السبت، 21 مارس 2015

مفضلاتي #٢




السلام عليكم حبايبي 💕 اليوم بتكلم عن مفضلاتي بالشهور الي راحت 😁 انا ما اسوي مفضلات كل شهر زي ما قلت قبل لان احس مستحيل كل شهر اقدر الاقي مفضلات جديدة 😂 و ما احب اكرر الاشياء فا كل فترة لما احس سار عندي مفضلات جديدة و عجبتني يسير اسوي بوست عنها 🙊 المهم ما ابغى اطول عليكم و بسم لله نبدأ

١. مفضلات العناية



لوشن الجسم و كريم اليد من Eucerin 

هدي شركة طبية اشتريت منها منتجات من موقع اي هيرب اول شي لوشن الجسم للبشرة الجافة جداً لان انا بشرتي مرة جافة فا اخدت هدا 😁 ترطيبو مرة مرة عالي! بالنسبة لي لوشن ترطيبو ممتاز مرة انا عادة ما احب استخدم اللوشن و احب الكريم عشان ترطيبو اعلى بس هدا ترطيبو مرة ممتاز و استخدمو يوميا قبل النوم و راح اتكلم عنو بشكل اكبر ان شاء الله في ريفيو.

التاني كريم اليد من نفس الشركة برضو روووعة ترطيبو مرة ممتاز و يرطب بقلب اليدين سرت ما استنغي عنو ❤️ بس مشكلتو حجمو مرة صغير اتمنيت اني اخدت ٢ لان جبتو من موقع اي هيرب بس ان شاء الله الاقي عندنا 😭 بس جدا روعة و راح اتكلم عنو برضو بشكل اكبر ان شاء الله



زيت الافكادو من شركة Now

 باستخدموا من فترة بعد الاستحمام و اخلطوا مع لوشن سنت ايفز بفيتامين اي و جدا حبيت ترطيبو اداني ترطيب اقوى و اكبر من اللوشن لوحدو فا احط شوية لوشن و كم نقطة زيت و اخلطها و ادهن فيها جسمي 😍 و ترطيب ولا احلى!



شامبو و بلسم الشعر بجوز الهند من شركة اورقانيكس

احلى و افضل شامبو و بلسم جربتها 👍 ترطيبو عالي مرة و يخفف نفشة الشعر و ريحتو روعة 😍 مع اني ما احب ريحة جوز الهند بس هدا ريحتو مرة جميلة و حسيت شعري تحسن من ناحية النفشة و الترطيب 



مقشر سينت ايفز بالمشمش للبشرة الجافة و الحساسة

الين دحين افضل مقشر جربتو 👍 مرة ممتاز يقشر بقلب و الحبيبات حقتو ماهي خشنة و يدي ترطيب للبشرة يعني ما يجففلي وجهي زي اغلب المقشرات جدا رائع



زيت جاف للكيوتكل 

تكلمت عنو قبل في حسابي في الانستقرام هو عبارة عن زبدة شيا مخلوط مع زيوت فا سار زي الزيت الجاف تحطي على الكيوتكل (الجلد حولين الظفر) و يرطب الجلد مرة فعلا اكتر من رائع و حسيت الكيوتكل مرة تحسنت عندي و ما سار يتكوم جلد جاف زي اول 



دراي شامبو من باتيست

انا شعري جاف بس ليا فترة اعمل حمامات زيت و اوقات شعري يقعد مزيت حتى لما اغسلو كم مرة 🌚 اخس برضو في لمعة زيت فا كنت لما اخرج احط منو و على طول يشيل اللمعة و كمان يدي فوليوم للشعر بس حسيت اذا حطيتو و شعري مافي زيت يروح ينشف شعري عشان كدة استخدمو بس لما يكون مزيت شوية


٢. مفضلات الميك اب



برونرز من سيفورا

انا احب احط برونرز على وجهي كلو بعد الفاونديشن او بي بي كريم عشان يدي دفئ خاصة ان الاندرتون تبعي دافئ و هدا جدا لونو جميل ❤️ و ملمسو مرة ناعم و سار البرونرز المفضل عندي 😍 و معليش شكلو مبهدل عشان طاح مني قبل كم اسبوع و انكسر 💔 هو المفروض يكون بيكد بس تكسر و سار شكلو عادي خخخخخ



انستازيا براو ويز و هايلايتر

قلم الحواجب من انستازيا اتعب و اقول جميل مرة روعة و يدي لوك طبيعي للحواجب و ما يبان انك راسمة و الهايلايتر جهتين جهة شيمر هدي تعملي هايلايت لاخر الحاجب و تعملي اضاءة لي و جهة تانية زي الكونسيلر تقدري تستخدمي عشان تخفي الشعر الزايد او عشان تحددي شكل الحاجب و تخلي مرتب.



كحل بيج من ريمل

هدا كحل ضد الماء بيج من ريمل جدا جميل و فعلا يقعد فترة طويلة مو زي باقي الاكحال الي تتمسح بسرعة، انا استخدموا في خط مدمع العين دايما عشان تدي منظر اكبر للعين و قد ما استخدمت اكحال بيج هدا اكتر واحد طول معايا و ما راح بسرعة. 



ارواج نارز 

سويت تدوينة كاملة عنها ❤️ تلاقوها هنا
كلمة جميلة قليلة عليها 😍 احلى ارواج عندي جدا كريمية و ناعمة و ترطب الشفايف مرة حبيتهااااا



باليت لوراك انزبد للبلاشرات

فيلو ٤ الوان بلاشر ٢ مات و ٢ شيمر مرة جميلة و تحسي ملمسها ناعم زي الزبدة و مر بيقمنتد يعني الوانها مرة قوووية و جا معاها روج نسيت اصوروا خخخخخ برضو لونو جميل و كريمي مرة



ماسكرا سيفورا اوتريجيس فوليوم

تخلي الرموش مقوسة و ما تلصقها في بعض و تدي طول للرموش بس كثافتها عادية يبغالها ماسكرا تكثيف معاها بس جدا جميلة و حبيتها


قفاز تنضيف الفرش من سيقما

يسعد الي اخترعو 😂 روعة روعة مرة يسهل تنضيف الفرش و ينضفها بقلب و يتخلص من كل الصابون الي في الفرش ان شاء الله ناوية اعمل تدوينة عن تنضيف الفرش ان شاء الله 

و بس اتمني تعجبكم

Stay Elegant
xoxo

هناك تعليقان (2):