الخميس، 8 أكتوبر 2015

تجربتي مع مركز العناية بالشعر و البشرة في جدة

السلام عليكم حبايبي ❤️ قبل كم يوم رحت مركز العناية بالشعر و البشرة فرع المحمدية في جدة و كانت تجربة مرة جميلة صراحة.









المركز مرة مرتب و راقي و تعاملهم كان مرة راقي و رائع ❤️ المشرفات و الاخصائية و العاملات كلهم صراحة ما قصروا ❤️.

اول شي رحت مكتب الاخصائية خديجة 


كشفت على فروتي و فروة ريماس، عن طريق هدا الجهاز



اول شي شافت ريماس و طلعت فروتها دهنية و هي شعرها مرة كرلي و انا كنت ابغى اعملها بروتين او كيراتين و نصحتني  بكيراتين اورقانك (عضوي) خاص للاطفال و الحوامل ما يضرهم و مافي ريحة 👍🏻 ريماس عمرها ١٠ فا ما حبيت اسوي شي يعدم شعرها فا نصحتني في الاخصائية و هدي فروة ريماس


بعدين شافت فروتي و طلعت فروتي تحزن! ههههه مرة انفجعت لما شفتها طلعت متهيجة و البصيلات عندي مرة ضعيف :( 



مرة انصدمت لما شفتها :( و شافت كمان بشرتي و الي يضحك طلعت بشرتي عادية ههههههه و انا ظالمتها و معتبرتها جافة! بس قالتلي القشور سببها نقص فيتامينات. و شافت نوع بشرتي من نفس الجهاز الصغير فوق.

بعدين بداو بشعر ريماس و بالنسبة لشعرها راح اتكلم في تدوينة تانية عشان احطلكم صور قبل و بعد و بعد الكيراتين بكم يوم لان نتيجة الكيراتين ما تقعد نفسها الشعر يرجع طبيعي شوية بس يخفف النفشة و يفك الشعر الكيرلي و يكون ما يتعقد بسرعة او يتشابك فا راح اخليها لتدوينة تانية ان شاء الله 👍🏻

بالنسبة ليا نصحتني بجلستين جلسة بالخلايا الجذعية تقوي البصيلات بس لازم تكون من جلستين لثلاثة في الاسبوع لانها مرة ضعيفة و انا تاخرت بعلاجها للاسف فا ما راح تبان النتيجة و راح اعمل جلسات و استمر معاهم و اكيد بتكونوا معايا اول باول ان شاء الله.

تاني شي عملتوا جلسة انتي فريز الي هي تخفف نفشة الشعر بما ان شعري مرة من النوع النافش 💔
و هدي الخطوات الي عملتها

اول شي كان جهاز النانو هو يحضر الشعر للعلاج و يفتح المسامات و يدي رطوبة للشعر


و بعدها غسلت شعري بشامبو الانتي فريز 


و حطتلي سيرم الانتي فريز و استخدمت جهاز النانو  مرة تانية عشان تثبت المادة و تفتح البصيلات و تمتص السيرم و بعدها جهاز الانتي فريزنغ (سيراميك بارد) يساعد في تخفيف النفشة 


و جهاز الترا ساوند يثبت المادة في الشعر برضو


بعدها بدات في جلسة الخلايا الجذعية اول شي تستخدم جهاز اكسجين للفروة عشان تهييئها و بعدها جهاز الريد لايت برضو يجهز الفروة و يهييئها للعلاج



بعدين رشت مادة الخلايا الجدعية هي تجي زي السيرم و رشتو على شعري كلو و حطتلي زيت ارغان للاطراف و بكدة انتهى علاجي. و قعدت ٤ ساعات و غسلتوا في البيت.

بالنسبة للانتي فريزنغ لاحظت شعري خفت النفشة تقريبا ٢٠٪ بس هو طبعا في كم جلسة عشان كدة لسة ما اكتملت الجلسات فا راح اكملها ان شاء الله.

بعدها سويت جلسة حمام الهنا لليدين و الرجول ❤️ كانت قمة الدلع ❤️






عبارة عن تقشير في البداية بعدين تحط لوشن و تخلي ١٠ دقايق بعدين تعملي مسااااج والله قلتلهم جبولي مخدة و راح اناااام ههههه و بعدين دهنتلي زيت، ريحة المنتجات تجنن و مرة تدي رطوبة لليدين و الرجول من جد انبسطت فيها.

هدا الي عملتوا و من جد مرة مركز جميل و ممتاز و تحسوا كل الي في فاهمين ما شاء الله و تعاملهم راااااقي.

الي حبيت في كمان النظاااافة كل شي يستخدموا لازم يعقموا سواء المشط، الاجهزة، الادوات كل شي يعقموا قدامك و هدا شي مرة حلو بالنسبة ليا و حسيت اني مرتاحة نفسيا.

اسعارهم بالنسبة للجلسات حسيتها كويسة البعض شافها مرتفعة شوية بس انا بالنسبة للخدمات حسيتها كويسة بس يمكن المنتجات شوية مرتفعة حبتين.

اعطوني منتجات ميك اب من شركة بيير رينيه و هي شركة فرنسية و ان شاء الله راح اجربها كلها و اتكلم عنها 👍🏻


و عندهم خدمات مرة كتير و هدي صور من البروشروات حقتهم و طبعا عندهم خدمات اكتر كمان.







و هدا حسابهم في انستقرام و ارقام التواصل


و عندهم منتجات كتيرررة ناوية اجربها خاصة مجموعة الانتي فريزنغ و بخاخ الشعر 😍 بس تجربة كانت جميلة و كل الي قلتو الله يعلم انو صحيح و الحمدلله اقول رايي بصراحة دايما 👍🏻

Stay Elegant
xoxo

هناك 3 تعليقات:

  1. تعرفوا الان على طريقة فرد الشعر بالسفن اب فى المنزل واحصلوا على شعر ناعم ومفرود وحرير من خلال مشاهده هذا الفيديو .
    https://www.youtube.com/watch?v=8cwvCiR0Qxs

    ردحذف
  2. انا رحتله بعد وكانو مرره ذووووق والمكان مره نظيف اعيه 10 من 10

    ردحذف