الثلاثاء، 1 سبتمبر 2015

حابة تسيري بلوقر؟





السلام عليكم حبايبي ❤️ كتبر بنات حابين يسيروا بلوقرز و تجيني رسايل كتير من بنات دوبهم بدئوا و حابين نصايح تساعدهم. اول حاجة حابة اقول اني ما اعتبر نفسي خبيرة في هدا المجال انا زي زيكم لسة بتعلم و لسة بكتشف اشياء جديدة بس حبيت اشاركم ببعض النصايح و الاشياء الي تعلمتها ❤️

١. اول شي و اهم شي لا يكون همك عدد الفلورز! لان طول ما راح يهمك راح تحبطي كتيررر و كمان ما راح يخليكي تعطي و تكتبي زي لما يكون همك المساعدة. في البداية عدد الفلورز راح يزيد بشوووويش فوق ما تتخيلي اهم شي تستمري و تنزلي مواضيع قد ما تقدري عشان تجذبي الفلورز لحسابك. في بعض البنات اشوفهم يكتبو ماني حاطة مواضيع الين الاقي لايكات او تحط نص موضوع و تقول سووا لايك عشان انزل الباقي صراحة اسلوب احسو سيئ بتحسسي المتابعات كانهم يترجوكي عشان تنزليالموضوع، نزلي مواضيع عشان انتي تبغي تساعدي لا تفكري في اللايكات ولا الفلورز. صراحة اعترف موضوع يزعل اوقات لما ما تشوفي تفاعل بس اذا انتي تحبي الشي تبدعي في من غير ما تفكري في شي تاني.

٢. التبادل سلاح ذو حدين لان ممكن تجذبي في فلورز و ممكن تبعدي عنك الفلورز. كترة التبادل هي الي راح تبعد الفلورز لان كتير ما يحبوا التبادل الكتير و الاعلانات الكتير في اليوم او يوميا و انا منهم صراحة، اطفش من الحسابات الي بس تسوي تبادل طول الوقت. اذا حابة تعملي سوي ٤ او ٥ بالكتير. انا سويت تبادل في بداياتي بس بعدها وقفت تبادل سرت اسوي يمكن مرة وحدة او مرتين بالشهررر. و في بعض البلوقرز يعملوا دعم للحسابات المبتداة حاولي تشاركي عشان تستفيدي من الدعم.

٣. نوعي بالمواضيع حقتك قد ما تقدري و نوعي بالمنتجات حاولي تتكلمي و تجربي منتجات جديدة ما تكلم عنها كتير. و دايما لا تكتبي الا الصراحة! اكتبي دايما رايك بكل امانة كانك بتمدحي او تذمي لاختك، خليكي دايما صادقة. و اذا المنتج في اي عيب في رايك اذكري يعني اكتب محاسنو و عيوبو عشان تكوني امينة.

٤. لازم تتفاعلي مع متابعاتك ردي على تعليقاتهم و اسئلتهم خليكي دايما معاهم لان يحبوا البلوقرز الي تتفاعل معاهم و يحسوا بوجودها. 

٥. انتبهي لردودك دايما حتى مع المتابعات الي يعلقوا تعليقات سلبية او فيها تهجم و غيرو خلي اسلوبك احسن دايما و خلي كلمتك طيبة دايما. انا والله اوقات تجيني تعليقات سلبية مرة و كتير تهجموا على كلامي و لهجتي بس ارد عليهم بادب و سيري احسن منها.

٦. اختاري اسم مميز ليكي عشان تكوني غير و مميزة اكتر. حسيت كتير يسموا نفسهم فلانة بلوقر او بيوتي و هدا مرة مكرر حاولي تتميزي باسمك.

٧. لما تجي تكتبي ريفيو حاولي تتكلمي عن المنتج بالتفصيل يعني اسم المنتج، وصفو، بعض المكونات الرئيسية، يناسب اي بشرة اذا مخصص لبشرة معينة، رايك في المنتج و ذكر حسناتو و عيوبو و سعر المنتج و فين تشتري و اي معلومات تحسيها مهمة.

٨. المعلومات الي تشاركيها اتاكدي انها صحيحة او عن تجربة و اكتبي دايما الصراحة يعني قراتي معلومة حلوة عجبتك قولي انك ما جربتيها بس اخدتيها من مصدر موثوق او من تجربة شخص تعرفي. و اذا اخدتي معلومة من بلوقر تانية حطي حسابها و قولي عشان لا تاخدي تعب غيرك.

٩. حاولي لما تصوري المنتج يكون واضح يعني لا تكون الصورة مشوشة او مو واضحة او الاضاءة ضعيفة. و حطي حقوقك على الصورة دايما يعني اكتبي اسمك بخط صغير.

١٠. اذا وصلتي لعدد كبير من الفلورز لا تشوفي نفسك انك افضل لان في الاخير انتي وصلتي لداه الشي بفضل الله ثم فضلهم و بجهدك طبعا.

و هدي تقريبا النصايح الي في بالي و حبيت اشاركها معاكم لاي وحدة حابة تستفيد او تفكر تسير بلوقر ❤️

اتمنى انكم استفدتو

Stay Elegant
xoxo


هناك 3 تعليقات:

  1. كلامك جميييل .. يعطيك العافية .. ومع اني مو بيوتي بلوقر بس برضه استفدت كثير .. يسلمو ي عسل 😘😑

    ردحذف
    الردود
    1. الله يعافيك حبيبي و يسلمك سعيدة اني افدتك

      حذف