الخميس، 4 ديسمبر، 2014

تفتيح منطقة الابط و كيفية العناية بها



سلام حبايبي 💕 تكلمت قبل عن تفتيح الرقبة، الركب، الاكواع و المنطقة الحساسة، و اليوم ابغى اتكلم عن منطقة الابط و طرق تفتحيها بمواد طبيعية في البيت 👍 زي ما قلت في كل موضوع انا ما ما اصدق خلطات التبيض و كريمات التبيض ديه لان ما تدري ايش فيها و بعضها ممكن يضرك عشان كدة سوي بنفسك احسن 👍.



١. البطاطس: تقدري تستخدمي شريحة بطاطس نحيف و تكون نية طبعا 😂 و تدعكيها في منطقة الابط و اهم شي تكون مغسلة المنطقة كويس قبل او تقدري تطحني البطاطس و تاخدي العصير حقها و تدهني المنطقة و تخلي ١٠ دقايق و تغسلي.

٢. الخيار: نفس طريقة البطاطس تسوي يا شرايح او عصير و تقدري كمان تضيفي كم نقطة عصير ليمون مع عصير الخيار و شوية كركم (الخاص بالبشرة) و تعملي منو معجون و تدهني المنطقة و تخلي نص ساعة و تغسلي.

٣. الليمون: ادهني نص او شريحة ليمونة في الابط و تساعد انها تشيل الجلد الميت من الابط و بعدين غسلي المنطقة و رطبيها لان الليمون مرة يجفف البشرة. 

٤. زيت جوز الهند: يساعد على التفتيح مع الاستخدام بس لازم تستخدمي بشكل يومي. و قبل ما تستحمي مسجي المنطقة بالزيت لمدة ١٠-١٥ دقيقة و غسلي المنطقة بصابون يكون خفيف و موية فاترة. و الجوز الهند كمام يعتبر مزيل عرق طبيعي.


دحين نتكلم عن التقشير الي برضو يساعد على تفتيح المنطقة ان شاء الله. 

١. اخلطي ٣ ملاعق سكر مو شوية زيت زيتون و قشري في المنطقة و انتي تستحمي لمدة دقيقة او دقيقتين و لازم تكون المنطقة مبلولة و حاولي تستخدمي ديه الطريقة مرتين في الاسبوع اقل شي.

٢. تقدري كمان تستخدمي بيكنغ سودا و موية تسوي فيهم زي المعجون و تقشري في و برضو لازم تكون المنطقة مبلولة. و تقدري كمان تخلط مع موية ورد بدال الموية العادية.

٣. تقدري كمان تستخدمي قشر البرتقال، قشري برتقالة و حطي القشر في الشمس الين ينشف و بعدين اطحني و ضيفي علي شوية حليب و شوية موية ورد و قشري في الابط لمدة ١٠-١٥ دقيقة و غسليها بموية باردة.


و هدي مجموعة نصائح تساعدك على الاهتمام بمنطقة الابط:

١. مرة بعدي عن الامواس في منطقة الابط حاولي تستخدمي الحلاوة او الشمع عشان تشيلي الشعر لان الامواس من اكبر اسباب سواد الابط.

٢. استخدام مزيلات العرق المعطرة مرة يسودها فا حاولي تستخدمي مزيلات عرق طبية زي بيزيلين او استخدمي مزيلات عرق طبيعية و حطيت قبل خلطة ازالة عرق طبيعية في حسابي في الانستقرام

٣. في من مسببات السواد مرض السكر فا اذا عندك سكر حاولي تبتعدي عن النشويات و السكريات.

٤. بعض الاحيان حبوب منع الحمل تسبب السواد برضو، اذا حسيتي انو المنطقة سودت من بعد الحبوب حاولي تغيريها لنوع تاني و شوفي اذا تحسنت او لا.

٥. حاولي تهوي المنطقة يومياً اذا قدرتي لان لما تنكتم كتير يسبب سواد.

٦. حافظي على ترطيب المنطقة قد ما تقدري.

٧. اذا انتي من النوع الي تعرقي كتير حاولي تقشري المنطقة اكتر من مرتين بالاسبوع و اذا حسيتي انك عرقتي كتير في اليوم غسليا المنطقة و نشفيها كويس و حطي مزيل العرق حاولي انك ما تخلي العرق يتجمع فيها.

٨. في بعض الاحيان يكون السواد سببو حالة طبية فا اذا حسيتي ان العلاجات كلها ما نفعت ممكن يبغالك علاج طبي.

٩. الصبر و المداااااااومة ما ينفع تستمري كم اسبوع و تقوفي و تقولي مافي نتيجة الموضوع يبغالو استمرار و صبر ممكن ياخد شهوووور عشان تفتح على حسب غمق المنطقة و مداومتك.

اتمنى تكونوا استفدتو من الموضوع ❤️

ليست هناك تعليقات:

إرسال تعليق