الجمعة، 16 يناير، 2015

الآي شادو (ظلال العين) و أنواعها


السلام عليكم حبايبي ❤️ اليوم أبغى اتكلم عن انواع الاي شادو الي هي ظلال العين و هدا الموضوع تابع لسلسلة المكياج خطوة خطوة الي بعملها في حسابي في الانستقرام. سويت الموضوع هنا لان موضوع الاي شادو مرة متشعب و انواع كتير حسيت حيكون كتير احطو في الانستقرام فا قلت احسن احطو هنا 😁.



المهم بسم لله نبدأ


أول شي الاي شادو المات او المطفي هي تكون الوان مافيها اي لمعة او اي شي يعني اللون العادي من غير اضافات. و تنفع للاستخدام اليومي او السهرات.



الاي الشادو الشيمر او اللامعة هي الالوان الي فيها لمعة او بريق هدي تفضل للسهرات لان حيكون مبالغ فيها كاستخدام يومي او خرجة صباحية.



القلتر هي تكون منثورة و لامعة مرة اكثر من الشيمر و الحبيبات حقتها تكون كبيرة مو زي البودرة المنثورة العادية و تستخدم للسهرات فقط. الانواع المنثورة    يبغالها تثبيت كويس و تحتاج بخاخ خاص زي الغرة يكون عشان تتثبت. 

و بعضها يكون كريمي و بعضها سائلة.



الاي شادو الاقلام طبعا تكون على شكل قلم و سهل استخدامها ممكن تستخدم كبيس او اساس للاي شادو او ممكن تستخدم وحدها او مع الاي شادو العادي تكون تركيبتها كريمية تقريبا.



الاي شادو الكريمي هي تكون كريمية و بعضها مات و بعضها شيمر تستخدم كبيس او لوحدها و مع بعض الالوان يبغالها دمج كويس عشانها كريمية.



الاي شادو اللوس او البيقمنت هي تكون بودرة منثورة منها مات و منها شمر و تكون الوانها جدا واضحة بس يبغالها تدريب لان تثبيتها شوية صعب و ممكن مرة تعدم الدنيا عشانها تطيح كتير. الافضل يكون قبلها اساس يعني كريمي عشان تثبت.



الاي شادو البيكد او المخبوز يكون شيمر او مات و يكون منفوخ زي في الصورة يعني مو مسطح زي الاي شادو العادي و ممكن تستخدميها ناشفة او تبللي الفرشة و تستخدميها و اوقات يكون فيه كم لون مع بعض يعني مموجة.



الاي شادو المائية هي الي تستخدم جافة او مبللة و غالبا يكون فيها لمعة.



اخر نوع السائلة يبغالها اسفنجة عشان تقدري تحطيها و تنشف بسرعة فا يبغالك تدمجيها بشكل سريع.

و هدي كل انواع الاي شادو طيب نجي للشركات و كدة. طبعا كل شركة عندها باليتات و غالبا تكون شيمر و مات مع بعض و اوقات شيمر لحال و مات لحال و طبعا كل الالوان ليها. في انواع تنباع لوحدها مفردة زي اللوس و القلتر و الاقلام و السائلة. كتير في اسئلة عن ايش احسن باليت بس هدا السؤال يرجعلك لازم تختاري باليت في الوان تحبي تستخدميها او يكون منوع بالوان مختلفة و الخيارات عندك كتيرة. 

بعض الانواع يكون لازم قبلها برايمر عشان يوضح لونها و بعضها تكون بقمنتد و الوانها جدا واضحة من غير برايمر.

طيب خلينا نشوف بعض الانواع:



اول شي الاقلام هدي بعض الانواع و الماركات هي: ميلان، نارز، نيكس، جوردانا.



بعض انواع البيقمنت او اللوس اي شادو الي هي المنثورة و الانواع هي: ماك، كيكو، ايلف، نيكس.



بعض انواع الاي شادو الكريمية: بوبي براون، ميك اب فوريفر، ميبيلين، تارت، بينفت.



هدي بعض انواع القلتر: نيكس و ميك اب فوريفر و ماكس فاكتور.



الاي شادو المائي: نارز و كيكو



في بعض الشركات مثل ميك اب غيك، ميك اب فوريفر، ماك، انستازيا عندهم اي شادو مفردة يعني تشتري كل واحد لوحدو و تقدري تشرتي منهم باليت و تعبي بالالوان الي تبغيها و منها المات و منها الشيمر.



بعض انواع السائلة: ديور، ايستي لودير، لوراك، سيفورا.

دحين نشوف بعض الباليتات المعروفة الي تجمع بين مات و شيمر.



اربن ديكي عندهم السلسلة المشهورة نيكد و نيكد بسكس و فايس و بعض الباليتات زي ايلكتريك.



لوراك برو ١ و ٢ و لوراك ميغا برو و بعض الباليتات المنوعة زي ان زيبد.


باليتات سلييك


باليتات تو فيسد 


باليتات ذا بالم


هدي باليتات فيها تقريبا اغلب الالوان و درجاتها و سعرها جدا رخيص تنفع للمبتدأت او الي عندها ميزانية محدودة و في منها شيمر و مات. بس يبغالها برايمر قبل عشان توضح الوانها.

و طبعا في انواع اكتر و شركات اكتر بس هدي اشهرها تقريبا. و اتمنى انكم استفدتو ❤️

ليست هناك تعليقات:

إرسال تعليق