السلام عليكم بنات 💕 موضوع اليوم عن توحيد لون الوجه. كتير بنات يعانو من بقع غامقة في الوجه او تحسي لون وجهك مو واحد و لي اسباب كتير زي الشمس و التقدم بالعمر و الهرمونات او بعض الادوية. اليوم حبيت اشاركم ببعض التجارب و الحلول الي جمعتها بعضها تعرفت عليها من تجربة و بعضها من قرائتي 💕 اتمنى تستفيدو ❤️
١. فيتامين ج: من اشهر الفيتامينات الي تساعد على توحيد اللون و تكون المكون الرئيسي لاكتر كريمات التوحيد و النضارة. في كتير كريمات فيها فيتامين ج زي مجموعة كاملة موجودة في صيدلية النهدي بالفيتامين ج و في بودي شوب عندهم مجموعة فيتامين ج برضو.
٢. فيتامين ب٣: يساعد على تحسين الجلد و يرطب و كمان يخفف من زيوت البشرة و في نفس الوقت يساعد على توحيد لون البشرة.
٣. واقي الشمس: ضروري ضروري ضروري تستخدمي واقي شمس كل ما تتعرضي للشمس! و تعيدي كل ساعتين او ٣ لان من اكبر مسببات التصبغات الشمس. و استخدمي واقي يكون ٥٠ اس بي اف لا تاخدي شي اقل و خلي جزء من روتينك اليومي اذا انتي عندك دوام او تخرجي بالشمس.
٤. التقشير: برضو مهم مرة الى مرتين بالاسبوع تقشري وجهك بمقشر يناسبك، اقل شي تقدري تقشري بزيت زيتون و سكر او عسل و سكر و هدا موجود في كل مكان فا مافي عذر 😁.
٥. الترطيب: خطوة مهمة برضو لازم تسويها يوميا و تقدري تستخدمي مرطب بفيتامين ج او ب٣ و كل انواع البشرة تحتاج ترطيب اهم شي تاخدي نوع يناسبك.
٦. عصير الليمون: من اشهر المكونات الي تساعد في توحيد اللون لان الليمون في حمض مبيض يساعد على توحيد الوجه و تفتيح المناطق الغامقة و كمان يوازي نسبة الاحماض في الوجه. (لا تحطي عصير ليمون و تتعرضي للشمس لان ممكن يهيج بشرتك و كمان اذا عندك جرح او خدش لا تحطي).
٧. الشوفان: كمان من المكونات الي تساعد على توحيد البشرة و الشوفان يعتبر مقشر للبشرة برضو ممكن تخلطي مع شوية عسل و تقشري في وجهك بس اهم شي تجربي على منطقة بسيطة اول عشان تتاكدي انو ما يحسسك خاصة اذا بشرتك حساسة.
٨. الشاي الاخضر: طبعا فوائد الشاي الاخضر عظيمة و ما تخلص و من فوايدو تفتيح المناطق الغامقة. بس حطي اكياس شاي اخضر في موية دافية و خليها شوية الين تبرد و حطيها على المناطق الغامقة لمدة ربع ساعة و ممكن تضيفي لماسك مثلا لبن مع نشا و شاي اخضر او حليب و شاي اخضر زي كدة.
٩. الكركم: طبعا كركم الجسم و البشرة مو حق الاكل 😂 هو في مضادات للاكسدة و يخفف من الالتهابات و كمان يخفف من حب الشباب و يساعد على تفتيح البشرة. ممكن تستخدمي صابون الكركم بشكل يومي تغسلي فيها وجهك او تضيفي الكركم للماسك و تستخدمي.
١٠. اللبن و الحليب البودرة: في مكونات مبيضة و يقشر البشرة و يحسن من مظهرها.
١١. البابايا: تقدري تستخدمي نفس الفاكهة في ماسك او تستخدمي صابونة البابايا.
طبعا اهم شي المدوامة ولا تتوقعي نتيجة سحرية في يوم ولا اسبوع لازم تصبري و ان شاء الله في خلال شهر تشوفي النتيجة بس لازم تداومي! اذا تبغي حل سحري عندك الابر مع اني ضدها لان في حلول غيرها صح تاخد وقت بس اذا ما فادتك ما تضرك.
المكونات الطبيعية تقدري تخلطيها مع بعض و تسوي فيها ماسك تستخدمي ٣ مرات في الاسبوع مثلا تخلطي لبن مع ليمون و شاي اخضر او شوفان مع لبن زي كدة. اهم شيييي تجربي قبل لا تحطي على كامل وجهك عشان تتاكدي انو ما يحسسك.
تكلمت قبل عن تفتيح الركب و الاكواع و الرقبة و المنطقة الحساسة و الابط و هدي الروابط.
تفتيح منطقة الابط و كيفية العناية بها
اسمرار المنطقة الحساسة و الطرق العناية بها
مشكلة اسمرار الرقبة و حلولها
حلول لمشكلة سواد الركب و الأكواع
اتمنى تستفيدوا ❤️
Stay Elegant
xoxo
ليست هناك تعليقات:
إرسال تعليق