الأربعاء، 17 ديسمبر، 2014

الاهتمام بالشعر الجاف و النافش




السلام عليكم حبايبي ❤️ اليوم ابغى اتكلم عن الشعر الجاف و النافش و الي مافي حياة و كيف تعتني في و تخلي افضل بإذن الله.

١. اول شي اهتمي بطريقة اكلك و اشربي موية! كتير يكون السبب سوء تغذية ما بتاكلي اشياء مفيدة كتير فا هدا راح يأثر طبيعي على شعرك و حتى بشرتك.

٢. تاني شي من اهم الاشياء الي لازم تعمليها هي حمامات الزيوت جدا جدا مهمة. انا كنت من النوع الي اكره الزيوت و مستحيل احط زيت في شعري و اقرف و حالة بس شعري كان ميت و مافي اي حياة و مرة ينفش و جااااف فا جيت على نفسي و بدأت اعمل حمامات زيوت مرتين في الاسبوع لما شفت كيف النتيجة اتحمست زيادة 😍 سرت بس ابغى اعمل حمامات زيوت.

طريقة عمل حمام الزيت؟


اول شي جيبي الزيوت الي تعجبك انا استخدم هدي الزيوت الي فوق الي هي زيت الثوم و زيت جوز الهند و زيت الصبار و زيت اللوز و زيت الارغان و اخلطهم و احطهم في بخاخ زي داه الي تحت.



و ادفيهم قبل ما احطهم على راسي تقدري تدفي في حمام مائي او بالمايكرويف. ضروري تدفي عشان الزيت الدافي يفتح المسامات و يخليها تستفيد اكتر من الزيت و بعدين ركزي على الفروة و حطي عليها و بعدين انزلي على باقي الشعر و الاطراف بعد ما تحطي الزيت اقعدي اعملي مساج للفروة باطراف اصابعك لمدة ٥-١٠ دقايق و بعدين غطي شعرك بطاقية الاستحمام



هذي الخطوة برضو مهمة عشان شعرك يستفيد من الزيت و خلي على شعرك لمدة ساعتين اقل شي بعدين غسلي شعرك عادي و اوقات تضطري تغسلي اكتر من مرة عشان يروح الزيت و غسلي بموية مايلة للبرودة عشان تقفل المسامات و ابعدي عن الموية الحارة لانها تنشف الشعر و تقصفو.

٣. الترررررطيب جداً مهم بعد الاستحمام ضروري ترطبي شعرك بزيت او كريم انا استخدم لوريال بديل الزيت بزيت الارغان مرة مرتاحة علي ترطيبوا جميل و ما يخلي الشعر يدهن و اوقات شعري احسوا نافش شوية و يكون ناشف مو مبلل و برضو استخدموا عادي. تقدري تستخدمي زيوت خفيفة زي الارقان و جوز الهند و الافكادو مرة ترطب الشعر و ما تدهنوا بس افضل يكون طبيعي ١٠٠٪ 

٤. حاولي تخففي استشوار قد ما تقدري لان راح يضر شعرك استخدمي اذا مضطرة و حاولي تسوي ديه الطريقة في الفيديو


تخلي شعرك كانو مسشور ستريت تكلمت عنها في حسابي في الانستقرام شوفوا التفاصيل هناك.

٥. استخدموا شامبو من غير سولفات لان يضر الشعر و حاولي يكون في زيوت زي مثلا زيت جوز الهند او زيت الارغان او زيت السمسم عشان تكون نسبة الترطيب اعلى.

٦. استخدمي بلسم بعد الشامبو بس لا تحطي على الفروة بس حطي على نص شعرك الين الاطراف و يفضل يكون البروتين في عالي عشان يديكي نتيجة افضل.



٧. لا تمشطي شعرك كتير لان كترة التمشيط تشد الشعر و تخلي يتقصف و اذا حسيتي يبغالو تمشيط بللي يدك و مرري اصابعك بين شعرك كانك تمشطي يساعد انو يخفف النفشة و كمان ما تعدمي شعرك من كترة التمشيط.

٨. استخدمي خل التفاح لان مرة يرطب الشعر و ينضفوا و يزيل القشرة اذا تعاني منها و في طريقتين يا انك تحطي على قطنة خل و تمسحي على شعرك و تخلي ٥-١٠ دقايق ى تغسلي او تحطي تلت كاسة خل مع ليتر موية و تغسلي فيها شعرك بعد الشامبو.

٩. من الماسكات الجميلة للشعر قبل الاستحمام هو بياض البيض و زيت الزيتون لان البيض في كمية بروتين عالية ترطب الشعر. اخلطي بياض بيضتين مع شوية زيت زيتون و حطي على شعرك و غطي بطاقية الاستحمام و خلي لمدة ساعة و غسلي بعدين. 

١٠. زيت الزيتون جداً مفيد خاصة للشعر الجاف لان يغذي و يرطبو استخدمي كحمام زيت قبل الاستحمام. لكن اذا شعرك مصبوغ ما ينفع زيت زيتون.

١١. المايونيز جدا جميل برضو للشعر الجاف و مرة يرطب. حطي تلت كاسة مايونيز كامل الدسم على شعرك و مسجي كويس و غطي و خلي نص ساعة بعدين غسلي. و تقدري تضيفي معاه زيت مثلا زيت لوز.

١٢. الافكادو مررة روعة و تقدري تعملي في ماسكات كتيرة تخلطي مع مايونيز او مع لبن او مع زيت جوز هند و راح يديكي ترطيب عالي.

١٣. من الزيوت الي برضو تقدري تستخدميها كحمام زيت: زيت اللوز المر، زيت ارقان، زيت الخروع.

١٤. لا تستخدمي مشط اسنانو بلاستيك لان يضر الشعر. ولا تمشطي و هو مبلل و افضل تستخدمي الويت برش مرة كويسة للشعر المبلل و ما تعدموا.

١٥. حاولي كل كم شهر تقصي من اطرافو عشان يسير صحي اكتر.

١٦. الموز برضو مفيد للشعر لان في كمية بوتاسيوم عالية و تغذي الشعر و تقدري تستخدمي اذا سود بدال ترمي استفيدي منو. اهرسي او حطي بالخلاط و حطي على شعرك لمدة ٢٠-٣٠ دقيقة و غسلي.

و اتمنى انكم استفدتوا من الموضوع ❤️

ليست هناك تعليقات:

إرسال تعليق