الخميس، 30 أبريل 2015

جلسة تحليل الشخصية و الستايل مع الإستشارية ريهام أبو الفرج




السلام عليكم حبايبي ❤️ اليوم عملت جلسة مع استشارية علم الألوان و المظهر و أخصائية الإتيكيت و البروتوكول ريهام أبو الفرج. هي تابعة لمؤسسة House Of Colour البريطانية و هي شركة رائدة حاصلة على الجائزة العالمية للإستمثار في الفرد و متخصصين في هدا المجال و الأخت ريهام هي استشارية المنطقة الغربية لأن في كل منطقة في المملكة استشارية واحدة تابعة للمؤسسة

جلستي كانت تحليل الشخصية عشان تعرف أنا ايش ستايلي في اللبس لأن هم مقسمين الشخصيات إلى ٦ شخصيات رئيسية و هي:

Romantic الرومنسية
Classic كلاسيك
Natural الطبيعية
Gamine كلمة فرنسية معناها الولد الصغير
Ingenue كلمة فرنسية معناها الأميرة الصغيرة
Dramtic الدرامية 

و تتفرع منها ٢٦ شخصية فرعية 

اول شي ادتني دفتر عشان اخد في ملاحظات و ورتني في بعدين الستايل الي يناسبني و ايش اختار و ايش لا



طريقة التحليل انها تقعد معاكي و تسألك اسئلة و تشوف شكل جسمك و الوجه و زي كدة. الأسئلة تساعدها على دراسة شخصيتك و مثلا تديكي مواقف و تقلك لو سار كدة ايش راح تكون ردة فعلك؟ و اسئلة زي انتي شخصية مرتبة أو لا؟ هل ليكي حضور قوي او متوسط او ضعيف؟ هل أنت عصبية أو لا؟ زي كدة الين تكون عندها نقاط الي تساعدها في التحليل

طبعا هي أول شي تكلمت عن نظرية الين و اليانغ الصينية 



الي هي أن مافي شخصية مطلقة يعني مافي شخصية مثلا وحشة ١٠٠٪ لازم يكون في شي حلو و مافي شخصية حلوة ١٠٠٪ لازم فيها شي وحش

و الين تدل على أمور معينة زي المشاعر الدافئة و الحساسية و الينغ مثلا المشاعر الباردة الخ و تشرحلك هي بالتفصيل. و الين تدل على النعومة و اليانغ تدل على الذكورة، بس مو معناه اذا انتي مثلا اليانغ عندك اعلى معناها شيئ سيئ لا بالعكس المهم انها شرحتلي الموضوع كامل و فهمتني النظرية. هدي النظرية تساعدها على فهم شخصيتك برضو.

بعد ما قعدت معايا فهمت شخصيتي و طلعت شخصيتي 

Ingenue Natural

يعني طفولية و طبيعية 😁



و اعطتني شرح لشخصيتي و طبعا شرحتو كامل بالعربي و تقلك ايش يناسبك من نقشات او تصميم شنط او طريقة لبس و نوع الاقمشة و فعلا والله هي بتقولي تحبي كدة و ما تحبي كدة او ما تناسبك و انا بقلها من جد انا ما احب ديه الاشياء و دايما ابعد عنها 😂 طلع ان السبب شخصيتي ما تتقبل ستايل معين. 

طبعا ايش فايدة هدا الموضوع انك تعرفي ايش يناسب شخصيتك و تختاري، لان كتير نختار حاجة و نلبسها و انتي لبستها تحسي نفسك مو مرتاحة مانتي واثقة لان اللبس يكون مو على حسب شخصيتك فا ما تحسي بالثقة

و في كمان انها تقلك ايش يناسب شكل جسمك بس هدي جلسة تانية راح اعملها ان شاء الله معاها مرة تانية لان جد حبيت الموضوع و حسيت حيساعدني كتير اني اشتري اشياء تناسبني



و طبعا موضوع الشخصية و شكل الجسم مرة مرتبطين مع بعض فا لازم تدرس الاتنين عشان تعرف انتي ايش يناسبك 👍🏻

طبعا الأخت ريهام انسانة جدا مريحة و طيبة و مرة ذوق و اخلاق والله حسيت و انا بتكلم معاها كاني اعرفها من زمان مرة ارتحتلها و قعدت تشرحلي بقلب الله يسعدها و من جد انسانة فاهمة هي بتتكلم عن ايش و اسلوبها رائع ❤️

و هدي الجلسات الي تسويها و طبعا كل جلسة ليها سعرها 



هدي صور للاستديو حقها ❤️ حبيتو برضو مرة انيق و مريح 





ان شاء الله ناوية اعمل جلسة تحديد شكل الجسم و ايش يناسبني و ناوية اعمل معاها جلسات تانية باذن الله 👍🏻

و مرة انصحكم تعملوا معاها جلسات راح تستفيدو كتير منها و خاصة اذا عروسة كمان تساعدك في اختيار فستان زواجك و الخامة و اللون و تسهل عليكي تختاري ملابس لجهازك و دحين عاملة تعاون مع متخصصة تنظيم الحفلات آبرار شلبي انهم حتى فرحك و كوشتك و الالوان يعملوها انها تناسب شخصيتك 

و هدي الحسابات حقتها للتواصل

انستقرام: houseofcolour_rehamabulfaraj
فيسبوك: rehamabulfaraj@house of colour
تويتر: @houseofcoloursa
ايميل: reham.abalfaraj@houseofcolour.com

Stay Elegant
xoxo

هناك 3 تعليقات:

  1. ياي تجربة كتيير حلوة...حلو الواحد يتعرف عحاله اكتر و عشخصيته و يصير يعرف شو بيلبقله و شو لا...بس حبيبتي تقريبا قدي اسعار الجلسات ?

    ردحذف
  2. ياي تجربة كتيير حلوة...حلو الواحد يتعرف عحاله اكتر و عشخصيته و يصير يعرف شو بيلبقله و شو لا...بس حبيبتي تقريبا قدي اسعار الجلسات ?

    ردحذف
    الردود
    1. اهلين حبيبي تسعديني دايما بردودك الحلوة متلك ، فعلا كانت تجربة مرة حلوة بالنسبة للجلسة الي عملتها ماني عارفة بكم عشان هي عملتها هدية ليا اما جلسة شكل الجسم و ايش يليق عليكي سعرها ٣٠٠ ريال و تختلف من جلسة لجلسة

      حذف