الثلاثاء، 3 مارس، 2015

ريفيو عن قلوسات اناستازيا المات



Anastasia Beverly Hills Matte Lip glosses








شركة انستازيا معروفة بمنتجات الحواجب حقتهم و الكونتور كيت ليهم منتجات تانية بس ما انشهرت زي ديه و قريب طلعوا قلوسات مات جديدة، طبعا انا مو من محبين المات اميل للكريمي اكتر عشان تجفف الشفايف مرة و انا اعاني من شفايفي خلقة. المهم اشتريت ٣ الوان تجربة، انا صراحة اكتر شي لفتني الوانها 😍 عذاب! فا اخترت ديه الالوان اجربها.

سواتشات للألوان من اليمين الي اليسار



Bloodline - Lovely - Party Pink




طيب رأي فيها: 

أول شي لفتني الباكجنغ (التغليف) جدا جميل و احسوا فخم و القلوسات قزاز هدا اول شي حبيتو. تاني شي يسير مات بسرعة يعني اول مرة حطيتو جيت اعدل الا سار مات و ما يتمسح على طول يبغالك مزيل مكياج عشان تعدلي اذا طلع برة. الوانها مرة قوية و واضحة يعني طبقة او طبقتين بالكتير تكفي و تغطيتها قوية. و يقعد فترة طويلة يعني قريب ٥ ساعات الين تحسي انو بهت شوية من النص و الاطراف قاعدة. خلالها اكل و شربت و عادي ما راح ابدا حتى لما غسلت قعد اللون بس بهت بشكل بسيط.

اول ما جربتو حطيتو على شفايفي على طول و سرت حاسة كأن في طبقة على شفايفي يعني مو خفيف ما تحسي في لا، بعدين وحدة قالتلي الله يسعدها جربي حطي مرطب قبلها و حطيت و حسيت ان خف سار خفيف على شفايفي.

عيوبها اول شي مرة صعب يتمسح 💔 يعني تعبت و انا امسح بمزيل مكياج و صابون برضو قاعد على اطراف شفايفي و في خطوط الشفايف اضطريت اقشر شفايفي عشان يروح و برضو قعدت اثار. و تاني عيب تجفف الشفايف مرررة لازم تكوني مرطبتها كويس و مقشرتها قبل.

هل ممكن اشتري الوان زيادة؟ ماني عارفة لسة محتارة لأن الوانها تجنن و لسة في الوان كتير نفسي فيها فا ٧٠٪ ايوة و ٣٠٪ لا بس مو دحين يمكن شوية قدام 😁

في الاخير اتمنى انها عجبتكم التدوينة ❤️

xoxo



ليست هناك تعليقات:

إرسال تعليق