الخميس، 15 أكتوبر، 2015

مجموعة فرشي للمكياج و رأي فيها


السلام عليكم حبايبي ❤️ قبل فترة تكلمت في سناب شات عن مجموعة فرشي و حسيت كتير انبسطوا في الموضوع و حبيت انقلوا في البلوق عشان البنات الي ما شافو او ما عندهم سناب ❤️ و يالله نبدا عشان الموضوع طويل شوية 🙈

اول شي حبيت اقول اني ما احب دايما التزم بالفرش يعني مثلا الفرشة مكتوب للفاونديشن مو شرط استخدمها للفاونديشن ممكن استخدمها للباودر اسوي الي يريحني و انتي نفس الشي استخدمي الفرشة بالطريقة الي تحبيها مو لازم تلتزمي ❤️

اول شي نبدأ بفرش الوجه

فرش الوجه من ريل تكنيك 



اسماء الفرش من اليسار: powder brush - buffing brush - contour brush

اول شي فرشة البودرة احب استخدمها للبرونز سهلة في توزيعو لاني من عشاق البرونز فا احب اوزعو على كامل محيط وجهي و الرقبة. الفرشة الي بعدها بفنغ برش استخدمها للبودرة تحت عيني عشان اثبت الكونسيلر و حلوة برضو لتوزيع الفاونديشن بس انا افضل البلندر اكتر. اخر وحدة فرشة الكونتور استخدمها للكونتور زي ماهي مرة حلوة و سهلة في الدمج 



من اليسار: sculpting brush - multi task brush - setting brush

فرشة السكلبتنغ او النحت هي للكونتور اساسا بس ما حبيتها كتير للكونتور احسها عريضة مدري ليش و ما عجبتني في الدمج افضل استخدم الفرشة الي فوق اكتر بس اوقات اعمل كونتور للجبهة فيها عشان احللها بس هههههه. فرشة الملتي تاسك او الاستخدام المتعدد احبها للبلاشر مرة جميلة في التوزيع. فرشة الستنغ احبها للاضاءة و برضو حلوة لتثبيت الباودر تحت العين.



من اليسار: essential foundation brush - pointed foundation brush

الاثنين تستخدم للفاونديشن بس انا ما احب الفرش المسطحة للفاونديشن فا اوقات استخدمها للبودرة المنثورة تحت العين و التانية استخدمها لباليت ماك حق الكونسيلر و الكوركتر احط فيها و ادمج بالبلندر و كمان حلوة لتنظيف حولين الحاجب بالكونسيلر.

فرش زويفا للوجه 



من اليسار: buffer - luxe face paint - luxe cheek finish 

اول وحدة حلوة لتوزيع الفاونديشن استخدمتها فترة لما ضاعت البلندر حقتي بس احس البلندر تطلع الفينش احلى بس تمشي الحال برضو خخخخخ. الي بعدها شكلها يناسب الكونتور بس ما حبيتها اوقات احط فيها اضاءة بس ناااادرا. اخر وحدة استخدمها للبلاشر و هي مخصصة لي.

فرش الوجه من ذي بودي شوب



من اليسار: face & body - blusher

فرش ذي بودي شوب مررررة نااااعمة بشكل مو طبيعي خخخخخ و احس المنتجات البودرة ما تمسك فيها كويس بس استخدم اليمين للبودرة لما احس الكونتور او البلاشر مرة قوي اروح اخففو بالبودرة و استخدمها و التانية للبلاشر بس زي ما قلت احس البودرة ما تمسك فيها و تطلع لون خفيف مرة فا استخدمها للبلاشر اذا كان لونو قوي يسير تطلع اللون خفيف.

 فرش العيون من زويفا



من اليمين: luxe crease - luxe crease - luxe soft crease - luxe soft definer 

فرش زويفا للعيون عشششق مرة احبها! هدي الفرش استخدمها للكريس الي هو (دايما انسى الكلمة بالعربي! خخخخخ) بس هو جوف العين او المنطقة الي بين عظمة الحاجب و الجفن و استخدمها برضو لدمج الشادو و عشان اخلي سموكي.



من اليمين: concealer buffer - luxe pencil - luxe petit crease 

الاولى استخدمها دايما لماك بينت بوت عشان احطو على جفني. الي بعدها استخدمها لمدمع العين و الاخيرة عشان اخلي الاي شادو زي الوينج من برة و كمان تنفع للبنات الي عينهم صغيرة و يستخدموها للكريس.



من اليمين: luxe brow light - luxe crease shader - contour shader - luxe smokey shader

اول وحدة للاضاءة تحت الحاجب، الي بعدها للكريس و استخدمها عشان احط الشادو على الجفن و الي بعدها لكونتور الانف و الاخيرة للسموكي و استخدمها للعين من تحت.



