السبت، 24 يناير، 2015

مرطبات الشفايف


السلام عليكم حبايبي اليوم بتكلم عن كل مرطبات الشفايف الي جربتها و رأي في كل واحد منها 😁 زي ما انتو شايفن عندي ادمان مرطبات 😂 انا للاسف شفايف جدا جافة و كتير تتشقق فا مرة تتعبني فا كل ما اشوف مرطب جديد اشتري عشان اجربو 😭 المهم يالله نبدأ 😍😍





تكلمت عنها كتير انها من المرطبات الي اكرها مرة ابدا ما ترطب و بالعكس احسها تجفف زيادة بعد فترة و هي مجرد طعم بس العادية تدي لون بس و الزبدة ما تدي لون ما حبيتها مرة ترطيبها اقل من عادي. موجودة في اغلب الاماكن.


مرطبات فيتامين اي جدا جميلة 😍 و معروف فيتامين اي بخواصوا المرطبة العالية. اليمين من بودي شوب و هي من المرطبات الي مرة احبها و احب احطها قبل الروج خاصة المات عشان يجفف الشفايف. التاني من موقع اي هيرب افضل من حق بودي شوب و ترطيبوا اعلى، جدا ممتاز و هو كمان للعين استخدمو في ترطيب عيني و شفايفي قبل المكياج.


هدي المرطبات اسميها ام طعم حلو 😂 اليمين مرطب بودي شوب من مجموعة التفاح الاخضر ترطيبو عادي بس طعمو و ريحتو تجنن 😂 استخدموا لما ابغى ترطيب عادي او بس كدة دلع 🌚. التاني مرطب ايوس جدا علي ضجة بس صراحة ترطيبو وسط كان يعجبني ترطيبو بس بعدين لقيت افضل منو بكتير بس  طعموا برضو لزيز 😂 حقي بالفراولة.


مرطبات اللون بس! هي مرطبات بيبي ليبس، بس تدي لون لا اكتر ولا اقل ما عجبتني احسها تنفع لي اللوك الطبيعي او للمدرسة بس كترطيب لا مرة ما ترطب.


مرطب فازلين للشفايف ترطيبو جميل ماهو ممتاز او واو بس اكتر من العادي استخدموا اوقات قبل النوم.


مرطب نتيروجينا من المرطبات الكويسة الي تعجبني ترطيبها مشكلتو طعمو مرة سيئ و خاصة انو سايل شوية فا مرة تحسي بطعمو بس ترطيبو يقعد فترة طويلة.


زبدة الشيا الخام من لوكستيان هي تقريبا زبدة لكل الجسم بس انا جبت الصغيرة لشفايفي بس ترطيبو مرة عالي بس تقيل ينفع قبل النوم بس لانو مرة تقيل. استخدموا قبل النوم يوميا.


اخر شي حبيب قلبي و افضل مرطب شفايف جربتو و افضلها كلها عندي 😍❤️ مرطب الوي فيرا اتعب و انا اقول ممتاز ممتاز ممتاز يخلي شفايفي مرة ناعمة و يشيل التشققات من جد ممتااااز و مافي ريحة او طعم بس من جد افضل مرطب بينهم كلهم و مرة انصح في! و ترطيبو يستمر فترة طويلة. موجود في الصيدليات

و اتمنى انكم استفدتوا ❤️❤️

ليست هناك تعليقات:

إرسال تعليق