السلام عليكم حبايبي ❤️ اليوم بتكلم عن موضوع مهم يخص العناية و هو الروتين اليومي ❤️
اول حاجة اذا انتي جديدة في مجال العناية اطلعي على هدا الموضوع
و في حسابي في الانستقرام شوفي هاشتاق #elegant_care101
ايش الروتين اليومي؟ هو زي البرنامج تعملي لنفسك يخص الاهتمام ببشرتك 👍🏻 يعني على حسب ايش تحتاج بشرتك بشكل يومي. انتي تحددي و تشوفي ايش المنتجات الي تحتاجيها بشكل يومي و ايش الي تحتاجيها بشكل اسبوعي و شهري. مثلا كل البشرات تحتاج ترطيب بشكل يومي سواء دهنية او جافة او غيرو. و مثلا التقشير يكون بشكل اسبوعي و حمام البخار بشكل شهري او كل شهرين و زي كدة.
بالنسبة لايش الي تستخدمي يوميا انتي حددي على حسب نوع بشرتك. اذا انتي بشرتك جافة تحتاجي ترطيب بشكل يومي مرتين في اليوم نهار و ليل هدا اهم احتياج للبشرة الجافة و بعدها يجي الغسول و الغسول يكون بشكل يومي اذا انتي تخرجي يوميا او يوم بعد يوم اذا انتي في البيت. و ترطيب العين برضو يكون بشكل يومي و ترطيب الجسم يكون بشكل يومي خاصة اليدين و الارجل الله يكرمكم.
بالنسبة اذا بشرتك دهنية تحتاجي غسول مرتين في اليوم و بشكل يومي و تحتاجي تونر بشكل يومي لان يساعد على التخلص من الدهون في البشرة و زي كدة. اهم شي وصلتكم الفكرة و زي ما قلت ايش الي تحتاجي يوميا انتي تقرري بنفسك و شوفي ايش تحتاجي.
و طبعا اذا بشرتك فيها مشاكل زي حب شباب او تصبغات و غيرو و تستخدمي علاج حيكون بشكل يومي و تدخلي في روتينك.
حاولي تخلي روتينك بسيط قد ما تقدري يعني خطوات قليلة لان كل ما استخدمتي منتجات كتيرة و حفلة راح تملي مع الوقت! فا خلي المنتجات الي تستخدميها بشكل يومي تكون الاساسية و الضرورية و الباقي وزعي على الاسبوع زي التقشير و الماسكات و نتف الشعر و غيرو.
مثلا انا روتيني اليومي عبارة عن ماسك الليلي من ذي بودي شوب و اوقات استخدم مرطب تاني و منظف للوجه استخدم مرة نكس مع كلارسونيك و مرة افينو و زيت اللوز للعين و مرطب لليدين و مرطب للجسم و مرطب للكيوتكل و مرطب شفايف، تحسوا كتير 😂 بس ما ياخد غير ربع ساعة يمكن و اسوي و انا مروقة اشغل شي اتفرج في و ابدا في الروتين 👍🏻 كدة ما احس بملل و ابطل
اعترف اوقات اكون مرررة تعبانة او الاخلاق قافلة 😂 و انام من غير ما اسوي شي بس والله لما اصحى فعلا احس بفرق بشرتي تكون مرة جافة و تبدا تتقشر فا اضطر اسوي عناية مكثفة تاني فا سرت لما اكون مرة مرهقة احاول لو على الاقل ارطب جسمي و وجهي لان اهم شي في البشرة الجافة الترررطيب.
فا حاولي كدة تشجعي نفسك و تسهلي الموضوع عليكي و اقعدي فكري في بشرتك كيف ممكن تسير اذا جاكي كسل خخخخخخ.
و اذا لقيتي منتجات ناسبتك مرة استمري عليها خاصة البشرات الحساسة ما ينفع تغيري منتجات كل شوية. انا للاسف كوني بلوقر لازم اغير المنتجات كل فترة عشان اجرب اشياء جديدة و اتكلم عنها. و بصراحة انا من النوع الي اطفش من نفس الروتين دايما 😂 فا احب اغير فا اذا انتي من النوع الي تملي بسرعة ممكن تغيري المنتجات لما تخلصيها بس انتبهي لا تغيري كل شي فجاة! لان ممكن بشرتك تتهيج و تفجعيها 😂💔 هههههه غيري بالتدريج يعني اول شي المرطب بعدين الغسول و كدة. بس البنات الي بشراتهم حساسة مرة ينتبهوا لان مو اي شي يناسبهم!
و قبل ما تختاري المنتج اقري عنو كتير لا تتسرعي و تاخدي رأي شخص تاني و برضو مو اي صيدلي تاخدي رايو للاسف البعض (مو الكل طبعا) بس يبغوا يبيعوا فا يدوكي اي منتج غالي عشان كدة الافضل تشوفي بنفسك او تستشيري طبيب ممتاز.
خلي المنتجات اليومية في مكان مخصص قدامك عشان تفتكري و يسهل عليكي توصليلها زي انا حطيت منتجاتي اليومية في هدا الصحن الي في الصورة فوق على التسريحة يسير استخدمها لما احتاجها.
اتمنى استفدتوا من الموضوع ❤️
Stay Elegant
xoxo
ليست هناك تعليقات:
إرسال تعليق