الثلاثاء، 3 مارس، 2015

منتجات سوب اند قلوري الي جربتها




سلام حبايبي ❤️ اليوم ابغى اتكلم عن منتجات سوب اند قلوري الي جربتها و رأي عن كل واحد. طبعاً اغلبكم يعرفها لانها مرة مشهورة و انا كنت من الناس الي حموت اجربها من كتر ماني شايفة الناس طايحة فيها خاصة الاجانب يعشقووووها و هي تنباع بس في صيدلية بوتس. للاسف لما جربتها انصدمت لان ما عجبتني ولا حسيتها داك الشي الي يستاهل خاصة سعرها منتج واحد بس الي عجبني و يستاهل كل ريال اما غير كدة لا. اسعارها تتراوح بين ٥٠-١١٠ ريال للاحجام الكبير و في احجام ميني صغيرة على ٢٠-٢٥ ريال. اكبر عيب في منتجاتهم العطرررر ريحة منتجاتهم عطرية مرة فا ما تنفع كاستخدام يومي ابدا ابدا يعني تقولي حقة دلع بس و منتج واحد برضو الي ما حسيتو عطري. المهم نبدأ نتكلم 




Hand Food

هدا كريم لليد اخدت الحجم الصغير عشان اجربو. موجود في زبدة شيا و زيت لوز و مكاديميا يشجع صح؟ بس اول شي ريحتوووو عطررر افتكر اول مرة حطيت كنت خارجة مع زوجي نتمشى الا قالي انتي حاطة عطر!!! قلتلو كريم خخخخخ من كتر ما ريحتو قوية و هي ريحتو حلوة كانها حبحب خخخخخ بالنسبة لترطيبو جداً جداً عادي اول اقل حتى يعني في دقيقة احس يدي جفت ولا كأني حطيت شي و انا بشرتي جافة مرة خاصة يديني. فا مرة ما فادني قعدت بس كدة اخلصو في البيت كل شوي احط. ممكن يناسب الي بشرتهم عادية.


Foam call body Wash 

غسول للجسم ينفع كغسول للجسم او تعملي منو ببل باث (حمام فقاعات خخخخخ) مكوناتو زيت نعناع و بذور العنب و عصير برتقال. ريحتو من جد حمضية يعني برتقال مع ليمون و كدة للاسف الفلاحة حقتي ما شميتو قبل ما اشتري و ما حبيت ريحتو لما جيت :( قاعدة اخلصو بأي طريقة و ما شاء الله كميتو كبيرة مرة 😭😭 مكتوب انو يرطب الجسم بس ما حسيت بداه الشي و برضو معطر بشكل رهيب و المشكلة ما تثبت الريحة! في كم نوع تانية من الغسول بس ما جربتها و ما اعتقد ممكن اجرب بسبب العطور.


The Righteous Butter Body Lotion

لوشن للجسم فيلو زبدة شيا و زيت لوز و صبار و جلسرين و ثمور الورد و فيتامين هـ كاتبين انو في زيادة في التنعيم كمان. ترطيبو وسط ماهو سيئ او قوي و ريحتو حلوة صراحة بس ما تثبت مرة و هدا الغريب مع كمية العطر الي في ابدا ما ينفع كاستخدام يومي يعني ممكن مرة في الاسبوع تستخدمي كدلع بس. اذا تبغي ترطيب قوي ما انصحك في ابدا و كمان كميتو كبيرة و بحاول اخلصو بأي طريقة خخخخخ.


The Breakfast Scrub 

مقشر للجسم فيلو شوفان و زبدة شيا و سكر و في كمان مستخلصات الموز و اللوز و العسل. داه الشي الوحيد الي عشقتووووو من سوب اند قلوري و مستعدة اشتري تاني كمان! جدا جميل ريحتو مرة حلوة و ترطيبو جميييل مرة، اغلب مقشرات الجسم تجففف بس هدا يرطب الجسم مرة و ناعم على الجسم مرة حبيتو صراحة و هو افضل شي في سوب اند قلوري مقشراتهم.


Night in Shining Armour Night Cream

كريم الليل هدا اسوووووء منتج جربتو منهم استخدمتو بس مرتين و وقفتو! هو كريم للوجه طبعا ريحتو عطرييية تصررررع اصلا اول ما شميتو حسيت اني انكتمت من الريحة من قوتها و حطيتو قلت اجرب بس تاني يوم طلعلتي حبوب و قشور بيضة بسببو! قلت اجرب تاني يمكن مو هو عشان قبل كنت حاطة قناع طين اوربي و قلت يالله احط تاني و تزيد الحبوب و القشور!! مرة عدملي وجهي :( و طبعا على طول وقفتوا و اخدت اسبوع يمكن الين رجعت صفيت وجهي تاني نهائيا ما ينفع الجسم ممكن يتحمل العطور بس الوجه مرة لا لانو حساس. فا دحين قاعد كدة على الفاضي و مقهورة على الفلوس الي دفعتها في  الي يعرف طريقة استخدمو في يقولي ههههههه. 


Face Soap and Clarity Vitamin C Facial Wash

اخر منتج هو غسول الوجه بفتامين ج جربتو الين دحين ٣ مرات تنضيفو حلو و يخلي الوجه في اشراقة حلوة بسبب فيتامين ج بسسسسس العطر ريحتو مرة مزعجة و قوووية والله لولا العطر كان يعتبر من الغسولات المفضلة بس ريحتو هي عيبو. مكتوب عليه ينفع لجميع انواع البشرات بس ما افضلو للبشرات الحساسة بسبب العطر. ما اقدر اقول اكرهو ولا احبو يعني نص نص هههههه بس حكمل استخدمو بس راح احاول اخلي مرة في الاسبوع عشان لا يعدم وجهي من العطر.

في الاخير اقول هدي كلها ارائي الشخصية معليش سلبية اغلبها بس احب اكون صريحة في رأي, ممكن البعض عادي عندو العطور و الروائح القوية. انا ماتحملها لان عندي حساسية انف فا تتعبني الروائح و العطور القوية و اتمنى تكونو استفدتو من التدوينة ❤️

ليست هناك تعليقات:

إرسال تعليق