الأربعاء، 4 مارس، 2015

مشترياتي من موقع iherb


السلام عليكم حبايبي ❤️ قبل كم يوم اشتريت اشياء من اي هيرب 😍 الموقع جدا رائع كل منتجاتو من غير مواد مضرة و طبية او طبيعية او عضوية مرة انصح في صراحة 👍 و اسعارو جدا رائعة و مناسبة للكل. اشتريت منو جبت العيد حتشوفوا 😂 و ماما و اختي اشترو كم شي برضو 


الي ما عجبني صراحة التغليف في اشياء مغلفة بعناية و في اشياء مرمية رمي حتى الصندوق مو مرتب مرمي فوق بعض و لا الجمارك سووا كدة ما ادري بس الحمدلله اهم شي جاني سليم


اول شي المكياج 😍 طلبت فرشة للرموش و الحواجب من ايكوتولز و جبت من فيزيشن فورملا ماسكرا و تينتد مويسترايزر (كريم مرطب ملون) و جبت باكيج كوريكتر فيلو كونسيلر و بودرة للانارة و بودرة منثورة و جبت روج من ايلف في السواتش كان جميل بس ما عجبني على الطبيعة 💔


تاني شي الزيوت 😍❤️ اعشق زيوت شركة ناو فوود طبيعية و عضوية ١٠٠٪ اخدت زيت الخروع و زيت لوز مر و زيت افكادو و زيت الجوجوبا و زيت جوز هند و زيت جنين القمح و زيت ماكديميا. بس الغلطة الي غلطتها ما انتبهت للاحجام نسيت اشيك 😂 شي طلع صغير و شي كبير كنت ابغى اخدو كلو صغير عشان اجرب بس مرة ما انتبهت انا بتكلم عن زيوت ناو فوود بس الباقي لا حجم واحد. بعض الزيوت للبشرة و بعضها جبتها لشعري.


بعدين اخدت (من اليمين) مزيل مكياج العيون نباتي و بعدو سيرم للشعر و الوجه بزيت الارقان و الصغير الي قدامو كريم للكيوتكل (الجلد حولين الاضافر) و الي بعدو مرطب شفايف بالهاروليك اسيد و بعدو حبوب بيوتين للشعر.


(من اليمين) زبدة شيا خام و بعدها كريم بالمرز لعلامات التمدد و بعدو لوشن للجسم شديد الجفاف و بعدو كريم يدين


هدا لريمان ☺️ جبتلها اليمين شامبو و غسول للجسم و اليسار كريم لعلاج التهابات و تهيجات و جفاف البشرة عشان ريمان مسكينة جسمها حساس زيادة عن اللزوم و مرة تطلعلها التهابات كتير بسبب العرق عشانها تحر كتير و جربت كتير كريميات ما تفيد فا جبت هدا اجربو. الشركة هدي طبية و كتير دكاترة جلدية يوصوا فيها و مسووين مجموعة للاطفال .

و ان شاء الله اجربو كلو طبعا و اقلكم رأي فيها 😁 و انصحكم بالموقع 😍 مرة رائع و يوصل دايركت للسعودية عن طريق DHL جاني تقريبا خلال ٥ ايام ما شاء الله بس تحتاجي فيزا للطلب الشحن على حسب الوزن انا تقريبا مجموعي مع اغراض ماما و اختي (ما حطيتها هنا) ١٢٠٠ و شوية و الشحن كلف حوالي ٢٠٠ ريال كلو كان ١٤٤٤ ريال 

ليست هناك تعليقات:

إرسال تعليق