كيف انظف فرش المكياج + طرق اخرى

السلام عليكم حبايبي ❤️ اليوم حبيت اشاركم بطريقتي في تنظيف الفرش و اقلكم طرق تانية تقدروا تستخدموها برضو 

طبعا تنظيف الفرش جدا مهم ولا تستهتروا في و لان الجراثيم و البكتيريا تتجمع في الفرش الوسخة و يسببلك حبوب و تهيجات في بشرتك فا لازم تغسلوا فرشكم.

الفرش الي تستخدميها للمنتجات الكريمية او السائلة زي الكونسيلر و الفاونديشن تغسليها بعد كل استخدام و الفرش الي تستخدميها للمنتجات البودرة زي البلاشر او البرونز و الاي شادو تغسليها كل اسبوع. و البيوتي بلندر برضو بعد كل استخدام.

انا احب انظف فرشي بشامبو الاطفال 😁 تسير ريحتها مرة حلوة و ناعمة و مرة ناسبتني الطريقة و استخدم معاها قفاز سيقما اخدتو من موقع فانيلا http://vanillaeshop.com

سعروا تقريبا ١٧٠

و هدا فيديو في طريقة استخدام القفاز 

من جد مرة ريحني في التنظيف اول كنت مرة اتعب و انا انظف دحين سارت بسهولة تنظف و تتغسل ❤️ و سيقما دحين طلعوا كمان حاجات تانية زي هدا برضو زي القفاز في اليد سعروا تقريبا ١٢٠

و التاني يتحط في المغسلة و تنضفي الفرش في سعرو حدود ١٥٠

بالنسبة للبيوتي بلندر برضو انظفها بالشامبو و القفاز و بعض الاحيان بصابون صلب و في صابون خاص ليها صلب و سائل بس بصراحة ما جربتو 😁 

في اداة تانية سعرها ارخص من سيقما و تناسب الجميع اسمها Brush Egg سعرها تقريبا حدود ٥٠ و متوفرة عند التاجرات زي @papayahshop

ورممكن اذا حابة تسوي الاداة الخاصة فيكي. انا سويت كدة في البداية الين جبت قفاز سيقما و هدي طريقة من الجميلة زيا 

و كمان عملت فيديو عن طريقتها في تنظف الفرش اذا حابين تطلوا عليها

في بعض الشركات توفر منظفات للفرش زي هدي مثلا و اشهرها ماك 

او تقدري تستخدمي غسول خفيف للوجه استخدمي نوع يكون للبشرة الحساسة لان يكون اخف شي او ممكن تستخدمي بلسم الشعر بس لازم تحرصي انك تنظفي الفرش كويس من البلسم عشان لا تقعد اثار و تنعدم بشرتك و انا ما افضلها كتير. كمان تقدري تستخدمي شامبو خفيف يكون بدون ريحة. بصراحة عني افضل شامبو الاطفال و كتير متخصصين مكياج يستخدمو شامبو الاطفال.

في البعض يستخدم زيت الزيتون بس انا صراحة ما احب الحوسة خخخخخ احب الطريقة تكون تنفع و سهلة خاصة لما يكون عندك فرش كتير.

التنشيف ضروري تحرصي انك تخلي الفرش تنشف بالطريقة الصحيحة و في طريقتين الاولى تخليها كدة انو الفرشة يكون نصها على طاولة و النص التاني الي هو جهة الشعر في الهوا لو حطيتي تحتها منشفة ممكن تسبب ريحة للفرش او يتكون عفن. 

او تستخدمي ستاند للفرش يخلي الفرشة بالمقلوب زي كدة و برضو هذا موجود في موقع فانيلا 

و خليها تنشف لوحدها يعني لا تستخدمي استشوار عشان تنشفيها لان هدا يعدم الفرشة و كمان الموية لما تجي تغسلي لازم تكون دافية ماهي حارة.

اتمنى انكم استفدتوا من الموضوع 

Stay Elegant

xoxo