من اليمين: الثلاثة الاولى luxe brow line - smudger - luxe precise shader

النكتة الحلوة ان اول ٣ فرش للحواجب انا طلبت من زويفا مجموعة العين و مجموعة للعين و الوجه و وصلتني حقة حواجب مع كل مجموعة و وحدة زيادة مع مجموعة العين! و المشكلة مرة ما حبيتها لرسم الحواجب تطفش فا قاعدة منظر 😂 ممكن اوقات ارسم فيها خط صغير على خط الرموش عشان تدي كثافة للرموش بس الباقي منظر خخخخخ. التانية عشان العين من تحت و الاخيرة ما استخدمها خخخخخ بس احس تنفع للعين من تحت برضو. و الاخيرة اكتر شي ارسم فيها على خط الرموش لانها ادق من حقة الحواجب و اصغر.

فرش نمبر ٧



هدي فرش من نمبر ٧ من بوتس ما عليها اسماء للاسف ما استخدمها الا نادرا لما تكون فرشي وسخة! مرة سيئة و ما انصح فيها

فرش ذي بودي شوب



 اليمين ليها استخدامات كتيرة ممكن للكونسيلر حولين الحواجب او الشفايف و ممكن تحددي فيها الشفايف بالروج السائل. الفرشة الثانية للحواجب كنت ارسم فيها فترة بس متعبة شوية عشانها عريضة مرة بس الي حواجبها عريضة ممكن تناسبها.

فرش منوعة



هدي فرشتين منوعة عشانها الوحيدة الي عندي، اليمين ماك ٢٠٨ للحواجب فظيعععة مرة حبيتها للحواجب دقيقة و سهلة في الرسم. التانية من ايكوتولز استخدم جهة الي زي المشط عشان افرق رموشي عن بعض التانية عشان تمشيط الحاجب بس ما استخدمها صراحة.

فرش العين من ريل تكنيك 



من اليسار: deluxe crease brush - base shadow brush - shading brush - shadow brush

اول وحدة استخدمها للكونسيلر اوقات اذا كان كريمي و برضو اوقات احط فيها الشادو على كامل العين و الي بعدها استخدمها للشادو بشكل عام كل مرة استخدام. الثالثة لشادو تحت العين و الاخيرة برضى للشادو على كامل الجفن.



من اليسار: detailer brush - accent brush - brow brush - silicone liner brush - fine liner brush

اول وحدة للروج السائل لان الالوان الغامقة شوية صعبة انك تحطيها فا استخدم هدي عشان احدد الشفايف. الثانية استخدمها لتحت العين و الي بعدها للحواجب بس مرة سيئة للحواجب عشانها عريضة مرة و التحكم فيها صعب. الي بعدها فرشة للجل لاينر بالسلكون حلوة للجل لاينر بس لاحظت تقطع في الرسم شوية و الي بعدها برضو للجل لاينر احسن من السليكون.



اخر حاجة ما تعتبر فرشة بس دخلتها معاهم خخخخخ هي عشان تحطيها على جفنك و تحطي الماسكرا عشان لاتجي على الشادو بس حسيت صعب التحكم فيها لان لازم تمسكيها بالمقلوب و حسيتها مرة تطفش 😂 و ممكن تحطيها تحت عينك لما تستخدمي شادو منثور او قلتر عشان لا ينزل على الوحه.

راي بشكل عام عن الفرش

فرش ريل تكنيك: مرة رائعة و جودتها ممتازة تنفع للمبتدئات و سعرها حلو حوالي ١٢٠-١٦٠ المجموعات الاساسية و المفردة تختلف اسعارها، انا افضل فرش الوجه اكتر من العين و استخدمها اكثر انصح فيها مرة.

فرش زويفا: حقة العين مرة اعشقها و هي الاساسية عندي للعين مرة روعة اما الوجه ما حبيتها كتير بس البفر اكتر وحدة حبيتها فيهم. سعر مجموعة العين و مجموعة الوجه و العين حوالي ٣٥٠-٤٠٠ للوحدة 

فرش نمبر ٧: مرة ما انصح فيها سيئة و ما تسوي شي صراحة سعرها في الثلاثين و الاربعين تقريبا.

فرشة ماك: مرة جميلة و اذا تبغي فرشة حواجب كويسة انصحك فيها 👍🏻 سعرها تقريبا ١٢٠ و شوية

فرش بودي شوب: سعرها مبالغ في يعني حوالي تسعين و سبعين و ما تستاهل صح تعيش و عندي من ٨ سنين بس ما تستاهل السعر زيدي عليها شوية و خدي ماك ولا سيقما او اشتري ريل تكنيك افضل.

اتمنى تكونو استفدتو و اسفة اذا طويلة شوية 🙈

Stay Elegant
xoxo

ليست هناك تعليقات:

إرسال تعليق