الاثنين، 20 يوليو، 2015

حبوب بيوتين للشعر و البشرة و الاظافر من Solgar




السلام عليكم حبايبي ❤️ اليوم بتكلم عن فيتامينات البيوتين المخصصة للشعر و البشرة و الاظافر، هدي كانت بتوصية من الجميلة @sane_sara و جربتها على رأيها 👍🏻.

اول شي الحبوب في منها جرعات ٣٠٠ و ٦٠٠ و ١٠٠٠ و ٥٠٠٠ و ١٠٠٠٠ انا بدا ب٥٠٠٠ لان لما قريت عن جرعة ١٠٠٠ و اقل لقيت الكل ما استفاد منها فا بدات ب٥٠٠٠ و لازم تبداي من الاقل عشان جسمك يتعود عليها و تشوفي كيف يتفاعل معاها لان في ناس ممكن تسببلهم ردة فعل عكسية او يتحسسوا منها فا لازم تبداي بالتدريج.

في كمان شي تاني في منها نوعين هدا النوع مخصوص لي Vegterian يعني الي ما ياكلو لحوم ليش؟ لان النوع التاني في جيلاتين مستخرج من لحم الخنزير عشان كدة انتبهو لازم تاخدو هدا النوع و يكون مكتوب علي Vegetable Capsuls  

العلبة فيها ١٠٠ حبة يعني تكفي ٣ شهور و كم يوم لانها حبة في اليوم.

بالنسبة لملاحظاتي 

١. اول شي ما فتح شهيتي الحمدلله 😁 عارفة حيكون اول سؤال خخخخخخ ولا تخني

٢. لاحظت النتيجة اول شي في اظافري سارت تطول اسرع ما شاء الله و سارت اقوى يعني اول كانت تنكسر على طول دحين سرت احسها اقوى و ما تنكسر بسرعة ما شاء الله بس انا اصلا ما احب اطول اظافري و جبتها لشعري اصلا.

٣. بالنسبة للبشرة حسيت في تحسن بسيط في وجهي بعني حسيت بشرتي فيها اشراقة بسيطة غير عن العادة.

٤. بالنسبة للشعر شعري سار يطول اسرع عن العادة ما شاء الله يعني حسيت طول مرة بشكل سريع ما شاء الله. لقيت كمان ان طلع ليا بيبي هير (شعر جديد قصير) بس للاسف ما طلع في الاماكن الي ابغاها 😂 عشان انا عندي فراغ في بداية شعري هو الي متعبني. حسيت شعري تحسن شكلو يعني اول كان ميت و جاف حسيت سار في حياة و كثافة بسيطة ما شاء الله. 

بصفة عامة حبيت الحبوب مرة و ناوية اطلب الجرعة الاكبر عشان هدي خلاص بقي كم حبة. انا كنت ادور حبوب للشعر تغذي شعري بس اهم شي ما تتخن او تفتح الشهية 😂 و الحمدلله ما سوت شي فا راح استمر عليها. 

و انا دحين ما بعتمد على الحبوب لوحدها بسوي حمامات زيت لشعري و بستخدم محفزات دحين بدات فيها من اسبوع يمكن و طبعا لسة ما شفت نتيجة فا ما اقدر احكم او اتكلم عنها.

في ملاحظة اذا اشتريتيها و بداتي فيها حاولي في البداية تكتري شرب موية لان لاحظت اول ما بدات فيها سببتلي امساك الله يكرمكم و تعبني مرة و بعدها بكم اسبوع خلاص وقف و جسمي تعود فا كترو شرب موية في البداية.

اخدتها من موقع اي هيرب و سعرها ١٥$ يعني ٥٧ ريال تقريبا

Stay Elegant
xoxo


هناك 6 تعليقات:

  1. انا شعري بعد الولادة تعب كتييييييير و تساقط كتيييييير ...قريت عن حبوب الصويا انه فيها مادة البيوتين وكتييير مفيدة للشعر بس ما بعرف وين موجودة بجدة وما لقيتها عند الرفاعي...هلق انا بلبنان اشتريت كمية و بدي بلش فيها ان شاء الله...على امل لاقي نتيجة.
    شكرا عالريفيو 😘

    ردحذف
    الردود
    1. لان انا صراحة بخاف من الادوية...

      حذف
    2. لان انا صراحة بخاف من الادوية...

      حذف
    3. هو حبيبي طبيعي بعد الولادة الشعر يتعب و يتساقط انا كدة والله و تدريجي يرجع من بعد الولادة من ٦ الى سنة يبدا يرجع تاني بس برضو حاولي تهتمي في بصراحة ما سمعت بحبوب الصويا بس مدام فيها بيوتين ان شاء الله تفيدك بس اهم شي تستمري لان نتيجة الشعر تبان بعد ٣ شهور و اكتر و الله يديكي النتيجة الي تبغيها حبيبي

      حذف
  2. انا شعري بعد الولادة تعب كتييييييير و تساقط كتيييييير ...قريت عن حبوب الصويا انه فيها مادة البيوتين وكتييير مفيدة للشعر بس ما بعرف وين موجودة بجدة وما لقيتها عند الرفاعي...هلق انا بلبنان اشتريت كمية و بدي بلش فيها ان شاء الله...على امل لاقي نتيجة.
    شكرا عالريفيو 😘

    ردحذف
  3. انا كنت عند دكتور الغدة منشان الطول لان طولي 160ووصفلي ابر بتنشرب فيها فيتامين d3 وهاد الدوا وهلق اخدت حبة الهدف اني اطول واستغربت من كلامك للشعر والبشرة والاظافر وصراحة العلبة غالية حابب افهم هيي فيتامينن لشو بلضبط ؟!!!

    ردحذف