الجمعة، 21 أغسطس 2015

مشترياتي للمكياج و العناية من لندن


السلام عليكم حبايبي 💕 اليوم بنزلكم مشترياتي من المكياج و العناية الي اخدتها من لندن 😁 حسيت كتير منكم يحبو مواضيع المشتريات او الهولز شكلكم زي اعشقها 😂 فا حبيت اشاركم بالمشتريات حقتي 🙊 تقريبا ٩٩٪ منها درغستور لان احس مكياج الدرغستور صعب يتوفر زي الهاي ايند تقدري تطلبي عن طريق اي تاجرة بس الدرغستور لا فا عشان كدة 😁 و اشتريت ملابس و مشتريات تانية من ديزني لاند باريس بس مدري كيف راح اعرض الملابس شكلي بس راح احط الاغراض التانية غير الملابس 😂 بس في موضوع تاني مو اليوم 

المهم نبدا!



اول شي اخدت هدي الارواج و هدا شي غريب لاني اعشق الارواج 😂 بس ما ادري ليش ما لفتتني ارواج صراحة حسيت اغلب الدرجات عندي.

اخدت اول شي من اليمين روج من ميبيلين لونو كدة عودي فاتح شوية تقريبا و الي بعدو من توب شوب نفسي من اول اجرب ارواجهم 😁 مات و لونو وردي ع كورال و بعدو روجين من ارواج ريفلون الجديدة الترا اتش دي شفت عليها مدح من اليوتيوبرز اخدت لون احمر على اورانج و التاني وردي نيود. سويت سواتش بس ماهي راضية تطلع الالوان زي ماهي فا راح اسوي ليها سواتش في الانستقرام بعدين ان شاء الله.



اخدت ٣ كونسيلرز اول واحد من اليمين من ماركة اسمها بي رادينت ماركة طبية كان عليها عرض فا اخدتو اجرب و بعدو كونسيلر كوليكشن من الكونسيلرز الي مرة احبها! بس للاسف ما لقيت واحد تاني من درجتي 😭 فا اخدت واحد بس و اخر شي كونسيلر ويك مي اب من ريمل علي مدح من زمان من اليوتيوبرز.



اخدت فاونديشن لوريال الجديد انفاليبول هدا الي يناسب البشرة العادية الى الجافة.



من اول نفسي اجرب مكياج سوب اند غلوري 😁 عندنا بس يبيعوا منتجات العناية فا قلت خليني اجرب. اخدت قلم حواجب و بلشر



البلشر حسيتو انو ينفع اضاءة مو بلشر لانو مرة شيمري و لونو على دهبي لما تدمجي الالوان مع بعض.



اخدت كمان ماسكرا ميبيلين للحواجب و ماسكرا لاش سينسيشنال مرة مدحتها اليوتيوبر غابريلا و هي من اليوتيوبرز الي احبهم ❤️



هنا راح تضحكو هههههه هدي بالتين عجبتني و في الصورة لاحظت ان الوانها مرة متشابهة 😂 بس عشان اعشق الالوان دي الروزغولد على الوردي و الموف. الي فوق من ماركة ام يو ايه ماهي عندنا هنا و التانية تحت من لوريال.



هدي برونز في شوية شيمر خفيف و اضاءة من ماركة كوليكشن، مرة نفسي يوفروها عندنا لان سارو ينزلو اشياء مرة حلوة صراحة.



اليمين قلم اي شادو دهبي من ريمل و التاني اي لاينر لوريال جا هدية عشان اخدت شيئين من لوريال ولا ما كنت ابغاه 🌚 



و عيدت بالمناكير 😂 انا مرة احب مناكير بيري ام بس عندنا ما تجي كل الالوان 💔 اخدت اول شي من اليسار بيس كوت و توب كون (طبقة شفافة قبل المناكير و بعد) و كمان يقوي الاظافر و اخدت ٦ الوان من المجموعة الجديدة الي هي (كويك دراي) يعني تنشف بسرعة و تحت التلاتة الاولى من اليسار مناكير من ميس سبورتي واحد ميتالك و واحد شيمر وردي و الاخير قلتر و المناكير الدهبي من توب شوب.

دحين نجي للهاي ايند!



اول شي اخدت من شارلوت تلبوري من زمان نفسي اجيب منها ❤️ اخدت سكلبت اند قلو الي هو كنتور مع هايلايت و هدي افتح درجة.



تاني شي اخدت من نارز الحب 😍 اخدت اضاءة سائلة درجة كوكاكابانا كدة على وردي من اول نفسي فيها و اخدت من البلاشرات الجديدة دوال انتنستي.

و دحين منتجات العناية 



اول شي اخيرررا اخدت من منتجات زويلا (يوتيوبر) من اول نفسي فيها 😍 اخدت من مجموعتها الجديدة التوتي فروتي حبيتها اكتر من القديمة. اخدت شاور جيل و عطر للجسم و مرطب ملون و ببلز للبانيو و شنطة مكياج.



منتجات للشعر اخدت ٢، زيت من لوريال للاستخدام قبل الاستشوار و للشعر الجاف يرطب و يدي لمعان و يغذي. و اخدت ماسك للشعر من شركة اوسي شفت مدح عليها قلت اجرب و كنت محتاجة ماسك للشعر اخدت حق الشعر المنفوش لان شعري ناعم و في نفشة.



و هدي اشياء منوعة اول حاجة ببلز للبانيو و بعدين مزيل مناكير من غير استون و مزيل مناكير تاني السريع الي تدخلي اصباعك في 😁 و مزيل مكياج.



هدي اشياء للجسم، اول حاجة يمين زبدة فازلين بالكاكاو كنت استخدمها زماااان لما كنت عايشة في لندن و كنت اعشقها و بعدين لما رجعت السعودية كانت موجودة فترة و دايما اخدها في الاخير ما سارت تجي 😭 مدري ليش 💔 لما شفتها على طول اخدتها. و الي بعدو بخاخات مرطبة من فازلين كل الناس طايرة فيها قلت اجربها 😂 و مقشر سينت ايفز للجسم.



اول شي من اليمين كريم للرجل اخدتو عشان نسيت كريم رجلي الله يكرمكم بس ما عجبني كتير صراحة 🌚 بعدو كريم مرطب من افينو. اخدت كمان كريم يد من افينو استخدمتو هناك بس مدري فينو 😂 و اخر شي مجموعة من برتس بييز من اول نفسي اجرب منتجاتهم و لما شفت هدي قلت احسن اخد مجموعة صغيرة اجربها 🙊 و عجبتني ديه فيها كم شي.



هدي اشياء منوعة اخدت تانغل تيزر حقة الشنطة الصغيرة الي تجي بغطا و اخدت مرطبات فازلين عشان اسوي منها مقشر للشفايف و مرطب من كارميكس بالرمان و مرطب تاني اخدتو من كارمكس برضو بس مدري فين كان و لقيتو بعد ما صورت و مافيا اصور تاني خخخخخ ان شاء الله حتكلم عنو 😂. و علبتين فاضية صغيرة احط فيها المقشر حق الشفايف عشان العلب الي عندي كبيرة.

و بس هدي منتجات العناية و المكياج ان شاء الله راح اسوي وحدة تانية لمشتريات منوعة بحاول الاقي طريقة اعرض فيها الملابس 😂 لاني فاشلة في الملابس و التصوير بشكل عام 😂

Stay Elegant
xoxo

هناك تعليق واحد:

  1. سلام من وين شريتي منتجات زويلا من أي محل بلندن

    ردحذف