السلام عليكم حبايبي ❤️ اول شي اسفة على الغيبة الطويلة ليا فترة ما نزلت تدوينة جديدة 😭 عشان كاميرتي الميموري كان ضايع و فيلم طويل و تصوير الجوال مو عاجبني فا اخدت كاميرا اختي الين اجيب وحدة 😂 عاد تحملوا قاعدة اتعلم شوية شوية 😁
انا كنت من النوع الي استخدم شي و اطفش منو و اسيبو و استخدم شي تاني دحين سرت احاول اتخلص من العادة هادي و اخلص الاشياء و الحمدلله بدات اخلص 🙈
طبعا الاشياء ما راح ارجع اشتريها مو عشان ماهي كويسة طبعا في اشياء عجبتني و اشياء لا بس ما راح ارجع اشتري عشان بما اني بلوقر احب اجرب كل مرة شي جديد عشان اتكلم عنو، الا اذا كان مرة واو رهيب 😂
مزيل مكياج من لوريال بصراحة ما عجبني كتير تنضيفوا مو قد كدة و ما يشيل بسرعة عكس مزيل مكياج العيون حقهم مرررة جميل و احبو بس حق الوجه ما عجبني قد كدة
Chamomile Gentle Eye Make up Remover
مزيل مكياج عيون من ذي بودي شوب بالبابونج، خفيف على العين و ما يحرق او يحسس بس ما يشيل بسرعة و مرة يتعب يعني استخدمي اذا حاطة مكياج خفيف مرة يعني يدوب ماسكرا و كحل و ما يكون ضد الموية لان ما يشيلو كويس
L'Ooccitane 100% Shea Butter
زبدة الشيا الخام من لوكستيان او في رواية اخرى لوكيتان 😂 ترطيبها مرة ممتاز و تدوب بسرعة في يدك بس بصراحة سعرها مرة مبالغ فيها تقريبا ٢٠٥ ريال و احسها نفس زبدة الشيا العادية الي تجي ب٧٠ ريال نفس المفعول اخدت وحدة من اي هيرب ب٦٠ ريال تقريبا و كانت نفس المفعول
Biodrema Sunscreen
واقي الشمس من بايودرما مرة كويس و بايودرما معروفة منتجاتها انها جميلة و ليا كم سنة استخدمو بس جربت واقي جديد حق اوشن بوشن و عجبني اكتر. عيب بايودرما انو شوية تقيل و يخلي طبقة بيضة و صعب ينحط تحت الميك اب يعني تستخدمي اذا انتي ما تحطي فاونديشن او بي بي كريم في النهار بس عندهم واقي ملون على حسب لون البشرة و يغنيكي عن الفاونديشن، بس في نفس الوقت حلو انو عندهم لكل بشرة نوع 👍🏻 انا رسلت اختي تجبلي و جابتلي حق البشرة الدهنية 🌚 و ما انتبهت الا لما فتحتو 💔
BWC Eye Make up Remover
هدا المزيل جميل جميل احلى مزيل مكياج عيون جربتو مرة ما يحرق و يشيل بسرعة و ما يتعب ابدا من جد روووعة و افكر ارجع اخدو بعدين من جد انصحكم في 👍🏻 اخدتو من موقع اي هيرب
Nivea Eye Care
كريم للعيون يزيل الخطوط و الهالات حول العين، بصراحة بالنسبة للخطوط ما ادري لان ما عندي الحمدلله بس الهالات لاحظت صراحة انو خففها شوية كانت هالاتي غامقة مرة و الحمدلله خفت شوية و بعدين استمريت على زيت اللوز و خفت كمان و ترطيبو حلو لمنطقة حول العين 👍🏻
Botanics Cleansing Toner
تونر بالاعشاب من شركة بوتانيكس من صيدلية بوتس، مرة حلو مافي كحول و يزيل اي شوائب في البشرة من غسول او اوساخ او مكياج و يساعد على تصغير المسامات و تجهيز البشرة للترطيب. طبعا يستخدم بعد الغسول، مرة كويس و عجبني 👍🏻
Vitamin e Hand and Nail Treatment
كريم لليدين بفيتامين هـ من ذي بودي شوب، ترطيبو مرة كويس و ممتاز و جدا حبيتوا و ريحتو حلوة كمان بس عيبو صغير و يخلص بسرعة خاصة اذا تستخدمي كتير
Beesline Roll-on Deodorant
مزيل عرق من بيزيلين بريحة الورد، اجمل شي في انو ما يسود منطقة الابط او يغمقها فا مرة ممتاز و ريحتو كويسة و امن يعني ما يسد العرق جوة. بس عيبو مفعولو قصير يعني من ٣ الى ٤ ساعات بعدها تحسي رحيتو و المفعول انتهى.
و بس اتمنى عجبتكم التدوينة ❤️
Stay Elegant
xoxo
ليست هناك تعليقات:
إرسال تعليق