الثلاثاء، 3 مارس 2015

العناية بالأقدام






السلام عليكم حبايبي، اليوم ابغى اتكلم عن العناية بالأقدام كيف تخليها ناعمة و تحافظي عليها. اهم شي في الاقدام المداومة على الاهتمام لان اول ما تهمليها راح تنعدم.

اول شي خلينا نبدأ كيف تشيلي الجلد الميت و العناية بعدين اذكرلكم نصايح مهمة.

اول شي لازم تنقعي رجلك في موية افضل دافية و تقريبا خليها ربع ساعة و تقدري تسوي هدي الطريقة وقت ما تستحمي خلي رجولك اخر شي عشان تكون تنقعت في الموية و الجلد الميت سار لين و ينشال معاكي.

اول شي نضفي رجلك كويس خاصة اذا كنتي جاية من برة و كانت رجلك مكشوفة. استخدمي زي هدي الفرشة تنضفلك مرة.





بعدين تبدأي في التقشير استخدمي مقشر يكون قوي للرجل انا احب استخدم مقشر بودي شوب الي على اليمين جدا جدا ممتاز و فعلا حسيت بفرق منو او تقدري تستخدمي مقشر جسمك و حطي على رجلك كلها حتى من فوق و تحت القدم و بعدين استخدمي هدي الاداة او ممكن بليفة خشنة شوية




هدي اخدتها من بودي شوب. و ادعكي رجلك فوق و ركزي على الاماكن الجافة و غالبا تكون كعب الرجل و مقدمة الرجل جهة الاصباع الابهام. 

بعدها غسلي رجلك من المقشر و ادعكيها بهدي الاداة انا اسميها حجر 😁 





هدي من بودي شوب بس في اماكن كتيرة تبيعها و ليها اشكال كتيرة و تلقي في الصيدلية اشكال و الوان 😁 و دعكي رجلك في عشان تشيلي الجلد الميت و برضو ركزي على المناطق الجافة.


اخر خطوة و اهم خطوة الترررررطيب يوميا لازم ترطبي رجلك قبل النوم و استخدمي كريمات قوية اللوشن ترى ما يسوي شي للرجل لازم تكون كريم او زبدة تقيلة عندك خيارات كتيرة. من اليمين اول شي زبدة بودي شوب للرجول بالنعناع جدا جميلة و استخدمها بعد كل استحمام، زبدة الشيا الخام ترطيبها تقيل و تقدري تستخدمي اي نوع زبدة خام، زبدة الكاكاو الخام برضو تقدري تستخدمي اي نوع (هدي ريحتها ما عجبتني 😷) اخر شي حبيب الكل الفازلين. و ضروري بعد الترطيب تلبسي شراب مريح عشان رجل تحتفظ بالرطوبة و لا يكون ماسك على رجلك عشان الدورة الدموية.

دحين نجي لبعض النصايح المهمة:

١. حاولي لا تخلي رجلك مكشوفة لما تخرجي اماكن زي جامعة، سوق، حدايق يعني لا تلبسي صندل حاولي تلبسي شوز فلات او رياضي افضل لان الرجل كل ما خليتيها مكشوفة راح تجف عليكي اكتر. الصنادل افضل تلبسيها لما تكوني رايحة زيارة و كدة. يعني مكان ما تتعرضي في لغبار او اسفلت و كدة.

٢. حافظي على الترطيب اول ما تهملي تلاقي رجلك على طول خشنت لان الرجل اكتر جزء من جسمك متعرض للجفاف زي اليدين.

٣. حاولي كل استحمام تقشري رجلك لان برضو مهم عشان تشيلي الجلد الميت اول بأول.

٤. اذا بيتك بلاط او سيراميك او برسلان و كدة لازم تلبسي سلبر او شبشب الله يكرمكم لا تمشي حفاينة مرة.

٥. كل ما تخرجي من البيت و ترجعي غسلي رجلك كويس بالصابون او غسول وجه عندك ما عجبك و لا تنسي بين اصابعك تنضفي. و الافضل يوميا تغسليها.

٦. اذا رجلك من النوع الي تطلعلها ريحة الله يكرمكم حاولي تستخدمي معطرات الاحذية في منها بسنتر بوينت و في بودي شوب في بخاخ للرجل يتخلص من الريحة برضو و خلي شوزاتك دايما تتهوى و ممكن تحطي فيها ورقة من جريدة و راح تمتص الريحة (بس اتأكدي ان مافيها اسم الله)

٧. حاولي تسوي بنفسك البدي كير لان بالصوالين ما تدري كيف الادوات عندهم هل معقمة او لا.  

اتمنى تعجبكم و و تستفيدوا ❤️

ليست هناك تعليقات:

إرسال تعليق