي و احطوا تحت عيوني للهالات و احطو في حمامات الزيت لشعري.



زيت الارقان برضو استخدمو لشعري و اوقات احطو على وجهي مع كريم كيو في او لوحدو كسيرم و كمان احطو للكيوتكل (الجلد الي حولين الضفر) كترطيب او لما اعمل البدي كير.


غسول الجسم من سينت ايفز بتلاتة انواع زبدة و بريحة الفانيلا اتعب و اقول روعة و تكلمت عنو قبل في حسابي.


٢. مفضلات المكياج:


باليت لوراك ميغا برو ❤️❤️ العشق اتعب و اقول جميلة ❤️ انا من الناس الي ما احب احط اي شادو بس ديه الباليت خلتني ابغى احط دايما مرة الوانها حلوة و ناعمة و واضحة بس عيبها الوحيد يتناثر اللون مرة.


اسنفجة ريل تكنيك، انا من الناس الي اكره اوزع البي بي او السي سي كريم بفرشة خخخخخ فا كنت اوزع باصابيعي دايما بس لما جربت هدي الاسنفجة مرة حبيتها في التوزيع مرة سهلة و تخلي الفنيش مرة مرتب حبيتهااا.



 المصحح من ايلف ❤️ انا من النوع الي لازم الماسكرا تطبع في جفني خخخخخ عيوني مبطنة و دايما تسيرلي ديه الحركة و كنت شوية و ابكي لما تسير فا جبت هدا و سرت امسح التلطيخ في مرة تشيلو بسرعة و بسهولة و ما يبان اثر بس اذا كنت حاطة اي شادو لازم ارجع اعيد ما كان ما مسحت بس برضو اهون من ان اجيب العيد بمزيل المكياج خخخخخ.


مناكير بودي شوب الجديدة، تكلمت عنها قبل و عملت عنها ريفيو مرة عشق و الوانها حلوة و جودتها رهيبة و ماهي مضرة.


٣. مفضلات عشوائية:


فرشة تانقل تيزر ❤️ نفسي اقابل الي اخترعها و ابوس راسو ههههه انا شعري طويل و ناعم ما شاء الله بس مشكلتو يتعقد بسرعة يعني لازم في اليوم امشط كم مرة عشان لا يتعقد. الفرشة مرة تسهل التمشيط و تفك العقد بسرعة و في نفس الوقت تعملي فيها مساج للراس عشان تنشط الدورة الدموية مرة انصح فيها خاصة للبنات الي شعرهم طويل 👍.


عطر التفاح الاخضر من بودي شوب ريحتو انتعاااااش مرة حلوة و ناعمة تنفع للبيت او المدرسة اذا تبخي ريحة خفيفة و حلوة دايما استخدمو في البيت سرت 💕.


القطرة ديه لترطيب العيون، ليا فترة اول ما اصحى من النوم احس كأنو شي داخل في عيني و تقعد عيني تعورني لساعات و مرة اتضايق خاصة لما اكون ابغى اقرا و كدة فا جربت هدي القطرة و سرت احطها لما احس عيني كدة و ثواااني و ما احس بشي على طول الشعور داه يروح الحمدلله.


لا احد يضحك عليا دحين ههههههههه من مفضلاتي هدا البسكوت ❤️❤️❤️ انا من عشاق البسكوت اقدر اعيش من غير شوكلاته او غازيات كل الخرابيط ديه بس بسكوت لا. كنت اشتري داه في لندن و لازم يوميا اكل حبة طبعا حق لندن احلى بس ريحة ابو علي ولا عدمو خخخخ بس برضو هدا لزيز مرة و لازم اجيب منو دايما و اشتري من الدانوب. و عشقي التاني بيرة هولستون بدراغون فروت عشق و روقاااان اشربها و هي باردة يا سلام شي جميل خخخخخ.


اخر شي هدا الشي الكيوووووووت مرة ❤️ اعشق الاشياء الكيوت و وردي كمان عز الطلب هههههه جبتو عشان احط في الموية الحارة لرضاعة ريمان يحفظ حرارة الموية لساعات مرة ممتاز و شكلو كيوووت جبتو من سنتربوينت و سعرو ٣٧ ريال.


و بكدة خلصت مفضلاتي ان شاء الله تكون جميلة و خفيفة عليكم ❤️

ليست هناك تعليقات:

إرسال تعليق