الاثنين، 8 ديسمبر 2014

منتجات ندمت اني اشتريتها


السلام عليكم بنات ❤️ اليوم حابة اتكلم عن منتجات اشتريتها و ندمت عليها عشان مثلا ما عجبتني او ما ناسبتني 
و بسم لله نبدأ



اول شي فاونديشن هيلثي ميكس من برجوا اكيد اغلبكم يعشق هدا الفاونديشن 😁 و مشكلتي معاه مو الفاونديشن نفسو بصراحة ما اقدر اذمو المشكلة في اللون انا اخدت افتح درجة منو و طلع غامق عليا و لونو برونزي عليا عشان كدة ما قدرت استخدمو و قاعد جديد زي ماهو 💔 فا لو جربت الدرجة على وجهي قبل كان انتبهت بس للاسف جبتو ايام الهبالة كان ما عندي خبرة وقتها :(


بي بي كريم من غارنييه الكبير للوجه و الصغير للعيون المفروض انو كونسيلر و كوركتر. البي بي كريم زي مشكلة هيلثي ميكس غامق عليا و انا ماخدة فاتح (دحين يقولوا طلعوا درجة فاتح مرة ما جربتها) و مشكلة تانية انو في لمعة مزعجة و انا بشرتي جافة المشكلة مو يعني تقولي ديوي لوك لا كانك مدهنة وجهك زيت 😒 و غير ريحتو مزعجة كمان يدوب استخدمتو كم مرة تمشية حال الين جبت البديل.


مرطبات لابيلو اسوء مرطبات جربتها بس احسها طعم حلو و بس 😂 ترطيبها سيء و ما يقعد مرة جربت كم نوع حتى هدا الزبدة برضو كلها ما تنفع.


برجوا كلور بوست هدي قلوسات مدري ارواج ما اعرف مكانها من الاعراب نفسية طريقة ارواج ريفلون كلور برست بس ما تقارن صراحة. هدي الوانها خفيفة مررررة شايفين كيف السواتش. الاحمر يهون شوية تقدري تستخدمي فوق لون تاني مثلا كقلوس بس كمان ما يقعد يعني لو اكلتي اي شي يروح و التاني مرة مافي لون و ترى عالشفايف غير لونو اخف.


هدي التلاتة ارواج اول واحد من ويت اند وايلد و التانين من ريمل. حق ويت اند وايلد لونو ما ناسبني لما حطيتو حسيت اني باربي مضروبة 😂 جدا جدا مزعج مدري يناسب اي بشرة صراحة بس ما ناسبني كمان اعتقد ما ناسب الاندرتون تبعي. اما حق ريمل في قلتر 😐 مرة مزعج و انا ما احب الارواج القلتر ماهي واضحة في السواتش و كمان الوانها ما ناسبتني.


هدا الاي لاينر من لوريال سوبر لاينر. مرة عريضة فرشتو كانو قلم فلومستر توقعت يكون سهل في الرسم بس بالعكس مرة صعب و ما عرفت ارسم فيه مرة.


قناع للوجه من ان ٧ المفروض يدي اشراقة و لوك فريش للبشرة. اول شي مكتوب انو من النوع البيل اوف يعني يسير كلو طبقة وحدة و تقشريها مدري تشيليها و هو ابدا مو كدة 😂 حاولت كم مرة لازم يتغسل مو ينشال زي ماهو مكتوب و كمان ما يدي نتيجة ولا شفت علي شي صراحة.


تكلمت عن هدي المجموعة قبل في حسابي. من بوتانكس شامبو و بلسم و ماسك للشعر خالية من الباربين و السلوفات. حسيتها مرة عادية او اقل من عادية ما ترطب الشعر و تنضيفها ضعيف ما ناسبتني مرة.


بخاخ زيت الارقان من بودي شوب للجسم و الشعر. ما عجبني مرة للشعر ما يدي نتيجة او شي و للجسم كنت احب استخدمو فوق الزبدة بزيت الارقان بس حسيت بعدين ان ريحتو تقلب بعد فترة تسير ريحة مو طيبة فا وقفت استخدامو 😒.


اخر شي هدا تكلمت عنو قبل امس و عملت ريفيو عنو. من غارنيه عبارة عن زيوت معالجة للشعر، ما ناسبني و مرة نشف شعري.


اخر شي كريم الليل من سوب اند قلوري تكملت عنو في تدوينة قبل. استخدمتو مرتين و عدملي وجهي و طلع حبوب و قشور و وقفتو و دحين قاعد كدة على الفاضي..

و اتمنى تعجبكم التدوينة ❤️


و شكرا حبيبة قلبي @reehab_blog على التصميم الجميل 😍❤️ كلك ذوق 💕💕

هناك تعليقان (2):